ފީފާ ކުލަބު ވޯލްޑް ކަޕުގެ ސެމީ ފައިނަލް ދެވަނަ މެޗުގައި އޭޝިއާގެ ޗެމްޕިއަން ޖަޕާނުގެ އުރަވާ ރެޑް ޑައިމަންޑްސް ބަލިކޮށް، ފައިނަލުގެ ފަހު ޖާގަ ޔޫރަޕުގެ ޗެމްޕިއަން މެންޗެސްޓާ ސިޓީން ހޯދައިފިއެވެ.
ސައުދީ އަރަބިއްޔާގެ ކިންގް އަބްދުﷲ ސްޕޯޓްސް ސިޓީގައި ރޭ ކުޅުނު މެޗު ސިޓީން ކާމިޔާބުކުރީ 3-0 ގެ ނަތީޖާއަކުންނެވެ.
މި މެޗުގައި ސިޓީން މޮޅު ކުޅުމެއް ދެއްކިއިރު، މެޗުގެ ފުރަތަމަ ހާފުގައި އެ ޓީމުން ވަނީ ލަނޑު ޖަހާނެ ގިނަ ފުރުސަތުތަކެއް ތަނަވަސްކޮށްފައެވެ. އެއާއެކު ފުރަތަމަ ހާފުގެ އިތުރު ވަގުތުގައި ސިޓީން ވަނީ ލީޑު ނަގާފައެވެ. މިއީ އުރަވާ ރެޑްސްގެ ޑިފެންޑަރު މާރިއަސް ހޮއިބްރޭޓެން އަތުން ބައިކޮޅަށް ވަން ލަނޑެކެވެ.
މި މެޗުގައި ސިޓީން ލީޑު ފުޅާކުރީ ދެވަނަ ހާފު ފަށައިގެން ހަތްވަނަ މިނެޓުގައެވެ. ކައިލް ވޯކާ ތަނަވަސްކޮށްދިން ފުރުސަތެއްގައި މި ލަނޑު އެ ޓީމަށް ކާމިޔާބުކޮށްދިނީ މިޑްފީލްޑަރު މަޓެއޯ ކޮވަސިޗެވެ. އަދި އޭގެ ހަތް މިނެޓު ފަހުން ސިޓީގެ ތިންވަނަ ލަނޑު ޖަހައިދިނީ މިޑްފީލްޑަރު ބެނާޑޯ ސިލްވާއެވެ.
މި މޮޅާއެކު މުބާރާތުގެ ފައިނަލަށް ސިޓީ ދަތުރުކުރިއިރު، ފައިނަލުގައި އެ ޓީމު ނުކުންނާނީ ބްރެޒިލުގެ ފްލުމިނެންސޭއާ ދެކޮޅަށެވެ. ފައިނަލުން ފްލުމިނެންސޭ ޖާގަ ހޯދީ ސެމީ ފައިނަލް ފުރަތަމަ މެޗުގައި މިސްރުގެ އަލް އަހްލީ ބަލިކުރުމަށްފަހުއެވެ. މި މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ މި މަހުގެ 22 ވަނަ ދުވަހުގެ ރޭއެވެ.