ޔަހޫދީ ފައުޖުތަކުން ފަލަސްޠީނުގެ ޣައްޒާއަށް މެދުނުކެނޑި ދެމުންގެންދާ ޙަމަލާތަކުގެ ސަބަބުން ބައިނަލްއަޤުވާމީ ދުނިޔޭގައި ޔަހޫދީ ދަޢުލަތަށް އޮތް ތާޢީދު ގެއްލެމުންދާ ކަމަށް އެމެރިކާގެ ރައީސް ޖޯ ބައިޑެން ވިދާޅުވެއްޖެއެވެ. ޔަހޫދީ ދަޢުލަތުގެ ބޮޑުވަޒީރު ބުންޔަމީން ނަތަންޔާހޫގެ ހަރުކަށި ސަރުކާރު ބަދަލުކުރަންޖެހޭ ކަމަށް ވެސް ބައިޑެން ވަނީ ވިދާޅުވެފައެވެ.
ބައިޑެން އެ ގޮތަށް ވިދާޅުވީ 2024 ވަނަ އަހަރު ބާއްވާ އެމެރިކާގެ ރިޔާސީ އިންތިޚާބުގައި ތާޢީދު ހޯދުމުގެ ގޮތުން ބޭއްވި ކެމްޕޭންގައި ވާހަކަފުޅު ދައްކަވަމުންނެވެ. ބައިޑެން ދެއްކެވި ވާހަކަފުޅަކީ މިހާތަނަށް ނަތަންޔާހޫއަށް އެންމެ ބޮޑަށް ފާޑުވިދާޅުވެ ދެއްކެވި ވާހަކަފުޅެވެ.
"ޔަހޫދީންގެ ސަލާމަތް އެމެރިކާގެ މައްޗަށް ބިނާވެފައި އޮތް ނަމަވެސް މިވަގުތު އެމެރިކާއަށް ވުރެ ބޮޑަށް ވިލާތާއި ވިލާތުގެ އިއްތިޙާދުވެސް އެބައޮތް. ނަމަވެސް ޔަހޫދީން ޣައްޒާއަށް ދެމުންގެންދާ ޙަމަލާތަކާހެދި ދުނިޔޭގެ ތާޢީދު ޔަހޫދީންނަށް ވަނީ ގެއްލެން ފަށައިފައި" ބައިޑެން ވިދާޅުވިއެވެ.
ބައިޑެން އެ ވާހަކަފުޅު ދައްކަވައިފައިވާ ބައްދަލުވުމުގައި ގިނަ ޢަދަދެއްގެ ޔަހޫދީން ވަނީ ބައިވެރިވެފައެވެ. ބައިޑެން އެ މޭރުމުން ވާހަކަފުޅު ދައްކަވާފައި ވަނީ އެމެރިކާގެ ޤައުމީ ސަލާމަތާ ބެހޭ މުޝީރު ޖޭކް ސުލިވާން ޔަހޫދީންގެ އަސްކަރީ ކެބިނެޓާ އެކު މަޝްވަރާ ކުރުމަށް ތައްޔާރުވަމުންދާ ދަނޑިވަޅެއްގައެވެ.