އިނގިރޭސި އެފްއޭ ކަޕުގެ ތިންވަނަ ބުރުގައި ހަޑަސްފީލްޑް ޓައުން އަތުން ފަސޭހަކަމާއެކު މޮޅުވެ، މުބާރާތުގެ ހަތަރުވަނަ ބުރުގެ ޖާގައެއް މެންޗެސްޓާ ސިޓީން ހޯދައިފިއެވެ.
އަމިއްލަ ދަނޑުގައި ކުޅުނު މެޗުން ސިޓީ މޮޅުވީ 5-0 ގެ ތަފާތު ބޮޑު ނަތީޖާއަކުންނެވެ.
މި މެޗުގައި ސިޓީން މޮޅު ކުޅުމެއް ދެއްކިއިރު، އެ ޓީމުން ލީޑު ނަގާފައިވަނީ މެޗުގެ 33 ވަނަ މިނެޓުގައެވެ. މި ލަނޑު ކާމިޔާބުކޮށްދިނީ ފިލް ފޯޑެންއެވެ. އަދި އޭގެ ހަތަރު މިނެޓު ފަހުން ހޫލިއަން އަލްވަރޭޒް ވަނީ ސިޓީގެ ލީޑު ފުޅާކޮށްދީފައެވެ. މި މެޗުގައި ސިޓީން ކާމިޔާބުކުރި ތިންވަނަ ލަނޑު މެޗުގެ 58 ވަނަ މިނެޓުގައި ފެނިގެންދިޔައިރު، މިއީ ހަޑަސްފީލްޑުގެ ބެން ޖެކްސަން އަތުން ބައިކޮޅަށް ވަން ލަނޑެކެވެ. އަދި މެޗުގެ 65 ވަނަ މިނެޓުގައި ފޯޑެން ވަނީ ސިޓީއަށް އިތުރު ލަނޑެއް ޖަހައިދީފައެވެ.
މި މެޗުގައި ސިޓީން ކާމިޔާބުކުރި ފަހު ލަނޑު މެޗުގެ 74 ވަނަ މިނެޓުގައި ކާމިޔާބުކޮށްދިނީ ޖެރެމީ ޑޮކޫއެވެ. މި ލަނޑު އޭނާ ކާމިޔާބުކުރި ބަދަލަކަށް ކުޅެން އެރި ޓީމުގެ ކެޕްޓަން ކެވިން ޑި ބްރޭނާ ތަނަވަސްކޮށްދިން ފުރުސަތަކުންނެވެ. މި މެޗުގެ ދެވަނަ ހާފުގައި ޑި ބްރޭނާ ކުޅުން ނުކުތްއިރު، މިއީ 149 ދުވަހަށްފަހު، އަނިޔާއިން ރަނގަޅުވެ އޭނާ ކުޅުނު ފުރަތަމަ މެޗެވެ.
ރޭގެ މެޗުން މޮޅުވެ ސިޓީ ހަތަރުވަނަ ބުރަށް ދަތުރުކުރިއިރު، ތިންވަނަ ބުރުގައި ރޭ ޕްރިމިއާ ލީގުގެ ތިން ޓީމެއް ވަނީ ކުޅުނު މެޗުތައް އެއްވަރުވެ، ރީޕްލޭއަކަށް ދާން ޖެހިފައެވެ. އެގޮތުން ލޫޓަން ކުޅުނު މެޗުން ވަނީ ބޯލްޓަންއާ ލަނޑެއް ނުޖެހި އެއްވަރުވެފައެވެ. އަދި ނޮޓިންހަމް ފޮރެސްޓް ވަނީ އަމިއްލަ ދަނޑުގައި ބްލެކްޕޫލާ 2-2 އިގެ ނަތީޖާއަކުން އެއްވަރުވެފައެވެ. އަދި ވެސްޓް ހޭމް ޔުނައިޓެޑް، އަމިއްލަ ދަނޑުގައި ބްރިސްޓޯލް ސިޓީއާ ބައްދަލުކުރި މެޗު ނިމުނީ 1-1 އިގެ ނަތީޖާއަކުން އެއްވަރުވެގެންނެވެ.