ޔޫކްރެއިންގެ ވެރިރަށް ކީވްއަށް އަމާޒުކޮށް ރަޝިޔާއިން އަނެއްކާ ވެސް ވައިގެ ޙަމަލާތަކެއް ދީފިއެވެ.
ރަޝިޔާގެ ޑްރޯން ޙަމަލާތައް ދިފާޢުކުރުމަށް ޔޫކްރެއިންގެ ވައިގެ ދިފާޢީ ނިޒާމްތައް ޙަރަކާތްތެރިވެފައިވެއެވެ. އެ ޙަމަލާތަކުގެ ސަބަބުން ލިބިފައިވާ ގެއްލުން މިހާތަނަށް ސާފެއް ނޫނެވެ. ކީވްގެ މޭޔަރު އިހްރު ތެރެހޯވް ވަނީ އެ ޙަމަލާގައި ޢާއްމުންގެ ގެދޮރަށް ލިބިފައިވާ ގެއްލުންތަކުގެ ފޮޓޯތައް ސޯޝަލް މީޑިއާގައި ޢާންމުކުރައްވައިފައެވެ.
މި އަހަރުގެ އެންމެ ފަހު ހަފުތާގައި ދެ ފަރާތުން ބަދަލުކުރަމުންދާ ޙަމަލާތައް ވަނީ އިތުރުވެފައެވެ. އެ ގޮތުން ރަޝިޔާގެ އަސްކަރިއްޔާއިން ކީވް ހިމެނޭހެން ޔުކްރެއިންގެ ބޮޑެތި އެހެން ރަށްތަކަށް ދިން ވަރުގަދަ މިސައިލް ޙަމަލާތަކުގައި ޢާންމުންގެ 31 މީހުން ވަނީ މަރައިލައިފިއެވެ. ކީވްގެ އިތުރުން ޔޫކްރެއިންގެ ހުޅަނގާއި ދެކުނުގައިވާ ރަށްތަކަށް ވެސް ރަޝިޔާއިން މިސައިލް ޙަމަލާތައް އަމާޒު ކޮށްފައިވެއެވެ. ގިނަ ޙަމަލާތައް އަމާޒުވެފައި ވަނީ ޢާންމުން ދިރިއުޅޭ ޢިމާރާތްތަކަށެވެ.
ރަޝިޔާއިން ދިން ޙަމަލާތައް އދގެ ސަލަމާތީ މަޖިލީހުން ވަނީ ކުށްވެރިކޮށްފައެވެ.