އިނގިރޭސި ޕްރިމިއާ ލީގުގައި ރޭ ބްރައިޓަން ބަލިކޮށް ތާވަލުގެ އެއްވަނައަށް އާސެނަލް ޖެހިލައިފިއެވެ.
އަމިއްލަ ދަނޑުގައި ކުޅުނު މެޗުން އާސެނަލް މޮޅުވީ 2-0 ގެ ނަތީޖާއަކުންނެވެ.
މި މެޗުގެ ފުރަތަަމަ ހާފުގައި އާސެނަލުން ގިނަ ވަގުތު ބޯޅަ ހިފަހައްޓައިގެން ކުޅުނުއިރު، މި ހާފުގައި އެ ޓީމުން ވަނީ ގިނަ ހަމަލާތަކެއް އުފައްދާފައެވެ. އެކަމަކު ފުރަތަމަ ހާފުގެ ކުޅުން ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ލަނޑެއް ކާމިޔާބުނުކުރެވިއެވެ.
މި މެޗުގައި އާސެނަލުން ލީޑު ނަގާފައިވަނީ ދެވަނަ ހާފު ފަށައިގެން އަށްވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ފޯވާޑް ގެބްރިއަލް ޖީސޫސްއެވެ. އަދި މެޗު ނިމެން ތިން މިނެޓަށް ވެފައި ވަނިކޮށް އާސެނަލުން ވަނީ ލީޑު ފުޅާކޮށްފައެވެ. އެޑީ އެންކެޓިއާ ތަނަވަސްކޮށްދިން ފުރުސަތެއްގައި މި ލަނޑު ކާމިޔާބުކޮށްދިނީ ފޯވާޑް ކައި ހާވަޓްޒްއެވެ.
މި މޮޅާއެކު ތާވަލުގެ އެއްވަނައަށް އާސެނަލް ޖެހިލީ ކުޅުނު 17 މެޗުން ލިބުނު 39 ޕޮއިންޓާއެކުއެވެ. އަދި މި މެޗުން ބަލިވި ބްރައިޓަން އޮތީ މިހާތަނަށް ކުޅުނު 17 މެޗުން ލިބުނު 26 ޕޮއިންޓާއެކު ތާވަލުގެ ނުވަވަނައިގައެވެ.