ކުލަބު ވެލެންސިއާގެ ޗެއާމަންކަމުގެ މަގާމުން އަބްދުالله އަޒްމީން ވަކިކުރަން އެ ކުލަބުގެ ބޯޑުން ނިންމައިފިއެވެ.
މައުލޫމާތު ލިބޭ ގޮތުގައި ވެލެންސިއާގެ ބޯޑުން އެގޮތަށް ނިންމާފައިވަނީ މިދިޔަ ޑިސެމްބަރު މަހުގެ 26 ވަނަ ދުވަހު ބޭއްވި އެ ކުލަބުގެ ބޯޑު މެންބަރުންގެ ބައްދަލުވުމުގައެވެ. އެ ބައްދަލުވުމުގައި އަަޒްމީނުގެ އިތުބާރު ނެތްކަމަށް ފާސްކުރިއިރު، އެރޭގެ ވަގުތެއްގައި ޗެއާމަންކަމުން އަޒްމީން އިސްތިއުފާދިން ކަމަށް އެ ކުލަބުން ވަނީ ބުނެފައެވެ.
މިކަން ހާމަކޮށް ވެލެންސިއާއިން ވަނީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް ސިޓީއެއް ފޮނުވާފައެވެ. އަދި އެ ސިޓީއާއެކު އެ ކުލަބުގެ ބޯޑު މެންބަރުން ބޭއްވި ބައްދަލުވުމުގެ ޔައުމިއްޔާވެސް ހުށަހަޅާފައިވާ ކަމަށް އެފްއޭއެމުގެ އެކްޓިން ޖެނެރަލް ސެކްރެޓަރީ މުޙައްމަދު ޖައުޝަން ޝަރީފް (ޖައު) ވަނީ ވިދާޅުވެފައެވެ.
މި މަހުގެ 31 ވަނަ ދުވަހު އެފްއޭއެމުގެ އިންތިޚާބު ބާއްވަން ތާވަލުކޮށްފައިވާއިރު، ވެލެންސިއާއިން ވަނީ އިންތިޚާބުގައި ވާދަކުރާ ދެ ކެންޑިޑޭޓުން ކަމަށްވާ އެފްއޭއެމުގެ ކުރީގެ ރައީސް އަދި ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަޙްމަދު ތޯރިގު (ޓޮމް) އާއި މިހާރުގެ ރައީސް ބައްސާމް އަދީލް ޖަލީލުގެ ހިންގާ ކޮމިޓީގެ މެންބަރު އަދި ކުލަބު އީގަލްސްގެ ވައިސް ޗެއާމަން މުފާވިޒު ހާޝިމް (މުފާ) އަށްވެސް ތާއީދު ސިޓީއެއް ދީފައެވެ.
އޭގެ ތެރެއިން ތޯރިގަށް ތާއީދު ސިޓީ ދީފައިވަނީ އަޒްމީން ސޮއިކުރައްވައެވެ. އަދި މުފާ އަތުގައި އޮތް ސިޓީއަކީ ވެލެންސިއާގެ ވައިސް ޗެއާމަން އިލްމާއު ހުސެއިން ސޮއިކުރައްވާފައިވާ ސިޓީ އެކެވެ. މައުލޫމާތު ލިބިފައިވާ ގޮތުގައި އަޒްމީނުގެ އިތުބާރު ނެތް ކަމަށް ސޮއިކުރެއްވި މެންބަރުންގެ ތެރޭގައި އިލްމާއުގެ އިތުރުން ހަސަން ވަހީދު (ދޮނާ) އަދި ޔޫސުފް ރަމީޒް ހިމެނެއެވެ.
މި މައްސަލައާ ގުޅިގެން ރޭ ނެރުނު ބަޔާނެއްގައި އަޒްމީން ވިދާޅުވީ ވެލެންސިއާގެ ޗެއާމަންގެ މަގާމުން އިސްތިއުފާދީފައިނުވާނެ ކަމަށާއި އެފްއޭއެމުގެ އިންތިޚާބާ ދިމާކޮށް ބަޔަކު އުޅެނީ އޭނާގެ ނަން ހަޑިކުރަން ކަމަށެވެ. އަދި ވެލެންސިއާގެ އީމެއިލް މެދުވެރިކޮށް، އެފްއޭއެމުގެ އެކްޓިން ޖެނެރަލް ސެކްރެޓަރީއަށް ފޮނުވާފައިވާ އިސްތިއުފާގެ ސިޓީއަކީ ސައްހަ ނޫން ސިޓީއެއް ކަމަށާއި، އިތުބާރު ނެތް ކަމަށް ފާސްކުރި ކަމަށް ބުނާ ކަންކަމުގައި އިޖުރާތެއް ފުރިހަމަކޮށްފައި ނުވާއިރު، އެއީ ހަގީގަތެއް ނޫން ކަމަށްވެސް ވަނީ ވިދާޅުވެފައެވެ. އަދި އޭގެ އިތުރުން ވެލެންސިއާގެ ބޯޑުގެ ނިންމުމާ ދެކޮޅަށް ތޯރިގަށް ސިޓީއެއް ދިން ކަމަށް ބުނާ ވާހަކަ އަޒްމީން ވަނީ ދޮގުކުރައްވާފައެވެ.
ވެލެންސިއާއިން އެފްއޭއެމުގެ އިންތިޚާބުގައި ވާދަކުރައްވާ ދެ ކެންޑިޑޭޓުންނަށް ތާއިދުކޮށް ސިޓީއެއް ދީފައި އޮތުމުން، އެ މައްސަލައިގައި ގޮތެއް ނިންމުމަށް ދުނިޔޭގެ ފުޓްބޯޅައިގެ މައި ޖަމުއިއްޔާ ފީފާ އާއި އޭޝިއާގެ ފުޓްބޯޅައިގެ މައި އިދާރާ އޭއެފްސީގެ ލަފަޔަކަށް އެފްއޭއެމުން ވަނީ އެދިފައެވެ.
އެފްއޭއެމުގެ އިންތިޚާބާ ގުޅޭ ގިނަ މަސައްލަތަކެއް ފެންމަތިވެފައިވާއިރު، ދާދި ފަހުން ކޮމިޝަނަރ އޮފް ސްޕޯޓްސް މުޙައްމަދު ޠަލާލް ވަނީ އިންތިޚާބުގެ ކަންކަން ކުރިއަށް ނުގެންގޮސް ހުއްޓާލުމަށް އަންގާފައެވެ. އެގޮތަށް އެންގީ ސުވާލު އުފެދޭ ކަންތައްތަކެއް ހުރުމުން ކަމަށް ވަނީ ބުނެފައެވެ. ނަމަވެސް އެފްއޭއެމުގެ އިންތިޚާބުގެ ކަންކަން ހުއްޓާލާފައިނުވާ ކަމަށް ޖައުޝަން ވަނީ ވިދާޅުވެފައެވެ.