ސްޕެނިޝް ސުޕަ ކަޕުގެ ސެމީ ފައިނަލުގައި އޮސަސޫނާ ބަލިކޮށް، މުބާރާތުގެ ފައިނަލުގެ ފަހު ޖާގަ އެންމެ ފަހުގެ ޗެމްޕިއަން ބާސެލޯނާ ހޯދައިފިއެވެ.
ސައުދީ އަރަބިއްޔާގެ ރިޔާދުގައި ކުރިއަށްދާ މި މުބާރާތުގައި ރޭ ކުޅުނު މެޗުން ބާސެލޯނާ މޮޅުވީ 2-0 ގެ ނަތީޖާއަކުންނެވެ.
މި މެޗުގައި ބާސެލޯނާއިން ގިނައިރު ބޯޅަ ގެންގުޅެ ގިނަ ހަމަލާ އުފެއްދި ނަމަވެސް، މެޗުގެ ފުރަތަމަ ހާފުގައި ދެ ޓީމުންކުރެ ޓީމަކަށް ލަނޑެއް ކާމިޔާބުކުރެވިފައެއް ނުވެއެވެ.
މި މެޗުގައި ބާސެލޯނާއިން ލީޑު ނެގީ މެޗުގެ 59 މިނެޓުގައި އިލްކާއީ ގުންޑަޮގާން ދިން ބޯޅައަކުން ރޮބާޓް ލެވަންޑޮސްކީ ކާމިޔާބުކޮށްދިން ލަނޑުންނެވެ. އަދި ބާސެލޯނާގެ ދެވަނަ ލަނޑު މެޗުގެ އިތުރު ވަގުތު ތެރޭގައި ކާމިޔާބުކޮށްދިނީ ލަމީން ޔަމާލެވެ. މިއީ އެ ޓީމު ޖާއޯ ފީލިކްސްގެ އެހީތެރިކަމާއެކު އޭނާ ކާމިޔާބުކުރި ލަނޑެކެވެ.
ސްޕެނިޝް ސުޕަ ކަޕް ސައުދީގައި ކުޅެނީ އެ ގައުމުގެ ސަރުކާރާއެކު ވެފައިވާ އެއްބަސްވުމެއްގެ ދަށުންނެވެ. މި މުބާރާތް ސައުދީގައި ކުޅޭތީވެ، އެ ގައުމުގެ ސަރުކާރުން މުބާރާތުގައި ކުޅޭ ހަތަރު ޓީމާއި، އިނާމު ފައިސާއަށް އަދި ސްޕެއިނުގެ ފުޓްބޯޅަ ފެޑެރޭޝަނަށް ގިނަ އަދަދަކަށް ފައިސާ ދެއެވެ.
އަންނަ އާދީއްތަ ދުވަހުގެރޭ ކުޅޭ މި މުބާރާތުގެ ފައިނަލުގައި ބާސެލޯނާއާ ދެކޮޅަށް ނުކުންނާނީ ވާދަވެރި ރެއާލް މެޑްރިޑެވެ. ރެއާލް މެޑްރިޑް ފައިނަލަށް ދަތުރުކުރީ ބުދަ ދުވަހުގެރޭ އެތުލެޓިކޯ މެޑްރިޑް 5-3 ގެ ނަތީޖާއަކުން ބަލިކޮށްގެންނެވެ.
ބާސެލޯނާއިން ވަނީ މި މުބާރާތުގެ ތަށި ރިކޯޑު އަދަދެއް ކަމަށްވާ 14 ފަހަރު ކާމިޔާބުކޮށްފައެވެ.