ކުޅުދުއްފުށި ސިޓީ ކައުންސިލުން އިންތިޒާމުކޮށްގެން ބާއްވާ ހދ. އަތޮޅު ލީގު، ކުޅުދުއްފުށި ބަށިބޯޅަ މުބާރާތް ފަށައިފިއެވެ.
އިއްޔެ އިން ފެށި މި މުބާރާތުގައި ޖުމްލަ ފަސް ޓީމެއް އަންނަނީ ވާދަކުރަމުންނެވެ. މުބާރާތުގައި ވާދަކުރާ ޓީމުތަކަކީ ދެތަނޑިމާ، ޓީމް ކޮރަލްސް، ޓީމް ޒިގްޒެގް، ނެއްލައިދޫ ބަށި ޓީމު އަދި ޓީމު މަގުލަސްއެވެ.
މުބާރާތުގައި މިހާތަނަށް ކުޅުނު މެޗުތަކަށް ބަލާއިރު މިއަދު ވަނީ ފޯރިގަދަ މެޗުތަކެއް ކުޅެފައެވެ. އެގޮތުން ހެނދުނު ދަންފަޅީގައި ކުޅުނު ފުރަތަމަ މެޗު ޓީމު ކޮރަލްސް ކާމިޔާބުކުރީ ދެތަނޑިމާ އާއި ވާދަކޮށް 23 ލަނޑު 20 ލަނޑުންނެވެ. ކުއީން އޮފް ދަ މެޗަކަށް ހޮވުނީ ދެތަނޑިމާގެ އާމިނަތު އަޙްމަދެވެ.
ދެވަނަ މެޗު ޓީމު މަގުލަސްއިން ކާމިޔާބުކުރީ ޓީމު ޒިގްޒެގާއި ވާދަކޮށް 23 ލަނޑު 19 ލަނޑުންނެވެ. މެޗުގެ މޮޅު ކުޅުންތެރިއަކަށް ހޮވުނީ ޓީމު މަގުލަސްގެ އައިޝަތު އަލީއެވެ. ތިންވަނަ މެޗު ނެއްލައިދޫ ބަށި ޓީމު ކާމިޔާބުކުރީ ޓީމު ޒިގްޒެގާ ވާދަކޮށް 29 ލަނޑު 15 ލަނޑުންނެވެ. މެޗުގެ ކުއީން އޮފް ދަ މެޗަކީ ނެއްލައިދޫގެ އައިޝަތު ރަޝީދާ އެވެ.
މި މުބާރާތަކީ އަތޮޅު ފެންވަރުގައި މީގެ ކުރިން ފޯރީގައި ކުޅެމުން އައި ބަށީގެ ފޯރި އަލުން ދިރުވުމުގެ މަގުސަދުގައި ކުޅުދުއްފުށީ ސިޓީ ކައުންސިލުން އިންތިޒާމުކޮށްގެން ކުރިއަށްގެންދާ މުބާރާތެކެވެ. ޒަމާނީ ބަށިބޯލް އެސޯސިއޭޝަނުގެ އެހީތެރިކަމާއެކު ކުރިއަށްދާ މި މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ އަންނަ ހޯމަ ދުވަހުގެ ހަވީރެވެ. ފައިނަލުގައި ކުޅޭނީ ކޮންމެ ޓީމެއް ކޮންމެ ޓީމަކާ ވާދަކޮށް، އެންމެ ގިނަ ޕޮއިންޓް ހޯދާ ދެ ޓީމެވެ.