އިނގިރޭސި ޕްރިމިއާ ލީގުގައި ރޭ އެވަޓަންއާ ދެކޮޅަށް ކުޅުނު މެޗުން ޗެލްސީ ބަލިވެއްޖެއެވެ.
ރަށުން ބޭރުގައި ކުޅުނު މެޗުން ޗެލްސީ ބަލިވީ 2-0 ގެ ނަތީޖާއަކުންނެވެ.
މި މެޗުން ޗެލްސީ ބަލިވިއިރު، ލީގުގައި އެންމެ ފަހުން ކުޅުނު ދެ މެޗުންވެސް އެ ޓީމު ވަނީ ބަލިވެފައެވެ. އަދި މިއީ އެވަޓަންގެ ދަނޑުގައި ޗެލްސީއާ ދެކޮޅަށް ކުޅެ އެ ޓީމު ޖެހިޖެހިގެން މޮޅުވި ފަސްވަނަ މެޗެވެ. އެންމެ ފަހުން އެވަޓަންގެ ދަނޑުގައި ޗެލްސީއަށް މޮޅެއް ހޯދިފައިވަނީ 2017 ވަނަ އަހަރެވެ.
މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، މި ހާފުގައި ގިނަ ވަގުތު ބޯޅަ ހިފަހައްޓައިގެން ކުޅުނީ ޗެލްސީންނެވެ. އަދި މި ހާފުގައި އެންމެ ހުސް ފުރުސަތެއް ލިބުނީ އެ ޓީމުގެ ޒުވާން މިޑްފީލްޑަރު ކޯލް ޕަލްމާއަށެވެ. ނަމަވެސް އޭނާ ފޮނުވާލި ބާރު ހަމަލާ އެވަޓަންގެ ގޯލްކީޕަރު ޖޯޑަން ޕިކްފަޑް ވަނީ ހުޝިޔާރުކަމާއެކު ދިފާއުކޮށްފައެވެ.
މި މެޗުގެ ދެވަނަ ހާފުގައި އެވަޓަންއިން ކުޅުން ރަނގަޅުކުރިއިރު، މި ހާފު ފަށައިގެން ނުވަވަނަ މިނެޓުގައި އެ ޓީމުން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ މިޑްފީލްޑަރު އަބުދުލަޔޭ ޑޮކޫރޭއެވެ. އަދި މެޗުގެ އިތުރު ވަގުތުގައި އެވަޓަންއިން ވަނީ ލީޑު ފުޅާކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ޒުވާން ފޯވާޑް ލުވިސް ޑޯބިންއެވެ.
މި މޮޅާއެކު އެވަޓަން ވަނީ ރެލިގޭޝަން ޒޯނާ ހަތަރު ޕޮއިންޓް ފެއަށް ޖެހިލާފައެވެ. އެގޮތުން ކުޅުނު 16 މެޗުން އެވަޓަންއަށް 13 ޕޮއިންޓް ލިބިފައިވާއިރު، އެ ޓީމު މި ވަގުތު އޮތީ ތާވަލުގެ 17 ވަނައިގައެވެ. އަދި މި މެޗުން ބަލިވި ޗެލްސީ އޮތީ ތާވަލުގެ 11 ވަނައިގައި ކުޅުނު 16 މެޗުން ލިބުނު 19 ޕޮއިންޓާއެކުއެވެ.