އިނގިރޭސި އެފްއޭ ކަޕުގެ ތިންވަނަ ބުރުގައި ވިގަން އެތުލެޓިކް ބަލިކޮށް، ހަތަރުވަނަ ބުރުގެ ޖާގައެއް މެންޗެސްޓާ ޔުނައިޓެޑުން ހޯދައިފިއެވެ.
ރަށުން ބޭރުގައި ކުޅުނު މެޗުން ޔުނައިޓެޑް މޮޅުވީ 2-0 ގެ ނަތީޖާއަކުންނެވެ.
ޔުނައިޓެޑުން ރޭގެ މެޗުގައި ލީޑުނެގީ 22 ވަނަ މިނެޓުގައެވެ. މި ލަނޑު ކާމިޔާބުކޮށްދިނީ ޑިއޯގޯ ޑަލޯއެވެ. އޭގެ ފަހުން ޔުނައިޓެޑުގެ އަލެހަންދްރޯ ގާނާޗޯ އާއި ރަސްމުސް ހޮއިލުންޑް ފޮނުވާލި ހަމަލާތައް ވަނީ ގޯލުގެ ދަނޑިއަށް އަމާޒުވެފައެވެ. މި މެޗުގައި ޔުނައިޓެޑުން ލީޑު ފުޅާކޮށްފައިވަނީ މެޗުގެ 74 ވަނަ މިނެޓުގައެވެ. ލިބުނު ޕެނަލްޓީއަކުން މި ލަނޑު ޖަހައިދިނީ ބްރޫނޯ ފެނާންޑޭސްއެވެ. މިއީ ފެނާންޑޭސްއަށް ވިގަންގެ ލިއަމް ޝޯ ކުރި ފައުލަކަށް ދިން ޕެނަލްޓީއެކެވެ.
މި މުބާރާތުގެ ހަތަރުވަނަ ބުރުގައި ޔުނައިޓެޑް ކުޅެން ޖެހޭނީ ދަށް ޑިވިޝަނުގެ ޓީމަކާ ދެކޮޅަށެވެ. އެއީ އިނގިރޭސި ހަތަރުވަނަ ޑިވިޝަނުގެ 18 ވަނައިގައި އޮތް ނިއުޕޯޓް ކައުންޓީ ނުވަތަ އިނގިރޭސި އެންމެ ދަށް ޑިވިޝަނުގެ ޓީމު އީސްޓްލައިއާއެވެ.