އޭއެފްސީ ކަޕް ފުޓްބޯޅަ މުބާރާތުގެ ގްރޫޕް ޑީގައި ކުޅުނު ފަހު މެޗުގައި މާޒިޔާ ސްޕޯޓްސް އެންޑް ރެކްރިއޭޝަނުން އިންޑިއާގެ މޯހަން ބަގާން ސުޕަ ޖަޔަންޓް ބަލިކޮށްފިއެވެ.
ގައުމީ ފުޓްބޯޅަ ދަނޑުގައި މިއަދު ކުޅުނު މެޗުން މާޒިޔާ މޮޅުވީ 1-0 ގެ ނަތީޖާއަކުންނެވެ.
މި މެޗަށް މޯހަން ބަގާން ނުކުތީ އެ ޓީމުގެ ހެޑް ކޯޗާއި ސީނިއާ ގިނަ ކުޅުންތެރިން ނުލައެވެ. އެގޮތުން އެ ޓީމުގައި ހިމަނާފައިވަނީ ކަލްކަތާ ލީގުގައި ކުޅެމުން އަންނަ އެ ކުލަބުގެ ރިޒާވް ޓީމުގެ 13 ކުޅުންތެރިއެކެވެ. އަދި ޓީމަށް އިރުޝާދުދިނީ އެސިސްޓަންޓް ކޯޗު ކްލިފޯޑް މިރަންޑާއެވެ.
މި މެޗުގެ ފުރަތަމަ ހާފުގައި މާޒިޔާއިން ރަނގަޅު ކުޅުމެއް ދެއްކިއިރު، މި ހާފުގައި އެ ޓީމުން ވަނީ ގިނަ ފުރުސަތުތަކެއް ތަނަވަސްކޮށްފައެވެ. އެގޮތުން މެޗުގެ 13 ވަނަ މިނެޓުގައި އަލީ ފާސިރު (ސެންޓޭ) ދިން ބޯޅައަކުން ސާބިއާގެ ފޯވާޑް ވޮޖިސްލާފް ބަލަބަނޮވިޗް ފޮނުވާލި ހަމަލާ މޯހަން ބަގާނުގެ ގޯލްކީޕަރު އާޝް އަންވަރު ވަނީ ދިފާއުކޮށްފައެވެ.
އަދި އޭގެ މިނެޓެއް ފަހުން އޭރިއާ ތެރެއިން ހަސަން ރާއިފް އަޙްމަދު (ހަންނަ) ފޮނުވާލި ހަމަލާ އާއި އޭރިއާ ބޭރުން މާޒިޔާގެ އައިސަމް އިބްރާހީމް ފޮނުވާލި ނުރައްކާތެރި ހަމަލާގެ އިތުރުން ކޯނަރަކުން މާޒިޔާގެ ކެޕްޓަން ސަމޫހް އަލީ (ސަމުއްޓެ) ފޮނުވާލި ހަމަލާވެސް މޯހަން ބަގާންގެ ކީޕަރު ވަނީ ދިފާއުކޮށްފައެވެ.
މި މެޗުގައި މާޒިޔާއިން ލީޑު ނަގާފައިވަނީ ފުރަތަމަ ހާފު ނިމެން ފަސް މިނެޓަށް ވެފައި ވަނިކޮށެވެ. އޭރިއާ ތެރެއިން ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ހަންނައެވެ. އަދި އޭގެ ތިން މިނެޓު ފަހުން އޭރިއާ ތެރެއިން ބަލަބަނޮވިޗް ފޮނުވާލި ހަމަލާ ދިޔައީ އަރިމަތީ ދަނޑި ކައިރިން ބޭރަށެވެ.
މި މެޗުގެ ދެވަނަ ހާފު ފަށައިގެން މޯހަން ބަގާނުން ކުޅުން ރަނގަޅުކުރިއިރު، މި ހާފުގެ ކުރީކޮޅު އެ ޓީމުގެ ޓައިސަން ސިންގް ފޮނުވާލި ހަމަލާއެއް ވަނީ ގޯލުގެ ހުރަސް ދަނޑިއަށް އަމާޒުވެފައެވެ. އަދި މެޗުގެ 62 ވަނަ މިނެޓުގައި އޭރިއާ ތެރެއިން އެގްސަން ސިންގް ފޮނުވާލި ހަމަލާ މާޒިޔާގެ ކީޕަރު ހުސެއިން ޝަރީފް ވަނީ ދިފާއުކޮށްފައެވެ.
އޭގެ ފަހުން މެޗުގެ 67 ވަނަ މިނެޓުގައި ލީޑު ފުޅާކުރަން މާޒިޔާގެ ބަލަބަނޮވިޗަށް ހުސް ފުރުސަތެއް ލިބުނު ނަމަވެސް، ގޯލު ކުރިމަތީ ހުހަށްހުރެ އޭނާ ފޮނުވާލި ހަމަލާ ދިޔައީ ހުރަސް ދަނޑިމަތިން ބޭރަށެވެ. އޭގެ ފަހުން މެޗުގެ 75 ވަނަ މިނެޓުގައި ހަމްޒާ މުޙައްމަދު (ހަމްޕު) އަށްވެސް ވަނީ ހުސް ފުުރުސަތެއް ލިބި ބޭކާރުވެފައެވެ.
އޭގެ ފަހުން މެޗުގެ އިތުރު ވަގުތުގައި ހަމްޕު ފޮނުވާލި ހަމަލާއެއް ގޯލުގެ އަރިމަތީ ދަނޑީގައި ޖެހިފައި ނުކުތުމުން ރިބައުންސް ބޯޅަ އެ ޓީމުގެ ގާނާގެ މިޑްފީލްޑަރު ރޭގަން އޮބެންގް ގޯލަށް ފޮނުވާލި ނަމަވެސް، އޭނާ އޮފްސައިޑް މަގާމެއްގައި ހުރުމުން އެ ލަނޑު ބަލައިގެންފައެއް ނުވެއެވެ. އަދި އޭގެ ފަހުން އޭރިއާ ތެރެއިން ނާއިޒް ހަސަން (ދާދު) އާއި ހަސަން ނަޒީމް (ޗޯޓު) ފޮނުވާލި ހަމަލާތައް މާޒިޔާގެ ކީޕަރު ވަނީ ދިފާއުކޮށްފައެވެ.
މި މޮޅާއެކުވެސް މާޒިޔާއިން މި ފަހަރުގެ މުބާރާތް ނިންމާލީ ގްރޫޕުގެ ފުލުގައި އޮވެގެންނެވެ. އެގޮތުން މާޒިޔާއަށް ކުޅުނު ހަ މެޗުން ހަ ޕޮއިންޓް ލިބިފައިވާއިރު، ތިންވަނައިގައި އޮތް މޯހަން ބަގާނަށް ހަ މެޗުން ވަނީ ހަތް ޕޮއިންޓް ލިބިފައެވެ.
މި ގްރޫޕުން އިންޓަ ޒޯން ޕްލޭއޮފް ސެމީ ފައިނަލުގެ ޖާގައެއް ހޯދީ އިންޑިއާގެ އޮޑީޝާ އެފްސީއެވެ. އެ ޓީމުން ވަނީ ފަހު މެޗުގައި ބަންގްލަދޭޝްގެ ބަޝުންދަރާ ކިންގްސް އަތުން 1-0 ގެ ނަތީޖާއަކުން މޮޅުވެފައެވެ. އެއާއެކު އޮޑީޝާ އެއްވަނަ ހޯދީ ހަ މެޗުން 12 ޕޮއިންޓާއެކުއެވެ. އަދި ދެވަނައިގައި އޮތް ބަޝުންދަރާއަށް ހަ މެޗުން ލިބިފައިވަނީ 10 ޕޮއިންޓެވެ.