ބަންގްލަދޭޝަށް ހިޖުރަ ކޮށްފައިވާ ރޮހިންޔާ ދަރިކޮޅުގެ ރެފިއުޖީންނަށް ކާބޯތަކެތި ފޯރުކޮށްދިނުމަށް ކުރާ ޚަރަދު އިތުރު ކުރަން އދން ނިންމައިފިއެވެ. އދގެ އިދާރާއެއް ކަމުގައިވާ ދުނިޔޭގެ ކާބޯތަކެއްޗާ ބެހޭ ޕުރޮގުރާމުން ބުނީ ބަންގްލަދޭޝްގައި ދިރިއުޅޭ ރެފިއުޖީންނަށް ކާބޯތަކެތި ފޯރުކޮށްދިނުމަށް މަހެއްގެ މައްޗަށް ބޮލަކަށް ހޭދަކުރާ މިންވަރު 10 އެމެރިކާ ޑޮލަރަށް އިތުރު ކުރަން ނިންމާފައިވާ ކަމުގައެވެ. މީގެ ކުރިން އެ މީހުންނަށް ކާންދޭން މަހެއްގެ މައްޗަށް ބޮލަކަށް ހޭދަ ކުރަނީ 8 އެމެރިކާ ޑޮލަރެވެ.
ރޮހިންޔާ ދަރިކޮޅުގެ ރެފިއުޖީންނަށް ކާބޯތަކެތި ފޯރުކޮށްދޭން ހޭދަކުރާ މިންވަރު އދން ދަށްކޮށްފައި ވަނީ ހުސްވި އަހަރު އެ ކަމަށް ބޭނުންވާ މާލީ އެހީތެރިކަން ނުލިބުމުގެ ސަބަބުންނެވެ. އެ އަހަރު ރެފިއުޖީންނަށް ކާބޯތަކެތި ފޯރުކޮށްދިނުމަށް އދއަށް އެހީގެ ގޮތުގައި ލިބިފައި ވަނީ 876 މިލިޔަން އެމެރިކާ ޑޮލަރެވެ. ނަމަވެސް، ޖަނަވަރީ 1 ވަނަ ދުވަހުން ފެށިގެން މަހެއްގެ މައްޗަށް ބޮލަކަށް ކުރާ ހޭދަ 10 ޑޮލަރަށް އިތުރު ކޮށްފައިވާ ކަމުގައި ދުނިޔޭގެ ކާބޯތަކެއްޗާ ބެހޭ ޕުރޮގުރާމުން ބުނެއެވެ.
ރޮހިންޔާއިންނަކީ މިޔަންމާގެ ރާކައިން ސްޓޭޓްގައި ދިރިއުޅޭ މުސްލިމް ދަރިކޮޅަކަށް ނިސްބަތްވާ ބައެކެވެ. 2017 ވަނަ އަހަރު އޭގެ ތެރެއިން މިލިޔަނަކަށް ވުރެ ގިނަ މީހުން ބަންގްލަދޭޝަށް ހިޖުރަ ކޮށްފައި ވަނީ މިޔަންމާގެ އަސްކަރީ ސަރުކާރުން އެ މީހުންނާ ދެކޮޅަށް ހިންގަމުންދާ ލާއިންސާނީ ޖަރީމާތަކުން ސަލާމަތްވުމަށެވެ. އެ މީހުން މިހާރު ދިރިއުޅެމުން ދަނީ ބަންގްލަދޭޝްގެ ކޮކްސް ބާޒާރުގައި ހަދާފައިވާ ވަގުތީ ކޭމްޕެއްގައެވެ.
"ރޮހިންޔާ ދަރިކޮޅުގެ މީހުންނަށް ކާބޯތަކެތި ފޯރުކޮށްދޭން ހުސްވި އަހަރު ބޮޑެތި ގޮންޖެހުންތަކެއް ކުރިމަތިވި. ކާބޯތަކެތި މަދުވެ، އެ މީހުންނަށް އިތުރު ނިކަމެތިކަމާ ކުރިމަތިލާން ޖެހުނު. މިއީ ވަރަށް ކަންބޮޑުވާ މައްސަލައެއް. ނަމަވެސް، އެހީދޭ ޖަމާޢަތްތަކުގެ ދީލަތި އެހީއާ އެކު، ރެފިއުޖީންނަށް އިތުރު ކާބޯތަކެތި ފޯރުކޮށްދިނުމުގެ މަގުފަހިވެފައިވާ ކަން ފާހަގަ ކޮށްލަން،" ބަންގްލަދޭޝްގައި ހުންނަވާ ދުނިޔޭގެ ކާބޯތަކެއްޗާ ބެހޭ ޕުރޮގުރާމުގެ ޑިރެކްޓަރ ދޮމޭނިކޯ ސްކަލޭލީ ވިދާޅުވިއެވެ.
ބަންގްލަދޭޝްގެ ރެފިއުޖީންނާ ބެހޭ ކޮމިޝަނަރު މުޙައްމަދު މީޖާނުއްރަޙްމާން ވިދާޅުވީ، ކޮކްސް ބާޒާރުގައި ދިރިއުޅޭ ރެފިއުޖީންނަށް އިތުރު ކާބޯތަކެތި ފޯރުކޮށްދޭން މަސައްކަތް ކުރަމުންދާ ކަމުގައެވެ. އަދި އަމާޒަކީ، ކޮންމެ ރެފިއުޖީއަކަށް މަހެއްގެ މައްޗަށް ކުރާ ހޭދަ 12.5 ޑޮލަރަށް އިތުރު ކުރުން ކަމުގައެވެ. ހުސްވި އަހަރު އދގެ ބަޖެޓު ދަށްވުމާ ގުޅިގެން ރޮހިންޔާ ދަރިކޮޅުގެ ކުޑަކުދިންނަށް އިތުރު ނިކަމެތިކަން ކުރިމަތިވެފައިވާ ކަމުގައި ވެސް އޭނާ ވިދާޅުވިއެވެ.
ކޮކްސް ބާޒާރުގައި ވެސް ރޮހިންޔާ ދަރިކޮޅުގެ މުސްލިމުންނަށް ކުރިމަތިލާން ޖެހިފައި ވަނީ ދަތި ދިރިއުޅުމަކާއެވެ. އެ ކަމުން ސަލާމަތްވާން، އެތަކެއް ހާސް ރެފިއުޖީންނެއް އެހެން ޤައުމުތަކަށް ހިޖުރަކޮށްފައިވެއެވެ. އެ ގޮތުން، ހުސްވި އަހަރުގެ ނޮވެންބަރު މަހުގެ 30 ވަނަ ދުވަހާ ހަމައަށް 3,468 ރެފިއުޖީން ބަންގްލަދޭޝް ދޫކޮށް ދޯނިފަހަރުގައި ފުރާފައިވާ ކަމުގައި ދުނިޔޭގެ ކާބޯތަކެއްޗާ ބެހޭ ޕުރޮގުރާމުން ބުނެއެވެ. އޭގެ ތެރެއިން ގިނަ ޢަދަދެއްގެ ބަޔަކު ދަތުރު ކޮށްފައި ވަނީ އިންޑޮނީޝިޔާއާއި މެލޭޝިޔާއަށެވެ.
އދން ބުނީ ރޮހިންޔާ ރެފިއުޖީންނަށް ކާބޯތަކެތި ފޯރުކޮށްދޭން މަހެއްގެ މައްޗަށް ބޮލަކަށް ކުރާ ހޭދަ 12.5 ޑޮލަރަށް މަތިކުރުމަށް، އިތުރު 61 މިލިޔަން އެމެރިކާ ޑޮލަރު އެހީގެ ގޮތުގައި ބޭނުންވާ ކަމުގައެވެ. އަދި، އެ ފައިސާ ފޯރުކޮށްދިނުމަށް އދން ވަނީ އެހީދޭ ޤައުމުތަކާއި ބައިނަލްއަޤުވާމީ ޖަމުޢިއްޔާތަކަށް ގޮވައިލާފައެވެ.