ހަނގުރާމައިގެ ސަބަބުން ކާނެ ބޯނެ އެއްޗެއް ނުލިބި ތިބި ޣައްޒާގެ ޢާންމުން ކާބޯތަކެއްޗަށް އެދި ސަލާން ޖަހަން ފަށައިފިއެވެ.
ކާން ބޭނުންވެގެން ކުޑަ ރޮށިކޮޅަކަށް ސަލާން ޖަހަން ޖެހިފައިވާ ޣައްޒާގެ އާންމުންނަށް ކާބޯތަކެތި ގަންނަން ވެސް ލިބެނީ އަސްލު އަގަށްވުރެ އެތައް ގުނައެއް އުފުލިފައިވާ އަގަކަށެވެ. ޣައްޒާއަށް އެހީފޯރުކޮށްދެމުންދާ އެހީގެ ޤާފިލާތަކުން ކާބޯތަކެތި ލިބުން ލަސްވުމުން ބައެއް މީހުން އަންނަނީ ހިމާރު ކަތިލައި އޭގެ މަސް ކެއުމަށް ބޭނުން ކުރަމުންނެވެ. ޔަހޫދީ ފައުޖުތަކުން ޣައްޒާގެ ޢާންމުންނަށް މެދުކެނޑުމެއް ނެތި ދެމުންދާ ޢުދުވާނީ ޙަމަލާތަކުގެ ސަބަބުން ބަނޑުހައިހޫނުކަންމަތީގައި ތިބި ޣައްޒާގެ ރައްޔިތުންނަށް އެހީ ފޯރުކޮށްދިނުން ވަނީ ނާދިރު ކަމަކަށްވެފައެވެ.
އދގެ އިންސާނީ ކާރިޡާއާ ބެހޭ އޮފީހުން ބުނީ ޣައްޒާއަށް މި ވަގުތު ވެއްދޭ މަދު އެހީ ވެސް ވެއްދެނީ ޣައްޒާއާއި މިޞްރު ގުޅޭ ސަރަޙައްދު ކައިރީގައި އޮންނަ ރަފަޙް ސިޓީއަށް ކަމަށެވެ. ޔަހޫދީންގެ ޙަމަލާތައް ވަރުގަދަކޮށް، ޣައްޒާގެ މައި މަގުތަކުގައި ދަތުރުފަތުރުކުރަން ޔަހޫދީން ހުރަސް އެޅުމުގެ ސަބަބުން ޣައްޒާގެ އެހެން ސަރަޙައްދުތަކަށް އެހީ ފޯރުކޮށްދިނުމުގެ މަސައްކަތް ގާތްގަނޑަކަށް އެއްކޮށްހެން ހުއްޓިފައިވާ ކަމަށް އެ އިދާރާއިން ބުނެއެވެ.
ފަލަސްޠީނުގެ ރެފިޔުޖީންނާ ބެހޭ އދގެ އިދާރާއިން ބުނިގޮތުގައި ބަނޑުހައިހޫނުކަންމަތީގައި ތިބި ޣައްޒާގެ އާންމުން އަންނަނީ އެހީގެ ޤާފިލާތައް މަޑުކުރުވައިގެންވެސް ކާބޯތަކެތި ހޯދަމުންނެވެ. މިއީ ބަނޑުހައިހޫނުކަމުގެ ހަނގުރާމައެއް ކަމަށާއި، އެ މީހުން މަރުވާނީ ބަނޑުހައިހޫނުކަންމަތީގައި ނުވަތަ ޔަހޫދީންގެ ޙަމަލާއެއްގައި ކަމަށް ޣައްޒާގެ ގޮތްހުސްވެފައިތިބި ޢާންމުން އަންނަނީ ބުނަމުންނެވެ. ކާބޯތަކެތި ލިބުން ދަތިވުމުގެ އިތުރުން ލިބެން ހުރި ކާބޯތަކެތީގެ އަގުވެސް ވަނީ އިންތިހާއަށް އުފުލިފައެވެ.
ޣައްޒާއަށް ފޯރުކޮށްދޭ އިންސާނީ އެހީ ފޯރުކޮށްދެނީ ރަފަޙް ހުރަސް މެދުވެރިކޮށް ނަމަވެސް އޮކްޓޯބަރު 20 ވަނަ ދުވަހުން ފެށިގެން ޢައްޒާއަށް އިންސާނީ އެހީ ފޯރުކޮށްދޭން ފެށި ފަހުން މިޞްރުން ޣައްޒާއަށް ވަންނަ އެހީ މިޞްރުގެ ސަރަޙައްދީ ރޮނގު ކައިރީގައި އޮންނަ އަލް އަވްޖާ ނިތްޒާނާ ހުރަހުން ޔަހޫދީން އަންނަނީ ބަލައި ފާސްކުރަމުންނެވެ. އެކަމުގެ ސަބަބުން ޣައްޒާއަށް އެހީ ލިބުމުގައި ވަރަށް ބޮޑެތި ލަސްތަކެއް ކުރިމަތިވެފައިވެއެވެ.
ޣައްޒާގެ ވެރިކަންކުރާ ޙަމާސް ނައްތާލުމަށް ޔަހޫދީން ހަނގުރާމަ އިޢުލާނުކުރީ އޮކްޓޫބަރު މަހު ހަތް ވަނަ ދުވަހު ޔަހޫދީންނަށް އަމާޒުކޮށް ޙަމާސުން ދިން ޙަމަލާއަކާ ގުޅިގެންނެވެ. ނަމަވެސް އެ ޙަމަލާގެ ރައްދުގައި ކަމަށް ބުނެ ޔަހޫދީ ފައުޖުތަކުން އަންނަނީ ޣައްޒާގެ އާންމުންނަށް އަމާޒުކޮށް ޙަމަލާތައް ދެމުންނެވެ. ޖައްބާރު ޔަހޫދީންގެ ރަޙުމުކުޑަ ޢުދުވާނީ ޙަމަލާތަކުގައި މިހާތަނަށް ފަލަސްޠީނުގެ 18،000 އަށްވުރެ މީހުން ވަނީ ޝަހީދުކޮށްލައިފައެވެ. އޭގެތެރޭގައި ގިނައީ ކުޑަކުދިންނާ އަންހެނުންނެވެ.
ޙަމާސް ޖަމާޢަތުން ޔަހޫދީންނާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި ހުންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދުލް އަޤްޞާގެ ޙުރުމަތް ކެނޑުން އިތުރުވެ ފަލަސްޠީނުގެ މުސްލިމުންނާ ދެކޮޅަށް ޔަހޫދީން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.