މިއަހަރުގެ ފުޓްބޯޅަ ސީޒަން ހުޅުވުމަށް ކުޅޭ އެފްއޭއެމް ޗެރިޓީ ޝީލްޑް މެޗް ބަލާލުމަށް ހިލޭ ދަނޑަށް ވަދެވޭނެކަމަށް އެފްއޭއެމްއިން ހާމަކުރައްވައިފިއެވެ.
މިގޮތަށް ނިންމެވީ ވީހާވެސް ގިނަ ބަޔަކަށްް ދަނޑަށް ވަނުމުގެ ފުރުޞަތު ދިނުމަށްކަމަށް އެފްއޭއެމް އިން ވިދާޅުވެއެވެ. އެ އިދާރާއިން ވިދާޅުވީ އެފްއޭއެމް ޗެރިޓީ ޝީލްޑް މެޗުގެ އިތުރުން ލީގު މެޗުތަކަށްވެސް ސިޑިބަރިއަށް ހިލޭ ވަދެވޭނެކަމަށެވެ. ނަމަވެސް ލީގުގެ މެޗުތަކަށް ގޮނޑިބަރީގެ ޓިކެޓް ވިއްކުމަށް ހަމަޖެހިފައިވާކަމަށް އެފްއޭއެމްއިން މައުލޫމާތުދެއްވައެވެ. މިދިޔަ އަހަރެކޭ އެއްގޮތަށް މިއަހަރުވެސް ލީގުގައި ގޮނޑިބަރިން ޓިކެޓް ވިއްކުމަށް ހަމަޖެހިފައިވަނީ 20 ރުފިޔާއަށް ކަމަށް އެފްއޭއެމްއިން މަޢުލޫމާތުދެއްވައެވެ.
މިއަހަރުގެ ފުޓްބޯޅަ ސީޒަން ހުޅުވުމުގެ ގޮތުން ކުޅޭ ޗެރިޓީ ޝީލްޑް މެޗް ފަށާނީ މިރޭ 9:00 ގައެވެ. މި މެޗުގައި ވާދަކުރާނީ ނިއުރޭޑިއަންޓާއި މާޒިޔާއެވެ. މި މެޗް ދިވެހިރާއްޖޭގެ އަޑާ ޓީވީއެމުން ވަގުތުން ދައްކާނެއެވެ.