ގައުމީ ވޮލީ ލީގުގެ ޗެމްޕިއަންކަން ސިފައިންނަށް

މައިލޯ ގައުމީ ވޮލީބޯޅަ ލީގު 2023 ގެ ފަހު މެޗުގައި ޕޮލިސް ކުލަބު ބަލިކޮށް، ދިވެހި ސިފައިންގެ ކުލަބުން ލީގު ޗެމްޕިއަންކަން ހޯދައިފިއެވެ.

މިއީ ރާއްޖޭގެ އެންމެ މަތީ ފަންތީގެ ވޮލީގައި ސިފައިން ހޯދި 18 ވަނަ ތަށްޓެވެ. އެ ޓީމުން އެންމެ ފަހުން ގައުމީ ވޮލީ ލީގު ކާމިޔާބުކޮށްފައިވަނީ 2019 ވަނަ އަހަރެވެ.

ސިފައިންގެ ކުލަބުން ލީގު ޗެމްޕިއަންކަން ހޯދީ ހަތަރު މެޗުން މޮޅުވެ 13 ޕޮއިންޓާއެކުގައެވެ. ދެވަނައަށްދިޔަ ސިޓީ ސްޕޯޓްސް ކުލަބަށް ނުވަ ޕޮއިންޓް ލިބުނުއިރު، އެ ޓީމުވެސް ވަނީ ހަތަރު މެޗުން މޮޅުވެފައެވެ. އަދި ތިންވަނައަށް ދިޔަ ކުލަބު އާބަންކޯ އާއި ހަތަރުވަނައިގައި ނިންމި ކުލަބު ވެމްކޯ ވަނީ ފަސް މެޗުގެ ތެރެއިން ތިން މެޗުން މޮޅުވެފައެވެ.

ޒުވާނުންގެ މަރުކަޒުގެ އެތެރޭ ކޯޓުގައި ރޭ ކުޅުނު ލީގުގެ ފަހު މެޗުން ސިފައިން މޮޅުވީ ޕޮލިސް އަތުން ފަސޭހަކަމާއެކު ސީދާ ތިން ސެޓުންނެވެ. މި މެޗުގެ ސެޓުތައް ސިފައިން ގެންިދިޔައީ 25-10, 25-19 އަދި 25-15 އިންނެވެ. ފައިނަލް މެޗުގެ މޮޅު ކުޅުންތެރިއަކީ ސިފައިންގެ ކުލަބުގެ ބިދޭސީ ކުޅުންތެރިޔާ ހަމަދު މުޙައްމަދެވެ.

ލީގުގެ ދެވަނަ އެސޯސިއޭޝަން ކަޕުގެ ޗެމްޕިއަންކަން ހޯދި ސިޓީ ސްޕޯޓްސް ކުލަބުން ކަށަވަރުކުރީ އިއްޔެ ހަވީރު ކުޅުނު މެޗުގަ ވެމްކޯ އަތުން 3-2 ސެޓުން މޮޅުވެގެންނެވެ. މުޅިން އަލަށް ވާދަކުރާ ސިޓީން މި މެޗުގެ ފުރަތަމަ ސެޓު 25-21 އިން ކާމިޔާބުކުރި ނަމަވެސް، ވެމްކޯއިން ވަނީ އަނެއް ދެ ސެޓު 26-24 އަދި 25-22 އިން ގެންގޮސްފައެވެ. އެކަމަކު ފަހު ދެ ސެޓު 25-21 އަދި 15-13 އިން ކާމިޔާބުކޮށް، ސިޓީ ސްޕޯޓްސް ވަނީ މި މެޗުން މޮޅުވެފައެވެ.

ގައުމީ ލީގުގެ އެންމެ މޮޅު ސެޓަރަކީ ސިފައިންގެ ކުލަބުގެ ހުސެއިން ޝާހިދެވެ. އެންމެ މޮޅު މިޑްލް ބޮލޮކަރަކަށް ވެމްކޯގެ ހުސެއިން ޔޫސުފް ހޮވުނުއިރު, ސެކަންޑް ބެސްޓް މިޑްލް ބްލޮކަރަކަށް ހޮވުނީ ސިޓީގެ އަޙްމަދު ފާޒިލެވެ. އެންމެ މޮޅު އައުޓްސައިޑް އެޓޭކަރަކަށް އާބަންކޯގެ އިސްމާއޢީލް ސާޖިދު (ކުޑަކާއްޓޭ) ހޮވުނުއިރު, ސެކަންޑް ބެސްޓް އައުޓްސައިޑް އެޓޭކަރަކަށް ހޮވުނީ ވެމްކޯގެ އަލީ ހުޒާމް (ހުޒާންޓޭ) އެވެ.

އެންމެ މޮޅު އޮޕޮސިޓް ޕްލޭޔަރަކަށް ސިފައިންގެ އަޙްމަދު އަބްދުލް ކަރީމް (ލޯންގޭ) ހޮވުނުއިރު, އެންމެ މޮޅު ލިބަރޯއަކަށް ހޮވުނީ ވެމްކޯގެ އަޙްމަދު ނަބީލެވެ. އަދި އެންމެ އުއްމީދީ ކުޅުންތެރިޔަކީ ސްޕޯޓްސް ކުލަބު ސިޓީގެ އަޙްމަދު އިސާމެވެ. އަދި އެންމެ މޮޅު ކޯޗަކީ ސިފައިންގެ ކޯޗު ޖުނައިދު އަބްދުاللهއެވެ. މީގެ އިތުރުން މުޅި މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ ސިފައިންގެ ކުލަބުގެ އާދަމް ނަސީމް (އެޑަމް) އެވެ.

މި ފަހަރުގެ ގައުމީ ލީގުގެ ފުލަށް ދިޔައީ ކުޅުނު ފަސް މެޗުންވެސް ބަލިވި ޕޮލިސް ކުލަބެވެ. އެއާއެކު ޕޮލިސް ކުލަބުގެ ނަމުގައި 2005 ވަނަ އަހަރުން ފެށިގެން ވޮލީބޯޅައިގެ އެންމެ މަތީ ފަންތީގައި ވާދަކުރަމުން އަންނަ އެ ޓީމު ވަނީ ދެވަނަ ޑިވިޝަނަށް ރެލިގޭޓްވެފައެވެ. އެހެންކަމުން ދެން އެ ޓީމުން ލީގުގެ ޖާގައެއް ހޯދަން ޖެހޭނީ، އެސޯސިއޭޝަން ކަޕުގެ ޕްރިލިމިނަރީ ބުރުން ފެށިގެންނެވެ.