ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގެ ސަބަބުން ޣައްޒާގެ ޞިއްޙީ ނިޒާމު ރޫޅި ބަލިތައް ފެތުރުމެންދާތީ، ޣައްޒާ މިހާރު އޮތީ ޢާންމު ޞިއްޙަތުގެ ކާރިޘާއަކާ ކުރިމަތިލާން ޖެހިފައި ކަމަށް އދގެ އިންސާނީ ކާރިޘާއާ ބެހޭ އޮފީހުން ބުނެފިއެވެ.
ޣައްޒާގައި ގިނަ ބަލިތަކެއް ފެތުރެމުންދާތީ އދއާއި އިންސާނީ އެހީތެރިކަން ފޯރުކޮށްދޭ ޖަމާޢަތްތަކުން ވަނީ އިންޒާރު ދީފައެވެ. ޣައްޒާގެ އާބާދީގެ 85 އިންސައްތަ މީހުންނަށް ވަނީ ގެދޮރު ދޫކޮށް ވަޤުތީ ހިޔާތަކަށް ދިރިއުޅުން ބަދަލުކުރަން މަޖުބޫރުވެފައެވެ. އެކަމުގެ ސަބަބުން ހިޔާތަކުގައި މީހުން ތޮއްޖެހި، ސާފުތާހިރުކަން ނެތި އެ ސަރަޙައްދުތަކުގައި އަންނަނީ ތަފާތު ބަލިތައް ފެތުރެމުންނެވެ.
"އަޅުގަނޑުމެން އެންމެންނަށްވެސް އެނގޭ ސިއްޙީ ފަރުވާގެ ނިޒާމު ރޫޅިފައިވާކަން. އަދި މިއީ ބަލިމަޑުކަމާއި ޢާންމު ޞިއްޙަތުގެ ކާރިޘާއެއް." ފަލަސްޠީނަށް ކަނޑައަޅައިފައި ހުންނަވާ އިންސާނީ ކާރިޘާއާބެހޭ އދގެ މަންދޫބު ލީން ހޭސްޓިންގްސް ވިދާޅުވިއެވެ. އަދި 2.3 މިލިއަން މީހުންގެ އާބާދީއެއް އޮންނަ ޣައްޒާގެ ދެބައިކުޅަ އެއްބައި މީހުން މިހާރު ތިބީ ޔަހޫދީންގެ ޙަމަލާތަކަށް ފިލަން ގޮސް، ޣައްޒާގެ ދެކުނުން އޮންނަ ރަފަޙް ސިޓީގައި ކަމަށްވެސް ލީން ވިދާޅުވިއެވެ. އެކަމުގެ ސަބަބުން ވާނެ ހަމައެކަނި ކަމަކީ ޞިއްޙީ ކާރިޘާއެއް އުފެދުން ކަމަށްވެސް އޭނާ ވަނީ ވިދާޅުވެފައެވެ.
ދުނިޔޭގެ ޞިއްޙަތު ޖަމުޢިއްޔާއިން ބުނެފައިވާ ގޮތުގައި ނޭވާލާ ނިޒާމުގެ ސީރިއަސް ބަލިތަކާއި، ބޭރަށްހިންގުން، އުކުނު، ހަމުގެ ބަލިތައް އަދި ގައިންގަޔަށް އަރައި ފަސޭހައިން ފެތުރޭ ބަލިތައް ޣައްޒާގައި ވަނީ ވަރަށް ބޮޑަށް އިތުރުވެފައެވެ. ޣައްޒާގައި ހުރި 36 ހޮސްޕިޓަލްގެ ތެރެއިން ޚިދުމަތް ދެވެނީ އެންމެ 11 ހޮސްޕިޓަލުން ކަމަށް ވެސް ޞިއްޙަތު ޖަމުޢިއްޔާއިން ފާހަގަކުރެއެވެ.