އިނގިރޭސި އެފްއޭ ކަޕުގެ ތިންވަނަ ބުރުގައި އާސެނަލް ބަލިކޮށް، މުބާރާތުގެ ހަތަރުވަނަ ބުރުގެ ޖާގައެއް ލިވަޕޫލުން ހޯދައިފިއެވެ.
އާސެނަލުގެ ދަނޑުގައި ކުޅުނު މެޗުން ލިވަޕޫލް މޮޅުވީ 2-0 ގެ ނަތީޖާއަކުންނެވެ.
ރޭގެ މަޗަށް ލިވަޕޫލް ނުކުމެފައިވަނީ މުހިންމު ގިނަ ކުޅުންތެރިންތަކެއް ނުލައެވެ. އެގޮތުން އަނިޔާގެ ސަބަބުން ޓީމުގެ ކެޕްޓަން ވާޖިލް ވެން ޑައިކާއި، އެންޑީ ރޮބަޓްސަން އަދި ޑޮމިނިކް ސޮބޯސްލާއި ކުޅެފައި ނުވާއިރު، އެފްރިކާ ކަޕް އޮފް ނޭޝަންސްއަށް ދިޔަ މިސްރުގެ ފޯވާޑް މުހައްމަދު ސަލާހު އާއި އޭޝިއަން ކަޕުގައި ވާދަކުރުމަށް ދިޔަ ޖަޕާނުގެ ކެޕްޓަން އެންޑޯވެސް ހިމެނެއެވެ.
މި މެޗުގެ ފުރަތަމަ ހާފުގައި އާސެނަލުން މޮޅު ކުޅުމެއް ދެއްކިއިރު، އެ ޓީމުގެ ކެޕްޓަން މާޓިން އޮޑެގާޑް ފޮނުވާލި ހަމަލާއެއް ވަނީ ގޯލުގެ ހުރަސް ދަނޑިއަށް އަމާޒުވެފައެވެ. އަދި މި ހާފުގައި ލިވަޕޫލުގެ ކެޕްޓަން ބޭންޑް އަޅައިގެން ކުޅުނު ޓްރެންޓް އަލެކްސަންޑާ-އާނޯލްޑް ފޮނުވާލި ހަމަލާއެއްވެސް ވަނީ ހުރަސް ދަނޑިއަށް އަމާޒުވެފައެވެ.
މި މެޗުގެ ދެވަނަ ހާފުގައި ލިވަޕޫލުން ބަދަލުތަކެއް ގެނައިރު، އެ ޓީމުން ލީޑު ނަގާފައިވަނީ މެޗުގެ 80 ވަނަ މިނެޓުގައެވެ. ހިލޭ ޖެހުމަކުން އާނޯލްޑް އޭތިއާ ތެރެއަށް ނަގައިދިން ބޯޅަ ގޯލަށް ވަނީ އާސެނަލުގެ ޑިފެންޑަރު ޔަކޫބް ކީވިއޯ ބޮލުގައި ޖެހިފައެވެ. އަދި މެޗުގެ އިތުރު ވަގުތުގައި ޑިއޯގޯ ޖޮޓާ ދިން ބޯޅައަކުން ލުއިޒް ޑިއާޒް ވަނީ ލިވަޕޫލުގެ ލީޑު ފުޅާކޮށްދީފައެވެ.
މި މެޗުން އާސެނަލް ބަލިވިއިރު، މި ފަހުން އެ ޓީމުގެ ފޯމު ވަނީ ދަށްވެފައެވެ. އެގޮތުން އެންމެ ފަހުން ކުޅުނު ހަތް މެޗުގެ ތެރެއިން އާސެނަލް މޮޅުވެފައިވަނީ އެންމެ މެޗަކުންނެވެ.