ކުރީގެ ސަރުކާރުން ފެށި "އަރުތަ" ޕްރޮގްރާމަކީ އެއްވެސް ކަހަލަ އުސޫލެއް ނެތި އޮތް ޕްރޮގުރާމެއް ކަމަށާއި، އެ ޕްރޮގްރާމް މީގެ ކުރިން ހިންގަމުން އައީ ވުޒާރާއަށް ފެންނަ އެތުލީޓުންނަށް ދީގެން ކަމަށް ކުޅިވަރާއި ހަށިހެޔޮކަމާ ބެހޭ ވުޒާރާގެ ސްޓޭޓް މިނިސްޓަރު މުޙައްމަދު ރިޔާޒް ވިދާޅުވެއްޖެއެވެ.
ކުޅިވަރު އެތުލީޓުންގެ ތަމްރީނުތަކާއި ބައިނަލްއަގުވާމީ މުބާރާތްތަކާއި ތަމްރީނުތަކަށް ޚަރަދުކުރުމުގެ ގޮތުން މިދިޔަ ސަރުކާރުން އަރުތަ ޕްރޮގްރާމް ފަށާފައިވަނީ މިދިޔަ އަހަރުގެ މާޗު މަހުގެ ތެރޭގައެވެ.
މިދިޔަ ސަރުކާރުގެ ދައުރު ހަމަވިއިރު އެ ޕްރޮގްރާމުގައި 50 އަށްވުރެ ގިނަ އެތުލީޓުން ވަނީ ހިމަނާފައެވެ. އޭގެ ތެރޭގައި ޓޭބަލް ޓެނިސް، އެތުލެޓިކްސް، ސްވިމިން، ޓެނިސް އަދި ބީޗް ވޮލީބޯޅައިގެ ކުޅުންތެރިން ހިމެނެއެވެ. ސަރުކާރުން ވަނީ މި އެތުލީޓުންނަށް މާލީގޮތުން ބޮޑެތި ޚަރަދުތަކެއް ކޮށްފައެވެ. އޭގެ ތެރެއިން ބައެއް އެތުލީޓުންގެ އެއްބަސްވުން ކުރީ ސަރުކާރުން ވަނީ އައުކޮށްފައެވެ.
ކުޅިވަރާއި ހަށިހެޔޮކަމާ ބެހޭ ވުޒާރާގެ މަސައްކަތްތަކާ ގުޅޭގޮތުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރިޔާޒް ވިދާޅުވީ އަރުތަ ޕްރޮގްރާމް ރިވިއުކުރުމުގެ މަސައްކަތް ކުރަމުން އަންނަ ކަމަށެވެ. އަދި އަރުތަ ޕްރޮގްރާމަކީ ރަނގަޅު އުސޫލެއް ނެތި ފަށާފައިވާ ކަމެއްކަން ފާހަގަކުރައްވަމުން ރިޔާޒް ވިދާޅުވީ މި ޕްރޮގްރާމަކީ ވަރަށް އުނދަގޫ މަރުހަލާއެއްގައި އޮތް ކަމެއް ކަމަށެވެ.
އަރުތައިގެ ދަށުން ކުޅުންތެރިންގެ ތަމްރީނުތަކަށާއި, މުބާރާތްތަކަށް ޚަރަދުކުރާނެ ގޮތެއް ލިޔެވިފައިނުވާ ކަމަށާއި، އެ ޕްރޮގްރާމް ހިންގަމުން އައީ ކުޅިވަރާ ބެހޭ ވުޒާރާއަށް ފެންނަ އެތުލީޓުންނަށް ކަމަށް ރިޔާޒް ވިދާޅުވިއެވެ. އެކަމަށް އެންމެ ބޮޑަށް ބާރު ލިބޭ ކަމަކީ، ކުޅިވަރު އެސޯސިއޭޝަންތަކުން މިހާރު އޮތް ގޮތަށް އެ ޕްރޮގްރާމް ގެންދަން ބޭނުންނުވުން ކަމަށްވެސް ރިޔާޒް ވިދާޅުވިއެވެ. އަރުތަ ޕްރޮގްރާމުގެ އެއްބަސްވުން އައުކޮށްފައިވަނީ އެކިއެކި ކުޅުންތެރިންނަށް އެކި ފެންވަރަށް އެއްވެސް އުސޫލެއް ނެތް ގޮތަށް ކަމަށްވެސް ރިޔާޒް ވަނީ ވިދާޅުވެފައެވެ. އެގޮތުން އެތުލީޓުންނަށް އަރުތަ ޕްރޮގްރާމުގެ ފުރުސަތު ދީފައިވަނީ ކުޅިވަރު އެސޯސިއޭޝަންތަކާ މާ ބޮޑު ބައިވެރިވުމެއް ނެތި ކަމަށާއި ކުޅުންތެރިން ހޮވާފައިވަނީ ވުޒާރާއިން ބޭނުންވާ ވަކި އެތުލީޓުންނަށް ދޭ ގޮތަށް ކަމަށްވެސް ރިޔާޒް ވިދާޅުވިއެވެ.
ސަރުކާރުން ފެށި އަރުތަ ޕްރޮގްރާމުގެ ދަށުން އެތުލީޓުންގެ ތަމްރީނުތަކަށާއި އަދި އެ ނޫންވެސް ބޭނުންތަކަށް އަރުތަ ޕްރޮގްރާމުގެ ދަށުން ވަނީ މާލީ އެހީތެރިކަން ދީފައެވެ. އެ ޕްރޮގްރާމުގެ ދަށުން 2022 ވަނަ އަހަރު ނިމުނުއިރު ތިބީ 22 އެތުލީޓުންނެވެ. ނަމަވެސް ނިމިދިޔަ އަހަރުގެ އޮކްޓޯބަރު މަހު ވަނީ އެ ޕްރޮގްރާމުގައި 54 އެތުލީޓުން ހިމަނާފައެވެ.