ޔަމަނަށް ޙަމަލާއެއް ދީފި ނަމަ އޭގެ ނަތީޖާ ވަރަށް ހިތިވާނެ ކަމަށް ބުނެ، އެ ޤައުމުގައި ހަރަކާތްތެރިވާ ހަތިޔާރު އެޅި ޖަމާޢަތެއް ކަމުގައިވާ ހޫޘީން ޔަހޫދީންނަށާއި އެމެރިކާއާއި ހުޅަނގުގެ ބާރުތަކަށް ވަރުގަދަ އިންޒާރެއް ދީފިއެވެ. އީރާނުން ވާގިވެރިވާ ޖަމާޢަތެއް ކަމުގައިވާ ހޫޘީންގެ މި އިންޒާރު ދީފައި ވަނީ، ރަތް ކަނޑު ހުރަސްކޮށް ދަތުރުކުރާ އާގުބޯޓުފަހަރަށް އަމާޒުކޮށް އެ ޖަމާޢަތުން ދެމުންދާ ޙަމަލާތައް ހުއްޓުވަން ފިޔަވަޅުތަކެއް އެޅުމަށް ޔަހޫދީންނާއި އެމެރިކާއާއި ހުޅަނގު ބާރުތަކުން ވިސްނަމުންދާ ދަނޑިވަޅެއްގައެވެ.
ޔަމަނުގެ ބޮޑު ސަރަޙައްދެއް ހޫޘީންގެ އަތްދަށުގައި އޮތް ނަމަވެސް، ބައިނަލްއަޤުވާމީ މުޖުތަމަޢުން ހޫޘީންގެ ސަރުކާރު ބަލައިގަނެފައެއް ނުވެއެވެ. ރަތް ކަނޑު ހުރަސްކޮށް ދަތުރުކުރާ އާގުބޯޓުތަކަށް ޙަމަލާ ދޭން ހޫޘީން ފަށާފައި ވަނީ، ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ ލާއިންސާނީ ޢުދުވާން ހުއްޓައިލުމަށް ޔަހޫދީންނަށް ބާރު އެޅުމުގެ ގޮތުންނެވެ. ހޫޘީން ބުނީ، އެ ޖަމާޢަތުގެ ޙަމަލާތައް އަމާޒު ކުރަމުން ދަނީ ޔަހޫދީ ދާޢުލަތަށް މުދާ ގެންދާ ބޯޓުފަހަރުތަކަށް އެކަނި ކަމުގައެެވެ.
އެ ކަމާ ދެކޮޅަށް ފިޔަވަޅު އަޅަން ހުޅަނގުގެ ބާރުތަކުން ވިސްނަމުންދާއިރު، ހޫޘީ ޖަމާޢަތުގެ އިސް އޮފިޝަލެއް ކަމުގައިވާ ޢަލީ އަލް-ޤަހޫމީ ވިދާޅުވީ ޔަހޫދީންނާއި އެމެރިކާ ގުޅިގެން ޔަމަނަށް ދީފާނެ ޙަމަލައަކަށް އެ ޖަމާޢަތުން ތައްޔާރަށް އޮތް ކަމުގައެވެ. "ފަލަސްޠީނުގެ ރައްޔިތުން ވީ ހާލެއްގައި ވާން ދޫކޮށެއް ނުލެވޭނެ. ޔަހޫދީންނާއި، އެމެރިކާއާއި ހުޅަނގުން އިންޒާރު ދިނަސް، ފަލަސްޠީނުގެ ރައްޔިތުން މިނިވަން ކަމަށް ކުރާ ޖިހާދަށް އެހީތެރިކަން ފޯރުކޮށްދެވެން އޮތް ގޮތަކަށް އެހީވެދޭނަން. އެ މީހުން އެކަނިވިޔަކަ ނުދޭނަން،" އަލް-ޤަހޫމީ ވިދާޅުވިއެވެ.
ޔަހޫދީންގެ ބަނދަރުތަކަށް މުދާ ގެންދާ ބޯޓުފަހަރަށް ޙަމަލަދިނުން ހުއްޓައިނުލާނެ ކަމުގައި ވެސް އޭނާ ވިދާޅުވިއެވެ. "ޔަހޫދީންގެ ބަނދަރުތަކަށް މުދާ އުފުލާ ބޯޓުފަހަރަށް ޙަމަލަދިނުން ހުއްޓައިލާނީ، ޣައްޒާގައި ތިބި އަޅުގަނޑުމެންގެ އަޚުންނާއި އުޚްތުންނަށް ބޭނުންވާ ކާބޯތަކެއްޗާއި ބޭސްފަރުވާގެ ސާމާނު ފޯރުކޮށްދޭން ފެށުމުން. އޭގެ ކުރިން ނުހުއްޓާނަން. އަޅުގަނޑުމެން ޙަމަލަދެނީ ޔަހޫދީ ބަނދަރުތަކަށް ދަތުރުކުރާ އުޅަނދުފަހަރަށް. އެހެން އެއްވެސް ޤައުމަކަށް ނުވަތަ ބަނދަރަކަށް ދަތުރުކުރާ އުޅަނދަކަށް ޙަމަލަ ނުދޭނެ ކަމުގެ ޔަޤީން ކަން އަރުވަން،" އަލް-ޤަހޫމީ ވިދާޅުވިއެވެ.
ރަތް ކަނޑު ހުރަސްކޮށް ދަތުރުކުރާ އުޅަނދުފަހަރަށް ހޫޘީން ދެމުންދާ ޙަމަލަތަކާ ގުޅޭ ގޮތުން އެމެރިކާގެ ޤައުމީ ސަލާމަތާ ބެހޭ މުޝީރު ޖޭކް ސަލިވަން ވިދާޅުވީ، މިއީ ހޫޘީން ބޭނުން ކޮށްގެން އީރާނުން އަޑީގައި އޮވެގެން ދެމުންދާ ޙަމަލަތަކެއް ކަމުގައެވެ. އަދި، ޙަމަލަތައް ދިނުމަށް ހޫޘީން ބޭނުން ކުރާ ހަތިޔާރު އީރާނުން ފޯރުކޮށްދެމުންދާ ކަމުގައި ވެސް އޭނާ ތުހުމަތު ކުރެއްވިއެވެ. ނަމަވެސް، މިއީ އީރާނުން ދޮގު ކުރާ ތުހުމަތުތަކެކެވެ.
މުޅި ދުނިޔޭގައި ވިޔަފާރި ކުރާ މުދަލުގެ 40 އިންސައްތައަކީ ރަތް ކަނޑު ހުރަސްކޮށް އެއް ޤައުމުން އަނެއް ޤައުމަށް ގެންދާ ތަކެތި ކަން ފާހަގަ ކޮށްލަން ޖެހެއެވެ. އެ ސަރަޙައްދުން ދަތުރުކުރާ އުޅަނދުފަހަރަށް ހޫޘީން ޙަމަލަދޭން ފެށުމުން، އެ އުޅަނދުފަހަރުގެ އިންޝުއަރެންސް ޚަރަދުތައް އުފުލިފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ. އަދި، މި ކަމާ ގުޅިގެން ތަކެތީގެ އަގުތައް އުފުލުމަކީ އެކަށީގެންވާ ކަމެއް ކަމުގައި ރިޕޯޓުތައް ބުނެއެވެ.
ރަތްކަނޑުން ދަތުރުކުރާ ބައެއް އުޅަނދުފަހަރު ހިޞާރު ކުރަން ވެސް ހޫޘީން މީގެ ކުރިން މަސައްކަތް ކޮށްފައިވެެއެވެ. އަދި، ހުސްވި ނޮވެންބަރު މަހުގެ ތެރޭގައި އެއް އުޅަނދު ހިޞާރުކޮށް، ހޫޘީން ވަނީ އެ ކަން ކާމިޔާބު ކޮށްފައެވެ. މި ކަމާ ގުޅިގެން އެ ސަރަޙައްދުން ދަތުުރުކުރާ އާގުބޯޓުފަހަރަށް ހިމާޔަތް ދޭން އެކި ޤައުމުތަކުން ގުޅިގެން ދަނީ މަސައްކަތް ކުރަމުންނެވެ. މި ގޮތުން، އެމެރިކާއާއި، އިނގިރޭސިވިލާތާއި ފަރަންސޭސިވިލާތުގެ އަސްކަރީ މަނަވަރުތަކެއް މިހާރު ވެސް ދަނީ ރަތްކަނޑު ސަރަޙައްދުގައި ފޯރިމަރަމުންނެވެ. އަދި، ހޫޘީން ދެމުންދާ ޙަމަލަތައް ދިފާޢު ކުރަން މަސައްކަތް ކުރަމުންނެވެ.