ފަހަތުން އަރައި ފުލަމް ބަލިކޮށް ލިވަޕޫލް ފައިނަލާ ގާތަށް

އިނގިރޭސި ލީގު ކަޕުގެ ސެމީ ފައިނަލް ފުރަތަަމަ ލެގުގައި ރޭ ފަހަތުން އަރައި ފުލަމް ބަލިކޮށް، މުބާރާތުގެ ފައިނަލާ ގާތަށް ލިވަޕޫލް ޖެހިލައިފިއެވެ.

އަމިއްލަ ދަނޑުގައި ކުޅުނު މެޗުން ލިވަޕޫލް މޮޅުވީ 2-1 ގެ ނަތީޖާއަކުންނެވެ.

މި މެޗާވެސް ލިވަޕޫލް ކުރިމަތިލާފައިވަނީ އެފްރިކާ ކަޕް އޮފް ނޭޝަންސް އާއި އޭޝިއަން ކަޕުގައި ކުޅެން ދިޔަ ކުޅުންތެރިންނާއި އަނިޔާގެ ސަބަބުން ކުޅުމާ ދުރުގައި ތިބި ގިނަ ސީނިއާ ކުޅުންތެރިން ނުލައެވެ. މި މެޗު ފަށައިގެން ލިވަޕޫލަށް އެންމެ އެދެވޭ ކުޅުމެއް ނުދެއްކުނުއިރު، މެޗުގެ 19 ވަނަ މިނެޓުގައި ފުލަމުން ވަނީ ލީޑު ނަގާފައެވެ. އަންޑްރެއަސް ޕެރެއިރާ ދިން ބޯޅައަކުން މި ލަނޑު ކާމިޔާބުކޮށްދިނީ ވިލިއަންއެވެ.

މި މެޗުގައި ލިވަޕޫލުން ކުޅުން ރަނގަޅުކޮށްފައިވަނީ ދެވަނަ ހާފުގައި ބަދަލަކަށް އެރި ދެ ކުޅުންތެރިން ކަމަށްވާ ޑާވިން ނޫނޭޒް އާއި ކޯޑީ ގަކްޕޯއާއެކުއެވެ. އެއާއެކު މެޗުގެ 68 ވަނަ މިނެޓުގައި ލިވަޕޫލުން ވަނީ ނަތީޖާ އެއްވަރުކޮށްފައެވެ. ނޫނޭޒްގެ އެހީއާއެކު އޭރިއާ ބޭރުން ފޮނުވާލި ހަމަލާއަކުން މި ލަނޑު ކާމިޔާބުކޮށްދިނީ ކާޓިސް ޖޯންސްއެވެ. އަދި އޭގެ ތިން މިނެޓު ފަހުން ނޫނޭޒް ދިން ބޯޅައަކުން ގަކްޕޯ ވަނީ ލަނޑެއް ޖަހައި، މި މެޗުން ލިވަޕޫލް މޮޅުކޮށްދީފައެވެ.

މި މޮޅާއެކު ލިވަޕޫލުން ފައިނަލާ ގާތަށް ޖެހިލިއިރު، ސެމީ ފައިނަލް ދެވަނަ ލެގު ކުޅޭނީ މި މަހުގެ 24 ވަނަ ދުވަހު ފުލަމުގެ ދަނޑުގައެވެ. އެ މެޗު އެއްވަރުކޮށްލައިގެންވެސް ލިވަޕޫލަށް ފައިނަލުގެ ޖާގައެއް ހޯދޭނެއެވެ. މި މުބާރާތުގެ އަނެއް ސެމީ ފައިނަލް ފުރަތަމަ ލެގުގައި ޗެލްސީ އަތުން މިޑްލްސްބްރާ ވަނީ 1-0 ގެ ނަތީޖާއަކުން މޮޅުވެފައެވެ.