ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ފަށާފައިވާ ލާއިންސާނީ ޢުދުވާނުގެ ސަބަބުން، އެ ސަރަޙައްދުގައި އޮންނަ ބައެއް ޢަރަބި ޤައުމުތަކުގެ އިޤުތިޞާދަށް އެ ކަމުގެ ނޭދެވޭ އަސަރު ކުރަމުންދާ ކަމުގައި އދން ބުނެފިއެވެ. އދގެ ތަރައްޤީއާ ބެހޭ ޕުރޮގުރާމުން މި ކަމާ ގުޅޭ ދިރާސާއެއް ހަދާފައިވާއިރު، އެ ޖަމުޢިއްޔާއިން ބުނީ ޣައްޒާ ޢުދުވާނުގެ ސަބަބުން ލުބުނާނާއި، މިޞްރާއި އުރުދުންގެ އިޤުތިޞާދުތަކަށް ބޮޑެތި ލޮޅުންތަކެއް އަންނަމުންދާ ކަމުގައެވެ.
މި ގޮތުން، މި އަހަރުގެ ތެރޭގައި އެ ޤައުމުތަކުގެ އިޤުތިޞާދުތަކަށް ކުރާ ނޭދެވޭ އަސަރުގެ އަގު 10 ބިލިޔަން އެމެރިކާ ޑޮލަރަށް އަރާނެ ކަމަށާއި، އިތުރު 230,000 އަށްވުރެ ގިނަ މީހުން ފަގީރުކަމުގެ ތެރެއަށް ވެއްޓިގެންދާނެ ކަމަށް ބެލެވެއެވެ. އަދި، އެ ޤައުމުތަކަށް މާލީ ގޮންޖެހުންތަކާ ކުރިމަތިލާން ޖެހިފައިވާ ކަމަށާއި، އިޤުތިޞާދު ކުރިއަރާ ދުވެލި މަޑުޖެހި، އިންވެސްޓްމެންޓުތައް މަދުވެ، ވަޒީފާ ނެތް މީހުންގެ ޢަދަދު އިތުރުވަމުންދާ ކަމުގައި އެ ޖަމުޢިއްޔާއިން ބުންޏެވެ.
ޣައްޒާ ޢުދުވާނާ ގުޅިގެން އެ ތިން ޤައުމުން އިތުރަށް ކުރަން ޖެހިފައިވާ ޚަރަދު 10.3 ބިލިޔަން ޑޮލަރަށް އަރާނެ ކަމަށް ބެލެވޭއިރު، ޔަހޫދީންގެ ޢުދުވާން ހުއްޓައިނުލައިފި ނަމަ ކުރިއަށް އޮތް ހަ މަހުގެ ތެރޭގައި އެ ޢަދަދު ދެގުނައަށް އިތުރުވާނެ ކަމަށް ބެލެވޭ ކަމުގައި އދގެ ތަރައްޤީއާ ބެހޭ ޕުރޮގުރާމުގެ އެސިސްޓެންޓް ޑިރެކްޓަރ-ޖެނެރަލް ޢަބްދުالله އަލް-ދަރްދަރީ ވިދާޅުވިއެވެ.
ކުޑަ ދުވަސްކޮޅެއްގެ ތެރޭގައި މުޅި ޣައްޒާ ސުންނާފަތި ކޮށްލާފައިވާއިރު، މިއީ ދެވަނަ ބޮޑު ހަނގުރާމައަށް ފަހު މި ފަދަ ބިރުވެރި މަންޒަރެއް ފެނުނު ފުރަތަމަ ފަހަރު ކަމުގައި ވެސް އޭނާ ވިދާޅުވިއެވެ. "ޣައްޒާގެ ރައްޔިތުން ދިރިއުޅޭ ގެދޮރުގެ 50 އިންސައްތަ އެ ވަނީ ސުންނާފަތި ކޮށްލާފައި. މި ފަދަ ބިރުވެރި މަންޒަރެއް މީގެ ކުރިން އަޅުގަނޑުމެން ނުދެކެން،" އަލް-ދަރްދަރީ ވިދާޅުވިއެވެ.
އަދި، ޣައްޒާގެ އާބާދީގެ 80 އިންސައްތަ އެއްހާ މީހުން ގެދޮރު ދޫކޮށް އެހެން ސަރަޙައްދުތަކަށް ގޮސްފައިވާއިރު، މިއީ ސޫރިޔާގެ ދާޚިލީ ހަނގުރާމައިގައި ފެނުނު މަންޒަރުތަކަށްވުރެ ނުރައްކާތެރި މަންޒަރެއް ކަމުގައި ވެސް އޭނާ ވިދާޅުވިއެވެ. "ޣައްޒާ މިހާރު އޮތް ހާލަތައް ސޫރިޔާ ވެއްޓުނީ ދާޚިލީ ހަނގުރާމައަށް ފަސް އަހަރު ހޭދަވި ފަހުން،" ކޮންފްލިކްޓް ޒޯން ނުވަތަ ހަނގުރާމައާއި ހަމަނުޖެހުމުގައި ސުންނާފަތި ކޮށްލާފައިވާ ސަރަޙައްދުތައް އަލުން އާރާސްތު ކުރުމާ ބެހޭ ދާއިރާގެ މާހިރެއް ކަމުގައި އަލް-ދަރްދަރީ ވިދާޅުވިއެވެ.