އިނގިރޭސި އެފްއޭ ކަޕުގެ ތިންވަނަ ބުރުގައި ޕްރެސްޓަން ނޯތު އެންޑް ބަލިކޮށް، މުބާރާތުގެ ހަތަރުވަނަ ބުރުގެ ޖާގައެއް ޗެލްސީން ހޯދައިފިއެވެ.
އަމިއްލަ ދަނޑުގައި ރޭ ކުޅުނު މެޗުން ޗެލްސީ މޮޅުވީ ފަސޭހަކަމާއެކު 4-0 ގެ ނަތީޖާއަކުންނެވެ.
މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް ދެވަނަ ހާފު ފަށައިގެން 13 ވަނަ މިނެޓުގައި ޗެލްސީން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ އަރްމާންޑޯ ބްރޯޖާއެވެ.
އަދި މެޗުގެ 66 ވަނަ މިނެޓުގައި ކޯލް ޕާމާ ނެގި ކޯނަރަކުން ތިއާގޯ ސިލްވާ ވަނީ ބޮލުން ލަނޑެއް ޖަހައި، ޗެލްސީގެ ލީޑު ފުޅާކޮށްދީފައެވެ. އޭގެ ތިން މިނެޓު ފަހުން ހިލޭ ޖެހުމަކުން ޗެލްސީގެ ތިންވަނަ ލަނޑު ޖަހައިދިނީ ރަހީމް ސްޓާލިންއެވެ.
މި މެޗުގައި ޗެލްސީން ކާމިޔާބުކުރި ފަހު ލަނޑު މެޗު ނިމެން ފަސް މިނެޓަށް ވެފައި ވަނިކޮށް ސްޓާލިން ދިން ބޯޅަައަކުން ކާމިޔާބުކޮށްދިނީ އެންޒޯ ފެނާންޑޭޒްއެވެ. މި ލަނޑު ބަލައިގަންނަން ނިންމާފައިވަނީ ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހުއެވެ.
މި މޮޅާއެކު މުބާރާތުގެ ހަތަރުވަނަ ބުރުގެ ޖާގައެއް ޗެލްސީން ހޯދިއިރު، ހަތަރުވަނަ ބުރުގެ މެޗުތައް ކުޅުމަށް ހަމަޖެހިފައިވަނީ މި މަހުގެ ފަހުކޮޅެވެ. މި މުބާރާތުގެ ތިންވަނަ ބުރުގައި ރޭ ކުޅުނު އެހެން މެޗުތަކަށް ބަލާލާއިރު، ސަންޑަލެންޑް އަތުން 3-0 ގެ ނަތީޖާއަކުން މޮޅުވެ ހަތަރުވަނަ ބުރުގެ ޖާގައެއް ނިއުކާސަލް ޔުނައިޓެޑުން ވަނީ ހޯދާފައެވެ. އަދި ކިއުޕީއާރް އަތުން 3-2 ގެ ނަތީޖާއަުން ބޯންމަތު މޮޅުވިއިރު، މިލްވޯލް ދަނޑުގައި ލެސްޓާ ސިޓީ ވަނީ 3-2 ގެ ނަތީޖާއަކުން މޮޅުވެފައެވެ. އަދި މީގެ އިތުރުން ޝެފީލްޑް ޔުނައިޓެޑުން ވަނީ 4-0 ގެ ނަތީޖާއަކުން ގިލިންހަމް ބަލިކޮށް، ހަތަރުވަނަ ބުރުގެ ޖާގައެއް ކަށަވަރުކޮށްފައެވެ.