ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރާކާރުގެ ފުރަތަމަ 14 ހަފުތާގެ ތެރޭގައި ރާވާފައިވާ މަގުޗާޓުގައި ހިމެނޭ "ފިޓް މޯލްޑިވްސް"، ރާއްޖޭގެ ހުރިހާ ރައްޔިތުން ބޭނުންހިފާނެ ޕޯޓަލަކަށް ހެދުމަކީ އަމާޒެއް ކަމަށް ސަރުކާރުން ބުނެފިއެވެ.
ޕީއެސްއެމުން ގެނެސްދިން "ހަފުތާ 14" ޕްރޮގްރާމުގައި ވާހަދައްކަވަމުން ކުޅިވަރާއި ހަށިހެޔޮ ކަމާބެހޭ ވުޒާރާގެ ސްޓޭޓް މިނިސްޓަރު މުޙައްމަދު ރިޔާޒް ވިދާޅުވީ ޕޯޓަލުގެ މަސައްކަތް މިވަގުތު ވަރަށް ބާރަށް ކުރިއަށްދާ ކަމަށާއި، މިހާރު ވަނީ ޕޯޓަލް ގާއިމުކުރުމުގެ ސޮޕްޓްވެއާގެ ތަފުސީލުތައް ނިންމާލެވިފައިވާ ކަމަށެވެ.
ކުރިއަށް އޮތް ހަފުތާގައި ޕޯޓަލް ފަރުމާކޮށް ތައްޔާރުކުރުމަށް އިއުލާން ކުރެވިގެންދާނެ ކަމަށްވެސް ވިދާޅުވިއެވެ. ރިޔާޒް ވިދާޅުވީ ޕޯޓަލް ފަރުމާކުރަމުންދަނީ ދިވެހި ރައްޔިތުންނަށް ދުޅަހެޔޮ ސިއްހަތެއްގައި ހުރުމައްޓަކައި ބޭނުންވާނެ ހުރިހާ ކަމެއް ހިމަނައިގެން ކަމަށެވެ. ރިޔާޒް ވިދާޅުވީ ޕޯޓަލް ތައްޔާރުކުރުމަށް ގުޅިގެން ހޯދަން ޖެހޭ ފަންނީ މައުލޫމާތުތައް ކަމާ ގުޅުންހުރި މާހިރުންނާއެކު މަޝްވަރާކުރަމުންދާ ކަމަށާއި، އެގޮތުން އެންސީއައީޓީގެ ފަރާތުން މި ޕޯޓަލް ގާއިމުކުރުމަށް ވަރަށް ބޮޑު އެހީތެރިކަމެއް ލިބިގެންދާ ކަމަށެވެ.
ރިޔާޒު ވިދާޅުވީ މައިގަނޑު ގޮތެއްގައި ޕޯޓަލްގައި ހިމެނޭނީ ކަސްރަތު ކަމަށާއި، ޕޯޓަލްގެ އެންމެ ބޮޑު ބޭނުމަކީ ހަށިގަނޑަށް ފާއިދާހުރި ކަސްރަތެއް ކޮށްގެން ދުޅަހެޔޮކަންމަތީ ހުރުމަށް އެހީތެރިވެދިނުން ކަމަށެވެ. ޕޯޓަލްގައި ނިއުޓްރިޝަންގެ މައުލޫމާތުގެ އިތުރުން ހާއްސަކޮށް ޕޯޓަލް ބޭނުންކުރާ ފަރާތްތަކުގެ ޝައުގުވެރިކުރުމަށް ޕޮއިންޓް އުސޫލުން އިނާމު ލިބިގެންދާ ކަހަލަ ކަންތައްތައް ރާވަމުންދާ ކަމަށްވެސް ރިޔާޒް ވިދާޅުވިއެވެ. ޕޯޓަލް ނިމި ބޭނުންކުރަން ފެށޭ ހިސާބުން ތަރައްގީކޮށް އިތުރަށް ބޭނުންވާ ކަންތައްތައްވެސް ހިމަނާނެކަން ރިޔާޒް ވަނީ ފާހަގަކުރައްވާފައެވެ.
"އަޅުގަނޑުމެން އަމާޒަކީ ފިޓް މޯލްޑިވްސް އަމާޒުކުރެވޭ ރާއްޖޭގެ ހުރިހާ އުމުރުފާތަކުންވެސް ބޭނުންކުރެވޭނެ، ބޭނުންކުރާ ހިތްވާނެ ވަސީލަތަކަށް ހެދުން.މުޙައްމަދު ރިޔާޒް - ކުޅިވަރާއި ހަށިހެޔޮ ކަމާބެހޭ ވުޒާރާގެ ސްޓޭޓް މިނިސްޓަރު
ފޯޓަލް ދިވެހިބަހުން ބޭނުންކުރެވޭ ގޮތަށް ފަރުމާ ކުރިވެފިވާކަން ފާހަގަކުރައްވަމުން ރިޔާޒް ވިދާޅުވީ ވެބް ޕޯޓަލް ނޫނަސް އެހެނިހެން ގޮތުން ބޭނުންކުރެވޭނެ ލުއި ފަސޭހަ ގޮތްތައް ހަދައިދިނުމަކީ މި ވަގުތު ގެންގުޅުއްވާ ވިސްނުމެއް ކަމަށެވެ.