"ސަސްޕެންޝަނަކާ ދިމާއަށް މަސައްކަތްކުރާނަމަ، ދޭންޖެހޭ އެއްބާރުލުމަށް ހުއްޓުމެއް އައުން ގާތް"
ފީފާގެ ސަސްޕެންޝަނަަކާ ހަމައަށް ގެންދަން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން މަސައްކަތްކުރާ ކަމަށްވާނަމަ، އެ އެސޯސިއޭޝަނަށް ދޭން ޖެހޭ އެއްބާރުލުމަށް ހުއްޓުމެއް އައުން ގާތް ކަމަށް ކޮމިޝަނަރ އޮފް ސްޕޯޓްސް މުޙައްމަދު ޠަލާލް ވިދާޅުވެއްޖެއެވެ.
މައްސަލަގަނޑެއްގެ ތެރޭގައި އޮތް އެފްއޭއެމުގެ އިންތިޚާބު މި މަހުގެ 31 ވަނަ ދުވަހު ބާއްވަން ނިންމާފައިވާއިރު، އެ އިންތިޚާބުގެ ކަންކަން ހުއްޓާލަން ކޮމިޝަނަރ އޮފް ސްޕޯޓްސް ޠަލާލް މީގެ ކުރިން ވަނީ އަންގަވާފައެވެ. އެއާއެކުވެސް އެފްއޭއެމުން ދަނީ އެކަމަށް އިޖާބަނުދީ، އިންތިޚާބުގެ ކަންކަން ކުރިއަށްގެންދަމުންނެވެ. އަދި މީގެ ކުރިން އެފްއޭއެމުގެ އިންތިޚާބުގެ މަޢުލޫމާތު ސާފުކުރަން ޠަލާލް ފޮނުއްވި ސިޓީއަށް ކަނޑައަޅާފައިވާ މުއްދަތުގެ ތެރޭގައި އެފްއޭއެމުން ޖަވާބުދާރީވެފައެއް ނުވެއެވެ.
ކޮމިޝަނަރުގެ އެންގުމަށް އެފްއޭއެމުން ފުރަގަސްދީފައިވާއިރު، އިންތިޚާބުގެ އެންމެ ބޮޑު މައްސަލައެއްގެ ގޮތުގައި މިހާރު ފެނިގެންދަނީ އިންތިޚާބުގައި ވާދަކުރައްވާ ދެ ކެންޑިޑޭޓުން ކަމަށްވާ އެފްއޭއެމުގެ ކުރީގެ ރައީސް އަދި ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަޙްމަދު ތޯރިގު (ޓޮމް) އާއި މިހާރުގެ ރައީސް ބައްސާމް އަދީލް ޖަލީލުގެ ހިންގާ ކޮމިޓީގެ މެންބަރު އަދި ކުލަބު އީގަލްސްގެ ވައިސް ޗެއާމަން މުފާވިޒު ހާޝިމް (މުފާ) އަށްވެސް ކުލަބު ވެލެންސިއާއިން ތާއީދު ސިޓީއެއް ދީފައިވާ މައްސަލައެވެ. އެފްއޭއެމުގެ އިލެކްޓޯރަލް ކޮމިޓީން ވަނީ މި މައްސަލައިގައި ފީފާ އާއި އޭއެފްސީގެ ލަފަޔަކަށް އެދިފައެވެ.
މި މައްސަލައާ ގުޅިގެން ނޫސްވެރިއަކު ކުރި ސުވާލަކަށް ޖަވާބުދެއްވަމުން ކޮމިޝަނަރ އޮފް ސްޕޯޓްސް ޠަލާލް ވިދާޅުވީ އެންމެންވެސް މަސައްކަތްކުރަންވީ ރާއްޖެ ސަސްޕެންޝަނަކާ ހަމައަށް ނުގެންގޮސް, ހައްލެއް ހޯދުމަށް ކަމަށެވެ. އަދި ކޮންމެ އިންތިޚާބަކާ ދިމާކޮށްވެސް ފީފާގެ ސަސްޕެންޝަނުގެ ވާހަކަ އަންނަ ކަމަށާއި، މި ފަހަރުވެސް އެ ވާހަކަ އައުން އެކަށީގެންވާ ކަމަށްވެސް ވިދާޅުވިއެވެ.
ޠަލާލް ވިދާޅުވީ އެސޯސިއޭޝަނުންވެސް މަސައްކަތްކުރަންވީ ސަސްޕެންޝަނާ ހަމައަށް ދިޔަނުދީ، މިކަން ހައްލުވެގެން، ހުރިހާ އެންމެށް ބައިވެރިވެގެން، އެންމެންގެ ކުޅިވަރެއްގެ ގޮތުގައި ކުރިއަށްދެވޭނެ ގޮތަކަށް ކަންކަން ކުރުމަށް ކަމަށެވެ. އަދި ސަސްޕެންޝަނަަކާ ހަމައަށް ގެންދަން އެސޯސިއޭޝަނުން މަސައްކަތްކުރާ ކަމަށްވާނަމަ، އެ އެސޯސިއޭޝަނަކަށް ދޭން ޖެހޭ އެއްބާރުލުމަކަށް ހުއްޓުމެއް އައުން ގާތް ކަމަށްވެސް ވިދާޅުވިއެވެ. އަދި އެ ހާލަތުގައި ޔަގީނުންވެސް ކޮމިޝަނަރ އޮފް ސްޕޯޓްސްގެ ފަރާތުން ލިބެން ޖެހޭ އެއްބާރުލުމަށް ކޮންމެވެސް ވަރެއްގެ ހުއްޓުންތަކެއް އައުން ގާތް ކަމަށްވެސް ވަނީ ވިދާޅުވެފައެވެ.
މީގެ އިތުރުން ޠަލާލް ވަނީ ފުޓްބޯޅަ އަލުން ކޮޅަށް ޖެހުމަކީ ރައީސުލްޖުމްހޫރިއްޔާގެ ވައުދުފުޅެއް ކަމަށާއި، އެކަން ކުރާނެކަމުގެ ޔަގީންކަންދޭ ކަމަށްވެސް ވިދާޅުވެފައެވެ.