ވިއެޓްނާމުގެ ހަނޯއީގައި މިހާރު ކުރިއަށްދާ އައިޓީއެފް އޭޝިއާ ޑިވެލޮޕްމަންޓް ޗެމްޕިއަންޝިޕުގެ 14 އަހަރުން ދަށުގެ ބައިގެ ސިންގަލްސް އިވެންޓުގެ ފައިނަލުން ރާއްޖޭގެ ނަބާ ނިޝާން ޖާގަ ހޯދައިފިއެވެ.
ނަބާ ފައިނަލަށް ދިޔައީ މުބާރާތުގެ ސިންގަލްސް ސެމީ ފައިނަލް މެޗުގައި ސްރީ ލަންކާގެ ހިރުންޑި ދިޔުނުގެއާ ވާދަކޮށް 6-1 އަދި 6-3 އިން މެޗު ކާމިޔާބުކޮށްގެންނެވެ. މުބާރާތުގެ ސިންގަލްސް ފައިނަލުގައި ނަބާ ނުކުންނާނީ ލަންކާގެ އަންނަޔާ ނޯބެޓްއާ ދެކޮޅަށެވެ. މިއީ މި ފެންވަރުގެ މުބާރާތެއްގައި ރާއްޖޭގެ ކުޅުންތެރިޔަކު ހޯދީ ތާރީޚީ ކާމިޔާބެކެވެ.
މި މުބާރާތަކީ އިންޓަނޭޝަނަލް ޓެނިސް ފެޑެރޭޝަނުން އިންތިޒާމުކޮށްގެން ކޮންމެ އަހަރަކު ބާއްވާ މުބާރާތެކެވެ. މި މުބާރާތުގައި ރާއްޖެ އާއި ލަންކާ، ލާއޯސް، ކެންބޯޑިއާ، މޮންގޯލިއާ އަދި ބްރޫނާއިގެ އިތުރުން އަށް ގައުމެއް ވާދަކުރާނެއެވެ.
ސިންގަލްސް އަދި ޑަބަލްސް އިވެންޓުތައް ހިމެނޭހެން މުބާރާތް ރޭވިފައިވަނީ ވަކިވަކި މެޗުތަކުން އެންމެ މަތިން ރޭންކް ކުރެވޭ ދެ ގައުމަކަށް ފައިނަލް ބުރުގެ ޖާގައެއް ލިބޭ ގޮތަށެވެ. މުބާރާތުގެ ފައިނަލް ބުރުއޮންނާނީ އަންނަ އެޕްރީލް މަހު އިންޑިއާގައެވެ. މުބާރާތުގައި ރާއްޖެ ތަމްސީލުކުރާ ޓީމުގައި ހިމެނެނީ ހަތަރު ކުޅުންތެރިންނެވެ. އެއީ ނަބާ އާއި، މަންހާ މުހަޙައްމަދު އަލީ އާއި، އާދަމް އާލް ނިޔާޒުގެ އިތުރުން މީކާ މުޙައްމަދު ކަލީމެވެ.