ސަރަޙައްދީ ރޮނގު ހުރަސްކޮށް ޔަހޫދީ ސިފައިން ލުބްނާނަށް އަރައި ހިންގި ޢުދުވާންތަކެއްގައި އެ ޤައުމުގައި ހަރަކާތްތެރިވާ ހަތިޔާރު އެޅި ޙިޒްބުالله ޖަމާޢަތަށް ނިސްބަތްވާ ހަތަރު މީހުން ޝަހީދުކޮށްލައިފިއެވެ.
ޙިބްޒުاللهން ބުނީ ސަރަޙައްދީ ރޮނގު ހުރަސްކޮށް ޔަހޫދީން ސިފައިން އަރާފައި ވަނީ ލުބްނާނުގެ ދެކުނުގައިވާ ރަށެއް ކަމުގައިވާ ކަފްރަކްލާއަށް ކަމުގައެވެ. އެ ރަށަށް އަރައި ޔަހޫދީ ސިފައިން ހިންގި އަސްކަރީ ޙަރަކާތުގައި ޙިޒްބުاللهގެ ހަތަރު މީހުން ޝަހީދު ކޮށްލާފައިވާކަން އެ ޖަމާޢަތުން ވަނީ ކަށަވަރު ކޮށްދީފައެވެ. ނަމަވެސް، އެ ހާދިސާއާ ގުޅޭ އިތުރު މަޢުލޫމާތު އެ ޖަމާޢަތުން ހާމަކޮށްފައެއް ނުވެއެވެ.
ލުބްނާނުގެ ސަލާމަތީ ބާރުތަކުން ބުނީ ކަފްރަކްލާގައި ހުންނަ ޢާންމުން ދިިރިއުޅޭ ދެ ގެއަކަށް ޔަހޫދީ ސިފައިން ރޭޑު ޖަހައި ޙަމަލަދީފައިވާ ކަމުގައެވެ. ކަފްރަކްލާއަކީ ޙިޒްބުاللهން އަމަން ބަލަހައްޓާ ސަރަޙައްދެއްކަން ފާހަގަކޮށްލަން ޖެހެއެވެ.
އޮކްޓޫބަރު 7 ވަނަ ދުވަހު ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ލާއިންސާނީ ޢުދުވާނެއް ފެށުމާ ގުޅިގެން ޙިޒްބުالله ޖަމާޢަތުން ވަނީ ފަލަސްޠީނުގެ މުސްލިމުންގެ ދިފާޢުގައި ތެދުވެފައެވެ. އަދި، ލުބްނާނާ ގުޅޭ ސަރަޙައްދީ ރޮނގު ކައިރީގައި އޮންނަ ޔަހޫދީންގެ ރަށްތަކާއި އެ ސަރަޙައްދުގައި ހަރަކާތްތެރިވާ ޔަހޫދީ ފައުޖުގެ ސިފައިންނަށް ޙަމަލަދޭން ފަށާފައެވެ. އެ ޙަމަލަތަކުގެ ބޭނުމަކީ ޣައްޒާގައި ޔަހޫދީން ހިންގަމުންދާ ލާއިންސާނީ ޖަރީމާތަކަށް ހުއްޓައިލުމަށް ބާރުއެޅުމެވެ.
ޙިޒްބުاللهގެ އިތުރުން ޔަމަނުގައި ހަރަކާތްތެރިވާ ހަތިޔާރު އެޅި ހޫޘީ ޖަމާޢަތުން ވެސް ދަނީ ފަލަސްޠީނުގެ މުސްލިމުންގެ ހައްޤުގައި ޔަހޫދީންގެ އަމާޒުތަކަށް ޙަމަލަ ދެމުންނެވެ. މީގެ އިތުރުން އެ ޖަމާޢަތުން ދަނީ ރަތް ކަނޑު ހުރަސްކޮށް ޔަހޫދީންނަށް މުދާ އުފުލާ ބޯޓުފަހަރަށް ވެސް ޙަމަލަ ދެމުންނެވެ.
ޔަހޫދީ ފައުޖުން ވެސް ދަނީ ރައްދުގައި ލުބްނާނުގެ ރަށްތަކަށް ޙަމަލަ ދެމުންނެވެ. އެ ޙަމަލަތަކުގައި ޙިޒްބުالله ޖަމާޢަތުގެ 100 އެއްހާ ހަނގުރާމަވެރިން ޝަހީދު ކޮށްލާފައިވެއެވެ. ޔަހޫދީން ވަނީ ލުބްނާނުގެ 24 ވަރަކަށް ޢާންމު ރައްޔިތުން ވެސް ޝަހީދު ކޮށްލާފައެވެ. އޭގެ ތެރޭގައި މައުސޫމް ކުޑަކުދިންނާއި ޢުމުރުން ދުވަސްވީ މީހުންނާއި ނޫސްވެރިން ވެސް ހިމެނެއެވެ.
ޙިޒްބުاللهއަކީ 1982 ވަނަ އަހަރު އީރާނުގެ އިންޤިލާބީ ލަޝްކަރުން ފަހަތުގައި އޮވެގެން އުފައްދާފައިވާ ހަތިޔާރު އެޅި ޖަމާޢަތެކެވެ. އީރާނުން މިހާރު ވެސް ދަނީ އެ ޖަމާޢަތަށް ވާގިވެރިވެދެމުންނެވެ. އެ ޖަމާޢަތް އުފެއްދުމުގެ މައިގަނޑު މަޤުޞަދަކީ ޒަޔަނިސްޓު އިސްރާޢީލާއި، ޔަހޫދީންނަށް ވާގިވެރިވާ އެމެރިކާއާ ދެކޮޅަށް ހަނގުރާމަ ކުރުމެވެ.