އިތުރު ތިން ޖާސޫސީ ސެޓެލައިޓް އަންނަ އަހަރު ޖައްވަށް ފޮނުވައިލުމަށް ތައްޔާރުވަމުންދާ ކަމަށް އުތުރު ކޮރެޔާއިން ބުނެފިއެވެ. އަދި އަސްކަރިއްޔާ ތަރައްޤީކުރުމަށް އިންސާނުންނާ ނުލައި ދަތުރުކުރާ ވައިގެ އުޅަނދުތައް އުފައްދަން ނިންމައިފައިވާ ކަމަށް ވެސް އެ ޤައުމުގެ ދަޢުލަތުގެ މީޑިޔާއިން ބުނެއެވެ.
"2023 ވަނަ އަހަރު ފުރަތަމަ ޖާސޫސީ ސެޓެލައިޓް ކާމިޔާބުކަމާއެކު ފޮނުވާލުމުގެ ތަޖުރިބާއަށް ބިނާކޮށް، 2024 ވަނަ އަހަރު އިތުރު ތިން ޖާސޫސީ ސެޓެލައިޓް ފޮނުވާލުމުގެ މަސައްކަތް އިޢުލާންކުރީ ޖައްވީ ސައިންސާއި ޓެކްނޮލޮޖީގެ ތަރައްޤީ ވަރުގަދައަށް ކުރިއެރުވުމަށް." އުތުރު ކޮރެޔާއިން އައު އަހަރަށް ކަނޑައަޅައި ސިޔާސަތުތައް ޢާންމުކޮށް ދަޢުލަތުގެ މީޑިޔާއިން ނެރެފައިވާ ރިޕޯޓެއްގައި ބުނެފައިވެއެވެ.
އުތުރު ކޮރެޔާއިން ސެޓެލައިޓް ފޮނުވައިލާނެ ކަމަށް ޢިޢުލާނުކޮށްފައި ވަނީ އެމެރިކާއިން މީގެ ކުރިން ނުފެންނަ ކުރިމަތިލުންތަކަކާ ދެކޮޅަށް ހަނގުރާމައިގެ ތައްޔާރީތައް އަވަސް ކުރުމަށް އުތުރު ކޮރެޔާގެ އެންމެ އިސްވެރިޔާ ކިމް ޖޮންގް އުން އެ ޤައުމުގެ އަސްކަރިއްޔާއަށް ޢަމުރު ކުރައްވައިފައިވަނިކޮށެވެ.
އުތުރު ކޮރެޔާއިން އެންމެ ފަހުން ޖައްވަށް ސެޓްލައިޓެއް ފޮނުވާލާފައި ވަނީ ނޮވެމްބަރު މަހުގެ 21 ވަނަ ދުވަހުއެވެ. އަދި އެ ސެޓެލައިޓް މިހާރު ބޭނުންކުރަން ފަށާފާއިވާ ކަމަށް ވެސް އެ ޤައުމުން ވަނީ ބުނެފައެވެ. އެ ސެޓެލައިޓް މެދުވެރިކޮށް އެމެރިކާގެ ވައިޓް ހައުސްއާއި ޕެންޓެގަންގެ އިތުރުން އަސްކަރީ މަރުކަޒުތަކާއި ދެކުނު ކޮރެޔާގެ އަމާޒުތަކުގެ ފޮޓޯ ނަގާފައިވާ ކަމަށް އުތުރު ކޮރެޔާއިން ބުނެއެވެ. ނަމަވެސް، އެ ފޮޓޯތައް ޢާންމުކޮށްފައެއް ނުވެއެވެ.
އެކަމާ ގުޅިގެން އެމެރިކާއާއި އޮސްޓްރޭލިޔާއާއި ޖަޕާނާއި ދެކުނު ކޮރެޔާއިން ވަނީ އުތުރު ކޮރެޔާއަށް ދެކޮޅަށް ދަތިކުރުމުގެ ފިޔަވަޅުތައް އަޅަން ފަށައިފައެވެ. ނޮވެމްބަރު މަހު ފޮނުވާލި ސެޓެލައިޓްގެ އެއްވެސް ފޮޓޯއެއް ޢާންމުކޮށްފައި ނުވާތީ، ސެޓެލައިޓްގެ ޤާބިލުކަމާމެދު ދިރާސާކުރާ ފަރާތްތަކުން ވަނީ ސުވާލު އުފައްދައިފައެވެ. އެ ސެޓެލައިޓް ފޮނުވައިލުމަށް އުތުރު ކޮރެޔާއަށް ރަޝިޔާގެ އެހީތެރިކަން ލިބިފައިވާ ކަމަށް ދެކުނު ކޮރެޔާއިން ބުނެއެވެ.