ސަޢުދީ ޢަރަބިއްޔާގެ ކިންގް ސަލްމާން ހިއުމަނިޓޭރިއަން އެއިޑް އެންޑް ރިލީފް ސެންޓަރުން ޣައްޒާއަށް އެހީގެ 16 ގާފިލާ ފޮނުވައިފިއެވެ.
އެހީގެ ގާފިލާތަކުގައި ކާބޯތަކެއްޗާއި ޞިއްޚީ ފަރުވާއަށް ބޭނުންވާ ސާމާނާއި ބޯހިޔާވަހިކަމަށް ބޭނުންވާނެ ތަކެއްޗާއި އެ ނޫން ވެސް ޒަރޫރީ ބޭނުންތަކަށް ބޭނުން ކުރެވޭނެ ތަކެތި ފޯރުކޮށްދީފައިވެއެވެ. މިޞްރާއި ޣައްޒާ ގުޅޭ ރަފަޙް ރޮނގު ހުރަސްކޮށް ސަޢުދީ ރިލީފް ސެންޓަރުން ޣައްޒާއަށް މިހާތަނަށް 172 އެހީގެ ގާފިލާ ވަނީ ފޮނުވައިފައެވެ.
އޮކްޓޫބަރު މަހުގެ ހަތް ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާއަށް ދެމުންދާ ޢުދުވާނީ ޙަމަލާތަކުގައި މިހާތަނަށް 21،800 މީހުން ވަނީ ޝަހީދުކޮށްލައިފައެވެ. މެދުކެނޑުމެއްނެތި ދެމުންގެންދާ ޙަމަލާތަކުގެ ސަބަބުން ޣައްޒާގެ ޢާންމުން ވަނީ ކާބޯތަކެއްޗާއި ބޭހާއި ކަރަންޓަށް އަދި ބޯހިޔާވަހިކަމަށް ވެސް ޖެހިފައެވެ.
ކިންގް ސަލްމާން ހިއުމަނިޓޭރިއަން އެއިޑް އެންޑް ރިލީފް ސެންޓަރަކީ ޣައްޒާއަށް އެހީވުމަށް ސަޢުދީ ޢަރަބިއްޔާގެ ރަސްގެފާނު ސަލްމާނު ބިން ޢަބްދުލްޢަޒީޒާއި ވަލީއަޙުދު މުޙައްމަދު ބިން ސަލްމާންގެ ބެއްލެވުމުގެ ދަށުން ހިންގާ އެހީދޭ މަރުކަޒެކެވެ.