ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ އަހަރީ އާންމު ޖަލްސާ މި މަހުގެ 26 ވަނަ ދުވަހު ބާއްވަން ނިންމައިފިއެވެ.
ވީއޭއެމުން އިއްޔެ ނެރުނު އިއުލާނެއްގައި ބުނެފައިވަނީ އެ އެސޯސިއޭޝަނުގެ މި އަހަރުގެ އަހަރީ އާއްމު ޖަލްސާ މި މަހުގެ 26 ވަނަ ދުވަހު ބޭއްވުމަށް ހަމަޖެހިފައިވާތީ، އެ ޖަލްސާއަށް އެ އެސޯސިއޭޝަނުގެ މެންބަރު ކުލަބުތަކަށް ދައުވަތު އަރުވާ ކަމަށެވެ. އަދި އެ ޖަލްސާގައި ކުލަބުތަކުގެ ފަރާތުން ބައިވެރިވެލައްވާ މަންދޫބުންގެ މައުލޫމާތު މި މަހުގެ 20 ވަނަ ދުވަހުގެ 12:00 ގެ ކުރިން އެ އެސޯސިއޭޝަނަށް އީމެއިލް ކުރުމަށް ވަނީ އެދިފައެވެ.
ވީއޭއެމުން އަހަރީ އާންމު ޖަލްސާއެއް ބާއްވާއިރު، މިދިޔަ ނޮވެމްބަރު މަހުގެ ތިންވަނަ ދުވަހުވެސް ވީއޭއެމުގެ އަހަރީ އާންމު ޖަލްސާއެއް ވަނީ ބާއްވާފައެވެ. އެ ޖަލްސާގައި އެ އެސޯސިއޭޝަނުގެ އަސާސީ ގަވާއިދަށް ވަނީ ބަދަލުތަކެއްވެސް ގެނެސްފައެވެ. އޭގެ ތެރޭގައި އެސޯސިއޭޝަނުގެ އިންތިޚާބުގައި ވޯޓުލާ އުސޫލަށް ބަދަލު ގެނައުމާއި، އެސޯސިއޭޝަންގެ ވޯޓުލެވޭ މެންބަރުން ކަނޑައެޅުމާއި، އެސޯސިއޭޝަންގެ ބަޖެޓް އަދި އަހަރީ ރިޕޯޓުވެސް ވަނީ ފާސްކޮށްފައެވެ.
އެންމެ ބޮޑު ބަދަލެއްގެ ގޮތުގައި ފާހަގަކުރެވުނީ ވީއޭއެމުގެ މެންބަރު ކުލަބުތަކުގެ އުސޫލެވެ. އެގޮތުން މީގެކުރިން ހަތް ކުލަބަކަށް ވޯޓުލުމުގެ ފުރުސަތު ލިބޭއިރު، ފުރިހަމަ މެންބަރު 16 ކުލަބަށް ވޯޓުލުމުގެ ފުރުސަތު ދިނުމަށް ފާސްކުރިއެވެ. އަދި އަސާސީ ގަވާއިދަށް ގެނެސްފައިވާ ބަދަލުތަކާއެކު 10 ދުވަހުގެ ތެރޭގައި ވީއޭއެމުގެ އައު އިންތިޚާބެއް ބާއްވަންވެސް ފާސްކުރިއެވެ. އެކަމަކު އެ މުއްދަތުގައި އިންތިޚާބު ބޭއްވިފައި ނުވާއިރު، އެ ޖަލްސާ ބަލައިނުގަންނަން ކޮމިޝަނާ އޮފް ސްޕޯޓްސްއިން މީގެ ކުރިން ވަނީ ނިންމާފައެވެ.
އެކްޓިން ކޮމިޝަނާ އޮފް ސްޕޯޓްސް އައިޝަތު ސަމާހު ސޮއިކުރައްވާ ވީއޭއެމަށް އެ ފަހަރު ފޮނުވާފައިވާ ސިޓީގައި ވަނީ އެ ޖަލްސާ ބަލައިނުގަންނަން ނިންމި މައިގަނޑު ފަސް ކަމެއް ހާމަކޮށްދެއްވާފައެވެ. އޭގެ ތެރޭގައި ހިމެނެނީ ވީއޭއެމުގެ މެންބަރުން ކަނޑައެޅުމުގައި ދުނިޔޭގެ ވޮލީބޯޅަ ޖަމުއިއްޔާއިން އަމަލުކޮށްފައިވާ ގޮތާއި، ވީއޭއެމުން އަހަރީ އާންމު ޖަލްސާގައި އަމަލުކޮށްފައިވާ ގޮތުގެ އިތުރުން، ހިންގާ ކޮމިޓީގެ ދައުރާއި، އަހަރީ އާންމު ޖަލްސާ ބޭއްވުމުގެ އިތުރުން ފާސްކުރަން ހުށަހެޅި ހިންގާ ގަވާއިދުގައި ކުޅިވަރު ޖަމުއިއްޔާތައް ރަޖިސްޓްރީކޮށް ހިންގުމާ ބެހޭ ގަވާއިދާއި، އެސޯސިއޭޝަނުގެ ހިންގާ ގަވާއިދާ ޚިލާފު ކަންތައްތަކެވެ.
އެއާއެކު އަހަރީ އާންމު ޖަލްސާއެއް ބާއްވަން ވީއޭއެމުން އަނެއްކާވެސް އިއުލާންކުރިއިރު، އެ އެސޯސިއޭޝަނުން މިދިޔަ އަހަރުތަކުގައި ގަވާއިދާ އެއްގޮތަށް އަހަރީ އާންމު ޖަލްސާ ބާއްވާފައެއް ނުވެއެވެ. އެއާއެކު ލިޔެކިޔުން ހަމަނުވެގެން އުވާލާން އިއުލާންކުރި ޖަމުއިއްޔާތަކުގެ ތެރޭގައިވެސް ވީއޭއެމް ހިމެނުނެވެ.