ގައުމީ ވޮލީބޯޅަ މުބާރާތުގެ އަންހެން ޑިވިޝަނުގެ ފައިނަލުގައި ޕޮލިސް ކުލަބު ބަލިކޮށް، ކުލަބު ވެމްކޯއިން މުބާރާތުގެ ތަށި ދިފާއުކޮށްފިއެވެ.
ޒުވާނުންގެ މަރުކަޒުގެ އެތެރޭ ކޯޓުގައި މިރޭ ކުޅުނު ފައިނަލް މެޗު ވެމްކޯއިން ކާމިޔާބުކުރީ ޕޮލިސް ކުލަބާ ވާދަކޮށް 3-1 ސެޓުންނެވެ.
މިއާއެކު ވެމްކޯއިން ގައުމީ މުބާރާތުގެ ތަށި ދިފާއުކުރިއިރު، މިއީ އެ ޓީމުން މި މުބާރާތް ކާމިޔާބުކުރި ދެވަނަ ފަހަރެވެ. އެގޮތުން މިދިޔަ އަހަރު ކުޅުނު މުބާރާތުގެ ފައިނަލުގައި ވެމްކޯއިން ވަނީ ކުލަބު ވޮލީބޯލް ބަލިކޮށް، ފުރަތަމަ ފަހަރަށް ގައުމީ ތަށި އުފުލާލާފައެވެ.
މިރޭ ކުޅުނު މެޗުގައި ވެމްކޯގެ ފަރާތުން މޮޅު ކުޅުމެއް ފެނިގެންދިޔައިރު، އެ ޓީމުން ވަނީ ފުރަތަމަ ދެ ސެޓު 25-21 އަދި 25-21 އިން ކާމިޔާބުކޮށްފައެވެ. އެކަމަކު ތިންވަނަ ސެޓުގައި ޕޮލިހުގެ ފަރާތުން މޮޅު ކުޅުމެއް ފެނިގެންދިޔައިރު، އެ ޓީމުން ވަނީ އެ ސެޓު 19-25 އިން ގެންގޮސްފައެވެ. ނަމަވެސް މި މެޗުން ވެމްކޯ މޮޅުވީ ހަތަރުވަނަ ސެޓު 25-23 އިން ކާމިޔާބުކޮށްގެންނެވެ. މި މެޗުގެ މޮޅު ކުޅުންތެރިއަކަށް ހޮވުނީ ވެމްކޯގެ ބިދޭސީ ކުޅުންތެރިޔާ ކީޝާ ރިކޯލް ހަންޓެވެ.
ފައިނަލް މެޗަށްފަހު ވާހަކައްދަކަމުން މުބާރާތުގެ އެންމެ މޮޅު ކޯޗުގެ މަގާމު ހޯދި ވެމްކޯގެ ކޯޗު ޝުއައިބް އަޙްމަދު ބުނީ މި މެޗުގެ ފުރަތަމަ ސެޓުގައި އެ ޓީމުގެ ބިދޭސީ ކުޅުންތެރިޔާއަށް ލިބުނު އަނިޔާއަކާ ގުޅިގެން އޭނާ ކުޅުމަށް މަޑުޖެހުމެއް އައި ކަމަށާއި، ނަމަވެސް އަމިއްލައަށް ރިކަވާވެގެން މި މެޗުގައި އޭނާ ވަރަށް ރަނގަޅަށް ކުޅުނު ކަމަށެވެ. މީގެ އިތުރުން އެ ޓީމުގެ ލޯކަލް ކުޅުންތެރިންވެސް މި މެޗުގައި ވަރަށް މޮޅަށް ކުޅުނު ކަމަށްވެސް ޝުއައިބް ވަނީ ބުނެފައެވެ.
ޕޮލިސް ކުލަބުގެ ކޯޗު ފަތުހުﷲ ވަހީދު (ފައްލޯ) ބުނީ މުޅި މުބާރާތުގައި އެ ޓީމަށް ކުޅުނު ޒުވާން ކުޅުންތެރިންގެ ފަރާތުން ރަނގަޅު ކުޅުމެއް ފެނިގެންދިޔަ ކަމަށާއި، އެގޮތުން ޚާއްސަކޮށް ފައިނަލް މެޗުގައި އެ ޓީމަށް ކުޅުނު އަދި މުބާރާތުގެ އެންމެ އުއްމީދީ ކުޅުންތެރިޔާގެ މަގާމު ހޯދި އަލްޔާ އަޙްމަދުގެ ކުޅުން ފާހަގަކޮށްލާ ކަމަށެވެ.
މި މުބާރާތުގެ އެންމެ މޮޅު ސެޓަރަކީ ވެމްކޯގެ ޖޫޒާން ޒަރީރެވެ. އަދި އެންމެ މޮޅު މިޑްލް ބްލޮކަރަކަށް ވެމްކޯގެ މާޔާ ހުސެއިން ސޮލާޙް ހޮވުނުއިރު, ސެކަންޑް ބެސްޓް މިޑްލް ބްލޮކަރަކީ ވޮލީބޯލް ޔޫތު ނިއު ޖެނެރޭޝަނުގެ އާމިނަތު ރިޔާޝާއެވެ. މުބާރާތުގެ އެންމެ މޮޅު އޮޕޮސިޓް ޕްލޭޔަރަކަށް ވޮލީބޯލް ޔޫތު ނިއު ޖެނެރޭޝަނުގެ ފާތިމަތު ސަމްހާ ހޮވުނުއިރު, އެންމެ މޮޅު ލިބަރޯއަކީ އެ ޓީމުގެ މައިހާ އަލީއެވެ. އަދި އެންމެ މޮޅު އައުޓްސައިޑް އެޓޭކަރަކަށް ޕޮލިހުގެ ހައްވާ ރާޝިދާ ހޮވުނުއިރު, ސެކަންޑް ބެސްޓް އައުޓްސައިޑް އެޓޭކަރަކަށް ހޮވުނީ ވެމްކޯގެ އާމިނަތު އަރީޝާއެވެ. މި މުބާރާތުގެ އެންމެ މޮޅު ބިދޭސީ ކުޅުންތެރިޔަކަށް ވެމްކޯގެ ކީސާ ރިކޯލް ހޮވުނުއިރު, މުޅި މުބާރާތުގެ އެންމެ މޮޅު ކުޅުންތެރިޔަކީ ވެމްކޯގެ މާޖިދާއެވެ.
މި ފަހަރުގެ ގައުމީ މުބާރާތުގެ ފައިނަލުގައި ވެމްކޯއިން ޕޮލިސް ބަލިކުރިއިރު، ދާދި ފަހުން ނިމިގެންދިޔަ އެސޯސިއޭޝަން ކަޕުގެ ފައިނަލުގައިވެސް ވާދަކުރީ މި ދެ ޓީމެވެ. އެ މެޗުގައި ޕޮލިސް އަތުން ސީދާ ތިން ސެޓުން މޮޅުވެ ވެމްކޯ ވަނީ އެސޯސިއޭޝަން ކަޕުގެ ތަށި މިލްކުކޮށްފައެވެ.