ކުލަބުތައް ހަރުދަނާ އުސޫލެއްގެ ދަށުން ހިންގުމަކީ ކުޅިވަރުތަކާ ހަވާލުވެ ތިބި ވެރިންގެ ޒިންމާއެއް ކަމަށް ތަޖުރިބާކާރު ވޮލީބޯޅަ ކޯޗު މުޙައްމަދު ޝަރަފް ބުނެފިއެވެ.
ދިވެހިރާއްޖޭގެ އަޑުން ގެނެސްދިން "ސްޕޯޓްސް ބަޒް" ޕޮރޮގްރާމުގައި ކުލަބުތަކުގެ މާލީ ހާލަތު ރަނގަޅުކުރުމާ ގުޅޭގޮތުން ވާހަދައްކަމުން ޝަރަފް ބުނީ ރާއްޖޭގައި އެންމެ މަގުބޫލު މުބާރާތްތައް ގަވާއިދުން ނުބޭއްވި ދާނަމަ، އެކަމުގެ ގެއްލުން ކުލަބަތަކަށް ފޯރާނެ ކަމަށެވެ. އަދި މުބާރާތްތައް ރަނގަޅަށް ހިންގިގެން ނޫންގޮތަކަށް ރާއްޖޭގެ ކުލަބަތަކަށް މާލީ ގޮތުންވެސް އަދި އެހެން ގޮތްގޮތުންވެސް ފައިދާވާން ނެތް ކަމަށް ޝަރަފް ބުންޏެވެ.
ކުލަބަތަކަށް ސްޕޮންސާ ހޯދުމަކީވެސް މިހާރު އުނދަގޫ ކަމެއްކަން ފާހަގަކުރަމުން ޝަރަފް ބުނީ ކުޅިވަރަށް ޚަރަދުކުރާނެ ފަރާތްތައް ރާއްޖޭގައި އެބަތިބި ކަމަށާއި، އެކަމަކު ހިންގުން ދޯދިޔާވެ، މުބާރާތްތައް ނުބޭއްވުމުގެ ގެއްލުން ލިބެގެންދަނީ ކުލަބުތަކަށް ކަމަށެވެ. އަދި ރާއްޖޭގެ ވޮލީބޯޅަ ބެރޭންޑެއްގެ ގޮތުގައި އޮވެއްޖެ ކަމަށްވާނަމަ، ކުލަބުތަކަށް މާލީ ގޮތުންވާނެ ފައިދާތަކެއް އެބަހުރި ކަމަށްވެސް ކުރިން ގައުމީ ޓީމަށްވެސް އިރުޝާދު ދިން ކޯޗު ވަނީ ބުނެފައެވެ.
ޝަރަފް ބުނީ ރާއްޖޭގެ ކުލަބަތަކުން މިހާރު މާލީ ހާލަތު ރަނގަޅުކުރުމަށް އޮތް ހަމައެކަނި މަގަކަށް ފެންނަނީ އެކެޑަމީ ހިންގުން ކަމަށާއި، އެކަމަކު ވޮލީގައި އެކެޑަމީތަށް ރަނގަޅަށް ނުހިންގޭ ކަމަށެވެ. އެކަޑަމީތައް ހިންގުމަށްވުރެން ފައިސާ ހޯދޭނެ އެހެން ގޮތްތަށް އެބަހުރި ކަމަށާއި، ރަނގަޅު ގޮތުގައި ސްޕޮންސަރުން ހޯދުމާއި، ކުލަބުތައް ކޮމިއުނިޓީ ބޭސް ކުލަބުތަކަކަށް ބަދަލުވާން ޖެހޭ ކަމަށްވެސް ވަނީ ބުނެފައެވެ. އެގޮތުން ކޮމިއުނިޓީ ބޭސް ކުލަބުތަކަށް ފައިސާ ހޯދޭނެ އެހެން ގޮތްގޮތް ހުންނާނެ ކަމަށާއި، އެގޮތުން ހަރަކާތްތައް ހިންގައިގެން ފައިސާ ހޯދޭނެ ގޮތްތައްވެސް އޮންނާނެ ކަމަށް ވަނީ ބުނެފައެވެ. އެކަމަކު މިކަންކަން ބަދަލުވެގެން ދާނީ ވޮލީގެ ހާލުތު ރަނގަޅުވެގެން ކަމަށްވެސް ޝަރަފް ވަނީ ބުނެފައެވެ.
"އޭގެ އިތުރުން އެބަޖެހޭ ކުލަބުތައް އެޑިއުކޭޓް ކުރުމާއި، މެނޭޖުމަންޓް ކަންތައް ކުލަބުތަކަށް ކިޔައި ދިނުމާއި، ކުލަބުތަކައް އެކަންތައް އޮންނަ ގޮތް އޮޅުންފިލުވައިދީ، ދަސްކޮށްދޭންވެސް. ދެން އެންމެ މުހިންމު ކަމަކީ އެ ކުޅިވަރެއްގެ ގެންނަން ޖެހޭ ހިސާބަކަށް ކުޅިވަރުގައި ޝާމިލުވާ ޓޮޕް މެނޭޖުމަންޓުތަކުން މަސައްކަތްކުރުން،. ބްރޭންޑެއް ގޮތުގައި ކުޅިވަރު ބޭއްވުން.މުޙައްމަދު ޝަރަފް - ތަޖުރިބާކާރު ވޮލީބޯޅަ ކޯޗު
ދާދި ފަހުން ނިމިގެންދިޔަ ވޮލީބޯލް އެސޯސިއޭޝަން ކަޕުގައި ޝަރަފުގެ ކޯޗުކަމުގައި ޒުވާން ކުޅުންތެރިންނާއެކު ނުކުމެ ސިޓީ ސްޕޯޓްސް ކުލަބުން ވަނީ އެ މުބާރާތް ކާމިޔާބުކޮށްފައެވެ.