މި އަހަރަކީ ބިލިއާޑްގެ ހަޔާތުގައި އެންމެ ކާމިޔާބު އަހަރު ކަމަށާއި، އަމާޒަކީ ކުރިއަށް އޮތް އަހަރުވެސް އިތުރު ކާމިޔާބީތަކެއް ހޯދުން ކަމަށް މިއަހަރުގެ އެންމެ ފަހު ބިލިއާޑް މުބާރާތް ކަމަށްވާ 9 ބޯލް އެސޯސިއޭޝަން ކަޕުގެ ޗެމްޕިއަންކަން ހޯދި އަހުސަން ހާޝިމް ބުނެފިއެވެ.
ގައުމީ ބިލިއާޑް ސެންޓަރުގައި ކުރިއަށްދިޔަ މި މުބާރާތުގެ ޗެމްޕިއަންކަން އަހުސަން ހޯދީ ފައިނަލުގައި މުޙައްމަދު ދުންޔާޒާއި ވާދަކޮށް 5-11 ފްރޭމުން މެޗު ކާމިޔާބުކޮށްގެންނެވެ. ފައިނަލު ކުރިއަށްދިޔައީ ރޭސް ޓު 11 ފްރޭމަށެވެ. ގޭމުގެ ކުރީކޮޅު ދުންޔާޒާއި އަހުސަން ފެނުނީ ދާދި ހަމަހަމަކޮށެވެ. ނަމަވެސް އަހުސަން ވަނީ ފަހުކޮޅު ދެއްކި ހިތްވަރާއެކު ކާމިިޔާބުކުރި ފްރޭމްތަކުން މި މެޗު ކާމިޔާބުކޮށްފައެވެ.
މުބާރާތުގެ ފައިނަލަށް އަހުސަން ދަތުރުކޮށްފައިވަނީ ސެމީ ފައިނަލުގައި އަލީ ފަޔާޒް ބަލިކޮށްގެންނެވެ. އަދި ދުންޔާޒް ފައިނަލަށް ދަތުރުކުރީ ސެމީ ފައިނަލުގައި ފަތުހުﷲ ޖަމީލް ބަލިކޮށްގެންނެވެ. އަހުސަން ވަނީ މި އަހަރު އޮތް 9 ބޯލް ޗެމްޕިއަންޝިޕުވެސް ކާމިޔާބުކޮށްފައެވެ. އަދި 2021 ވަނަ އަހަރުގެ އެސޯސިއޭޝަން ކަޕުވެސް ކާމިޔާބުކޮށްފައިވެއެވެ.
ފައިނަލް މެޗަށްފަހު "ޕީއެސްއެމް ސްޕޯޓްސް" އާ ވާހަކަދައްކަމުން އަހުސަން ބުނީ ފައިނަލް މެޗުގެ ކުރީކޮޅު އުނދަގޫތަކެއް ކުރިމަތިވި ނަމަވެސް، ބްރޭކަށްފަހު އެނބުރި ކުޅުމުގެ ތެރެއަށް ވަދެ ތަފާތު ދެއްކުނު ކަމަށެވެ. އަދި ކެރިއަރުގައި ލިބުނު ކާމިޔާބީތަކާއެކު މި އަހަރަކީ ހާއްސަ އަހަރެއް ކަމަށާއި، ރޭންކިންގެ އެއްވަނައިގެ ގޮތުގައި އަހަރު ނިންމާލަން ޖެހުމަކީ ލިބުނު ބޮޑު އުފަލެއް ކަމަށެވެ.
ޖުމްލަ 73 ކުޅުންތެރިން ވާދަކުރި މި މުބާރާތް ކުރިއަށް ގެންދިޔައީ 16 ގުރޫޕަކަށް ބަހާލައިގެންނެވެ. ނޮކައުޓް ބުރު ކުރިއަށްގެންދިޔައީ ކޮންމެ ގުރޫޕަކުން އެންމެ މޮޅު ދެ ކުޅުންތެރިންނާއެކުއެވެ.