އިނގިރޭސި ޕްރިމިއާ ލީގުގައި ރޭ ލިވަޕޫލާއި މެންޗެސްޓާ ޔުނައިޓެޑް ބައްދަލުކުރި މެޗު އެއްވަރުވެއްޖެއެވެ.
ލިވަޕޫލުގެ ދަނޑުގައި ކުޅުނު މެޗު ނިމުނީ ދެ ޓީމުން ކުރެ ޓީމަކަށް ލަނޑެއް ނުޖެހި 0-0 ގެ ނަތީޖާއަކުންނެވެ. ރޭގެ މެޗަކީ ލިވަޕޫލަށް މި ސީޒަނުގައި އަމިއްލަ ދަނޑުގައި މޮޅެއް ނުހޯދުނު ފުރަތަމަ މެޗެވެ.
ރޭގެ މެޗު އެއްކޮށް ކަހަލަ ގޮތަކަށް ލިވަޕޫލުން ކޮންޓްރޯލް ކޮށްގެން ކުޅުނުއިރު، އެ ޓީމުން ވަނީ މި މެޗުގައި 34 ހަމަލާއެއް އުފައްދާފައެވެ. އެކަމަކު ރޭވުންތެރިކަމާއެކު ޑިފެންސަށް އިސްކަންދީގެން ކުޅުނު ޔުނައިޓެޑުން ވަނީ ލިވަޕޫލުގެ ހަމަލާތައް ހުއްޓުވުމުގައި ކާމިޔާބު ހޯދާފައެވެ.
މި މެޗުގައި ލިވަޕޫލުގެ މުޙައްމަދު ސަލާހާއި، ޑާވިން ނޫނޭޒް އަދި ޑިފެންޑަރު އިބްރާހިމާ ކޮނާޓޭއަށް ރަނގަޅު ފުރުސަތުތަކެއް ލިބިގެންދިޔައިރު، ޔުނައިޓެޑުގެ ރަސްމުސް ހޮއިލުންޑަށްވެސް ވަނީ ހުސް ފުރުސަތެއް ލިބިފައެވެ. އެކަމަކު އޭނާ ފޮނުވޗާލި ހަމަލާގެ ހުރަހަކަށްވީ ލިވަޕޫލުގެ ގޯލްކީޕަރު އެލިސަން ބެކާއެވެ.
މި މެޗު ޔުނައިޓެޑުން ނިންމާލާފައިވަނީ އެއް ކުޅުންތެރިއަކު މަދުކޮށެވެ. އެއީ މެޗުގެ އިތުރު ވަގުތުގެ ތެރޭގައި އެ ޓީމުގެ ޑިފެންޑަރު ޑިއޭގޯ ޑަލޯއަށް ގާތްގާތުގައި ދެއްކި ދެ ރީނދޫ ކާޑާއެކު އޭނާއަށް ރަތް ކާޑެއް ދެއްކުމުންނެވެ.
މި ނަތީޖާއާއެކު ލިވަޕޫލުން ވަނީ ތާވަލުގެ އެއްވަނައަށް އަރަން ލިބުނު ފުރުސަތު ނަގާލާފައެވެ. އެގޮތުން ތާވަލުގެ ދެވަނައިގައި އެ ޓީމު އޮތީ ކުޅުނު 17 މެޗުން ލިބުނު 38 ޕޮއިންޓާއެކުއެވެ. އެއްވަނައިގައި އޮތީ 17 މެޗުން 39 ޕޮއިންޓް ހޯދާފައިވާ އާސެނަލެވެ. އަދި ޔުނައިޓެޑް އޮތީ 17 މެޗުން ލިބުނު 28 ޕޮއިންޓާއެކު ތާވަލުގެ ހަތްވަނައިގައެވެ.