ފީފާ ކުލަބު ވޯލްޑް ކަޕުގެ ސެމީ ފައިނަލް ފުރަތަމަ މެޗުގައި މިސްރުގެ އަލް އަހްލީ ބަލިކޮށް، މުބާރާތުގެ ފައިނަލުގެ ފުރަތަމަ ޖާގަ ބްރެޒިލުގެ ފްލުމިނެންސޭއިން ހޯދައިފިއެވެ.
ސައުދީ އަރަބިއްޔާގެ ކިންގް އަބްދުﷲ ސްޕޯޓްސް ސިޓީގައި ކުޅުނު މެޗު ފްލުމިނެންސޭއިން ކާމިޔާބުކުރީ 2-0 ގެ ނަތީޖާއަކުންނެވެ.
މި މެޗުގެ 71 ވަނަ މިނެޓުގައި އެ ޓީމުން ވަނީ ފުރަތަމަ ލަނޑު ޖަހައި ލީޑު ނަގައިފައެވެ. އެ ޓީމަށް ލިބުނު ޕެނަލްޓީއަކުން މި ލަނޑު ޖަހައިދިނީ ޖޯން އާރިއާސްއެވެ. ފްލުމިނެންސޭގެ ދެވަނަ ލަނޑު މެޗުގެ 90 ވަނަ މިނެޓުގައި ކާމިޔާބުކޮށްދިނީ ޖޯން ކެނެޑީއެވެ. އޭނާއަށް އެ ލަނޑު ޖަހަން ފުރުސަތު ތަނަވަސްކޮށްދިނީ މަތެއުސް މާޓިނެލީއެވެ.
މި މެޗު ޚާއްސަ ވަނީ ފްލުމިނެންސޭއަށް ކުޅެމުން އަންނަ ބްރެޒިލުގެ ލެޖެންޑް މާސެލޯއަށެވެ. މިއީ އޭނާ ކުލަބު ވޯލްޑް ކަޕުގެ ފައިނަލުގައި ކުޅޭނެ ފަސްވަނަ ފަހަރެވެ. ފައިނަލުގައި ފްލުމިނެންސޭއާ ދެކޮޅަށް ނުކުންނާނެ ޓީމެއް ކަށަވަރު ވާނީ މެންޗެސްޓާ ސިޓީ އާއި އުރަވާ ރެޑްސް ޑައިމަންޑްސް ވާދަކުރާ ސެމީ ފައިނަލް މެޗުންނެވެ.