އެމްޕީއޭލް ދެވަނަ ޑިވިޝަން ފުޓްބޯޅަ މުބާރާތުގެ ގްރޫޕް އޭގައި މިއަދު ހަވީރު ޖޭޖޭ ސްޕޯޓްސް ކުލަބު އަތުން މަހިބަދޫ ސްޕޯޓްސް ކުލަބު ފަހު ވަގުތު މޮޅުވެއްޖެއެވެ.
ގައުމީ ފުޓްބޯޅަ ދަނޑުގައި ކުޅުނު މި މެޗުން މަހިބަދޫ މޮޅުވީ 3-2 ގެ ނަތީޖާއަކުންނެވެ.
ފޯރިގަދަ ކުޅުމެއް ފެނިގެންދިޔަ މި މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ މަހިބަދޫންނެވެ. މެޗުގެ 28 ވަނަ މިނެޓުގައި މި ލަނޑު ކާމިޔާބުކޮށްދިނީ ޑިފެންޑަރު އަބްދުﷲ އަނީސް އިބްރާހީމެވެ. އެކަމަކު ދެވަނަ ހާފު ފަށައިގެން 13 ވަނަ މިނެޓުގައި މުޙައްމަދު ފާސިރު ވަނީ ޖޭޖޭ ސްޕޯޓްސްއަށް ނަތީޖާ އެއްވަރުކޮށްދީފައެވެ.
މި މެޗުގައި މަހިބަދޫން ދެވަނަ ފަހަރަށް ލީޑު ނެގީ މެޗުގެ 68 ވަނަ މިނެޓުގައެވެ. ބަދަލަކަށް ކުޅެން އެރި މުޙައްމަދު ޖުނައިދު ތަނަވަސްކޮށްދިން ފުރުސަތަކުން މި ލަނޑު ކާމިޔާބުކޮށްދިނީ އާދަމް ނާއިލެވެ. ނަމަވެސް މެޗުގެ 83 ވަނަ މިނެޓުގައި ޖޭޖޭ ސްޕޯޓްސްއިން ވަނީ އަނެއްކާވެސް ނަތީޖާ އެއްވަރުކޮށްފައެވެ. ފާސިރު ދިން ބޯޅައަކުން މި ލަނޑު ކާމިޔާބުކޮށްދިނީ އިޝާން އިބްރާހީމް (ސައްޓު) އެވެ. އޭނާ މި ލަނޑު ކާމިޔާބުކުރީ އޭރިއާ ތެރެއިން މަހިބަދޫގެ ގޯލްކީޕަރު އަޙްމަދު ނައުފަލް ކައިރިންވެސް ނައްޓާލުމަށްފަހުއެވެ.
މި މެޗުން މަހިބަދޫ މޮޅުވި ލަނޑު އެ ޓީމުން ކާމިޔާބުކޮށްފައިވަނީ މެޗުގެ އިތުރު ވަގުތުގެ ތެރޭގައެވެ. ނާއިލްގެ އެހީއާއެކު މި ލަނޑު ޖަހައިދިނީ އާދަމް ފަހުމާނެވެ.
މިއީ މި ފަހަރުގެ މުބާރާތުގައި މަހިބަދޫން ހޯދި ފުރަތަމަ މޮޅެވެ. އެގޮތުން މި މުބާރާތުގައި ކުޅުނު ފުރަތަމަ މެޗުން މަހިބަދޫ ވަނީ މަސްއޮޑި ސްޕޯޓްސް ކުލަބު އަތުން 4-0 ގެ ނަތީޖާއަކުން ބަލިވެފައެވެ. މީގެ އިތުރުން ޖޭޖޭ ސްޕޯޓްސް ވަނީ މުބާރާތުގައި މިހާތަނަށް ކުޅުނު ދެ މެޗުންވެސް ބަލިވެފައެވެ. އެގޮތުން އެ ޓީމުން ކުޅުނު ފުރަތަމަ މެޗުން ވަނީ ކުޑަ ހެންވޭރު އަތުން 5-0 ގެ ނަތީޖާއަކުން ބަލިވެފައެވެ.