އިންސާނީ ވަގުފާރި ނުވަތަ އެންޓި- ހިއުމަން ޓްރެފިކިންގ ހުއްޓުވުމަށް ޢާއްމުން ހޭލުންތެރިކަން އިތުރުކުރެއްވުމުގެ ޤައުމީ ކެމްޕެއިން ރޭ ރާއްޖޭގައި ފަށްޓަވައިފިއެވެ.
މި ކެމްޕެއިން ފަށްޓަވައިދެއްވީ ޕްރޮސިކިއުޓަރ ޖެނެރަލް އަލްއުސްތާޛާ އާއިޝަތު ބިޝާމެވެ. މި ކެމްޕެއިން ފެއްޓެވީ މި ކެމްޕެއިން ހިންގެވުމާ ގުޅޭގޮތުން އިކްނޮމިކް ޑިވެލޮޕްމަންޓް މިނިސްޓްރީއާއި ޕީއެސްއެމްއާ ދެމެދު ކަމާބެހޭ އެއްބަސްވުމެއްގައި ސޮއިކުރެއްވުމަށްފަހުއެވެ. ރޭ ޕީއެސްއެމްގެ ސެނެކޯ މާލަމްގައި ބޭއްވެވި، މި ކެމްޕެއިން ފެއްޓެވުމުގެ ރަސްމިއްޔާތުގައި ވަނީ މި ކެމްޕެއިން ހިންގެވުމާ ބެހޭގޮތުން މިނިސްޓްރީ އޮފް އިކޮނޮމިކް ޑިވެލޮޕްމަންޓާއި ޕަބްލިކް ސަރވިސް މީޑިއާއާ ދެމެދު އެއްބަސްވުމެއްގައި ސޮއިކުރައްވައިފިއެވެ. މި އެއްބަސްވުމުގައި ސޮއިކުރެއްވީ މިނިސްޓަރ މުޙައްމަދު ސަޢީދާއި ޕީއެސްއެމްގެ މެނޭޖިންގ ޑިރެކްޓަރ އިބްރާހީމް ޚަލީލެވެ. img:http://s2.psmnews.mv/images/660x400/14598334966487.jpg|އިންސާނީ ވަގުފާރި ހުއްޓުވުމަށް ޢާއްމުން ހޭލުންތެރިކަން އިތުރުކުރެއްވުމުގެ ޤައުމީ ކެމްޕެއިން ފަށްޓަވައިދެއްވުން - ފޮޓޯ: ޕީއެސްއެމް ނިއުސް
މިރަސްމިއްޔާތުގައި އިންސާނީ ވަގުފާރީގެ ޝިކާރައަށްވާ ފަރާތްތަކަށް މައްސަލަ ހުށަހެޅޭނެ ހޮޓްލައިނެއް ލޯންޗްކޮށްފައިވެއެވެ. އެންޓި ހިއުމަން ޓްރެފިކިންގ ނުވަތަ އިންސާނީ ވަގުފާރިގެ ޢަމަލު ހުއްޓުވުމުގައި އާއްމުން ހޭލުންތެރިކުރުވުމުގެ ޤައުމީ ކެމްޕެއިންގައި ސޮއިކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވާ ވާހަކަފުޅުދައްކަވަމުން ޕްރޮސިކިއުޓަރ ޖެނެރަލްއަލްއުސްތާޛާ އާއިޝަތު ބިޝާމް ވަނީ އިންސާނީ ވަގުފާރީގެ ޢަމަލުތަކަކީ އެފަދަ ކަންތައް ކުރުމަށް ބޭނުންވާ ފަރާތްތަކުން އޮޅުވާލައިގެން ބޭނުންވާ މަޤްސަދުތައް ހާސިލްކުރުމަށް ކުރަމުންދާ ކަންތައްތަކެއްކަން ފާހަގަކުރައްވާ، އިންސާނީ ކަރާމާތް ނަގާލާ މިފަދަ ކުށްތައް ނައްތާލުމުގެ މަސައްކަތުގައި ޚާއްސަގޮތެއްގައި މީހުން ރެކްރޫޓްކުރުމުގެ މަސައްކަތުގައި ހަރަކާތްތެރިވާ ފަރާތްތަކުގެ އެއްބާރުލުންދެއްވުމަށް އެދިވަޑައިގަންނަވާފައިވެއެވެ. މިފަދަ ފަރާތްތަކުން ޤާނޫނާއި ޤަވާޢިދުތަކަށް އަހުލުވެރިވެ، ހަރުދަނާ ދައުރެއް އަދާކުރުމަށް ޕީޖީ ގޮވާލެއްވިއެވެ. އަދި ޤައުމެއް ތަރައްޤީވުމުގައި މަދުވާ ކަންކަން ފުރިހަމަކުރުމުގައި ބޭރު ފަރާތްތަކުގެ އެހީތެރިކަން ހޯދަންޖެހިފައިވާއިރު، ބޭރު ފަރާތްތަކަށް ދޭންޖެހޭ އިހްތިރާމް އަދާކުރަންޖެހޭކަމުގައި ވިދާޅުވިއެވެ.
މި ރަސްމިއްޔާތުގައި މިނިސްޓަރ އޮފް އިކޮނޮމިކް ޑިވެލޮޕްމަންޓް މުޙައްމަދު ސަޢީދު ދެއްކެވި ވާހަކަފުޅުގައި ރާއްޖޭގެ ތަރައްޤީއަށް ގިނަ މަސައްކަތްތަކެއް ކުރެވި، އިޤްތިސާދީ ގިނަ ޙަރަކާތްތަކެއް ހަލުވި ދުވެއްޔެއްގައި ކުރަމުންދާއިރު، މިފަދަ މަސައްކަތްތައް ކުރުމަށް ބިދޭސީން އެތެރެކުރުމުގައި ހަމަޖެހިފައިވާ އުސޫލުން ބޭރުން ކަންކަން ކުރަމުންދާކަމަށް ވިދާޅުވިއެވެ. އެހެންކަމުން މިފަދަ ކަންކަމަށް ފުރުސަތު ނުދީ ހުރިހާ ފަރާތްތަކުންވެސް އިޖްތިމާޢީ ޒިންމާއެއްގެ ގޮތުގައި މިކަންކަން ބަލައިގަނެ މަސައްކަތްތަކެއް ކުރަންޖެހޭކަމުގައި ވިދާޅުވިއެވެ. ހިއުމަން ޓްރެފިކިންގ ގެ އަމަލަށް ހުރިހާ ފަރާތްތަކުން ހޭލުންތެރިވާންޖެހޭކަމަށާއި، މިއަހަރުގެ ތެރޭގައި ޓްރެފިކް ކުރެވޭ ފަރާތްތަށް ބަލަހައްޓާނެ ޝެލްޓަރެއް ޤާއިމުވެގެންދާނެކަމަށް މިނިސްޓަރ ސަޢީދު ވިދާޅުވިއެވެ.
މި ރަސްމިއްޔާތުގައި ވާހަކަފުޅުދައްކަވަމުން ޕަބްލިކް ސަރވިސް މީޑިއާގެ ޑެޕިއުޓީ މެނޭޖިންގ ޑިރެކްޓަރ މުޙައްމަދު އިކްރާމް ވިދާޅުވީ ރާއްޖޭގެ ތަރައްޤީގައި ކުރެވޭ މަސައްކަތުގައި ހަރަކާތްތެރިވާ ފަރާތްތަކަށް ދޭންޖެހޭ އިޙްތިރާމާއި، މެހުމާން ދާރީ ފުރިހަމަގޮތުގައި އަދާކުރަންޖެހޭކަމަށެވެ. އަދި މިކަމަށް މުޖުތަމަޢު ހޭލުންތެރިކުރުވުމަށް މީޑިއާގެ އުފެއްދުންތައް ޕީއެސްއެމްގެ ވަސީލަތްތައް ބޭނުންކޮށްގެން އެއްވެސް އަގެއް ނެތި ހިލޭ މި މަސައްކަތްކުރާނެކަމުގައި ވިދާޅުވިއެވެ.
މިރަސްމިއްޔާތުގައި އިންސާނީ ވަގުފާރީގެ ޝިކާރައަށްވާ ފަރާތްތަކަށް މައްސަލަ ހުށަހެޅޭ ހޮޓްލައިން ނަމްބަރެއްގެ ގޮތުގައި ކަނޑައަޅާފައިވާ 1696، މި ހޮޓްލައިނަށް ޝިކާރައަކަށްވާ ފަރާތްތަކަށް އަމިއްލައަށްވެސް މައްސަލަ ހުށަހެޅޭނެކަމަށް އިކޮނޮމިކް މިނިސްޓްރީން ވިދާޅުވެއެވެ. މިރަސްމިއްޔާތުގައި ލޭބަރ އެންޑް މައިގްރޭޝަންގެ ޕަބްލިކޭޝަނެއް ނެރުއްވާފައިވެއެވެ. މި ޕަބްލިކޭޝަން މެދުވެރިކޮށް އިންސާނީ ވަގުފާރީގެ އަމަލުތައް ނައްތާލުމުގެ އަމާޒަށް ވާސިލްވަމުންދާ މިންވަރު ވަޒަންކުރެވި، ހޭލުންތެރި މުޖުތަމަޢަކަށްވުމަށް ކުރަމުންދާ މަސައްކަތްތަކަށް ބާރެއް ލިބިގެންދާނެއެވެ.