އިނގިރޭސި އެފްއޭ ކަޕުގެ ތިންވަނަ ބުރުގައި ބާންލީ ބަލިކޮށް، މުބާރާތުގެ ހަތަރުވަނަ ބުރުގެ ޖާގައެއް ޓޮޓްނަމް ހޮޓްސްޕާއިން ހޯދައިފިއެވެ.
އަމިއްލަ ދަނޑުގައި ރޭ ކުޅުނު މެޗުން ޓޮޓްނަމް މޮޅުވީ 1-0 ގެ ނަތީޖާއަކުންނެވެ.
މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ޓޮޓްނަމުންނެވެ. އެގޮތުން މުޅި މެޗުގައި އެ ޓީމުން ވަނީ ބާންލީގެ ގޯލާ އަމާޒުކޮށް އަށް ހަމަލާއެއް އުފައްދާފައެވެ. އެކަމަކު މި މެޗުގައި ބާންލީއަށް، ޓޮޓްނަމުގެ ގޯލާ އަމާޒުކޮށް ފޮނުވާލެވުނީ އެންމެ ހަމަލާއެކެވެ.
މި މަހު ފަށާ އޭޝިއަން ކަޕުގައި ވާދަކުރުމަށް ދެކުނު ކޮރެއާއާ ގުޅެފައިވާ ކުލަބުގެ ކެޕްޓަން ސޮން ހެއުން-މިން ނެތި ޓޮޓްނަމުން ކުޅުނު މި މެޗުގައި އެ ޓީމަށް ލިބުނު ގިނަ ފުރުސަތުތަކުގެ ބޭނުން ހިފިފައެއް ނުވެއެވެ. އެކަމަކު މެޗުގެ 78 ވަނަ މިނެޓުގައި ޓޮޓްނަމުން ވަނީ ލީޑު ނަގާފައެވެ. އޭރިއާ ބޭރުން ފޮނުވާލި ބާރު ހަމަލާއަކުން މި ލަނޑު ކާމިޔާބުކޮށްދިނީ ސްޕެއިނުގެ ޑިފެންޑަރު ޕެޑްރޯ ޕޮރޯއެވެ.
މި މޮޅާއެކު މުބާރާތުގެ ހަތަރުވަނަ ބުރުގެ ޖާގައެއް ޓޮޓްނަމުން ހޯދިއިރު، ހަތަރުވަނަ ބުރުގެ މެޗުތައް ކުޅުމަށް ހަމަޖެހިފައިވަނީ މި މަހުގެ ފަހުކޮޅެވެ. މި މުބާރާތުގެ ތިންވަނަ ބުރުގައި ރޭ ކުޅުނު އެހެން މެޗުތަކަށް ބަލާލާއިރު، ބްރެންޓްފަޑާއި ވުލްވްސް ބައްދަލުކުރި މެޗު ވަނީ 1-1 ގެ ނަތީޖާއަކުން އެއްވަރުވެފައެވެ. އަދި ފުލަމުން ވަނީ 1-0 ގެ ނަތީޖާއަކުން ރޮތަރަމް ޔުނައިޓެޑް ބަލިކޮށް، ހަތަރުވަނަ ބުރުގެ ޖާގައެއް ހޯދާފައެވެ.