އިނގިރޭސި ޕްރިމިއާ ލީގުގައި ރޭ ކްރިސްޓަލް ޕެލަސްއިން ފަހު ވަގުތު ކާމިޔާބުކުރި ދެ ލަނޑާއެކު އެންމެ ފަހުގެ ޗެމްޕިއަން މެންޗެސްޓާ ސިޓީއާ އެއްވަރުކޮށްފިއެވެ.
ޕެލަސްގެ ދަނޑުގައި ކުޅުނު މެޗު ނިމުނީ 2-2 ގެ ނަތީޖާއަކުން ދެ ޓީމު އެއްވަރުވެގެންނެވެ.
މި މެޗާ ކުރިމަތިލިއިރު ލީގުގައި ސިޓީން އެންމެ ފަހުން ކުޅުނު ފަސް މެޗުގެ ތެރެއިިން އެ ޓީމު މޮޅުވެފައި ވަނީ އެންމެ މެޗަކުންނެވެ. އެގޮތުން ޗެލްސީ އާއި، ލިވަޕޫލް އަދި ޓޮޓްނަމް ހޮޓްސްޕާއާ ދެކޮޅަށް ކުޅުނު ތިން މެޗު އެއްވަރުވެފައިވާއިރު، އެސްޓަން ވިލާ އަތުން އެ ޓީމު ވަނީ ބަލިވެފައެވެ.
ރޭ ކުޅުނު މެޗުގެ ފުރަތަަމަ ހާފުގައި ސިޓީން ވަނީ ލީޑު ނަގާފައެވެ. މެޗުގެ 24 ވަނަ މިނެޓުގައި ފިލް ފޯޑެން ތަނަވަސްކޮށްދިން ފުރުސަތެއްގައި މި ލަނޑު ކާމިޔާބުކޮށްދިނީ މިޑްފީލްޑަރު ޖެކް ގްރީލިޝްއެވެ. އަދި ދެވަނަ ހާފު ފަށައިގެން ނުވަވަނަ މިނެޓުގައި ޒުވާން ޑިފެންޑަރު ރިކޯ ލުވިސް ވަނީ ސިޓީއަށް ލީޑު ފުޅާކޮށްދީފައެވެ.
ޕެލަސްއިން މި މެޗުގައި ފަރަގު ކުޑަކުރީ 74 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ފޯވާޑް ޖީން ފިލީޕް މަޓެޓާއެވެ. އަދި މެޗުގެ އިތުރު ވަގުތުގެ ތެރޭގައި ޕެނަލްޓީއަކުން މިޑްފީލްޑަރު މައިކަލް އޮލީސް ވަނީ ޕެލަސްއަށް ނަތީޖާ އެއްވަރުކޮށްދީފައެވެ.
މި ނަތީޖާއާއެކު މިހާތަނަށް ކުޅުނު 17 މެޗުން ސިޓީއަށް 34 ޕޮއިންޓް ލިބިފައިވާއިރު، އެ ޓީމު މި ވަގުތު އޮތީ ތާވަލުގެ ހަތަރުވަނައިގައެވެ. އަދި 17 މެޗުން ޕެލަސްއަށް 17 ޕޮއިންޓް ލިބިފައިވާއިރު، އެ ޓީމު އޮތީ ތާވަލުގެ 15 ވަނައިގައެވެ.