މިޞްރުގެ ރިޔާސީ އިންތިޚާބުގެ ވޯޓުލުން ފެށިގެން ކުރިއަށްދާއިރު، ރައީސް ޢަބްދުލް ފައްތާޙް އަލް-ސީސީ އިންތިޚާބު ކާމިޔާބު ކުރައްވައި، ތިންވަނަ ރިޔާސީ ދައުރަކަށް އިންތިޚާބުވެ ވަޑައިގަންނަވާނެ ކަމަށް ބެލެވެން ފަށައިފިއެވެ. ރިޔާސީ އިންތިޚާބުގެ ވޯޓުލުން ފަށާފައި ވަނީ ޑިސެންބަރު 10 ވަނަ ދުވަހު މިޞްރު ގަޑިން ހެނދުނު 9 ޖެހިއިރުއެވެ. އަދި، ޑިސެންބަރު 12 ވާ އަންގާރަ ދުވަހުގެ ރޭގަނޑު 9 ޖެހުމާ ހަމައަށް ވޯޓުލުން ކުރިއަށް ދާނެއެވެ.
މިޞްރުގެ އިންތިޚާބުތަކާ ބެހޭ އިދާރާއިން ބުނީ ރިޔާސީ އިންތިޚާބުގެ ރަސްމީ ނަތީޖާ ޑިސެންބަރު 18 ވަނަ ދުވަހު އިޢުލާނު ކުރެވޭނެ ކަމަށް ބެލެވޭ ކަމުގައެވެ. މި އިންތިޚާބުގައި ވޯޓުލުމުގެ ޙައްޤު ލިބިފައިވާ މީހުންގެ ޢަދަދު 67 މިލިޔަނަށް އަރައެވެ. ނަމަވެސް، އެ ޤައުމުގައި އެންމެ ފަހުން ބޭއްވި އިންތިޚާބުތަކަށް ބަލާއިރު، ވޯޓުލާ މީހުންގެ ޢަދަދު މި ފަހަރު ވެސް އިތުރުވާނެ ކަމަށް ނުބެލެވޭ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
މި އިންތިޚާބު ކާމިޔާބު ކުރައްވައި، ރިޔާސީ ތިންވަނަ ދައުރެއް ސީސީ ކަށަވަރު ކުރައްވާނެ ކަމަށް ބެލެވުނު ނަމަވެސް، އޭނާއަށް ބޮޑެތި ގޮންޖެހުންތަކެއް އެބަހުއްޓެވެ. އޭގެ ތެރޭގައި، އެ ޤައުމުގެ އިޤުތިޞާދަށް ކުރިމަތިވެފައިވާ ހީނަރު ކަމާއި، ތަކެތީގެ އަގުތައް އިންތިހާއަށް އުފުލުމާއި، ފައިސާގެ އަގު ވެއްޓުން ފާހަގަ ކޮށްލަން ޖެހެއެވެ.
މަސްރަޙު ދިރާސާ ކުރާ ފަރާތްތަކުން ބުނީ، ވޯޓުލާ މީހުން އެންމެ ބޮޑަށް ވިސްނާނެ އެއް ކަމަކީ އެ ޤައުމުގެ އިޤުތިޞާދީ ޙާލަތު ކަމުގައެވެ. މިޞްރުގެ އިޤުތިޞާދު އަނދަވަޅަކަށް ވެއްޓިފައިވާއިރު، ތަކެތީގެ އަގުތައް ވަނީ 40 އިންސައްތައަށް އުފުލިފައެވެ. އަދި، އެ ޤައުމުގެ ފައިސާގެ އަގު ވަނީ ދެބައިކުޅަ އެއްބައި ދަށްވެފައެވެ. މިޞްރަށް މިހާރު ކުރިމަތިވެފައިވާ އިޤުތިޞާދީ ޙާލަތުގެ ކުރިން ވެސް 106 މިލިޔަން މީހުންގެ އާބާދީއެއް އޮންނަ މިޞްރުގެ އާބާދީގެ ދެބައިކުޅަ އެއްބައި ރައްޔިތުން ދިރުއުޅެމުން ގޮސްފައި ވަނީ ފަޤީރު ހާލުގައެވެ.
މި ހުރިހާ ގޮންޖެހުންތަކެއް ހުރި ނަމަވެސް، އަލް-ސީސީ ފަސޭހަކަމާ އެކު އިންތިޚާބު ކާމިޔާބު ކުރައްވާނެ ކަމަށް ބެލެވޭ ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ. އެއް ސަބަބަކީ، މިޞްރުގައި ހަރުދަނާ އިދިކޮޅު ޕާޓީއެއް ނެތުމެވެ. އަދި، އިންތިޚާބުގައި އޭނާއާ ވާދަ ކުރައްވާ ކެނޑިޑޭޓުންނަށް ބޮޑު ތަރުހީބެއް ނެތުމެވެ.
ސީސީގެ ވެރިކަމުގައި، އޭނާގެ ސަރުކާރާ ދެކޮޅު އެތަކެއް ހާސް ބަޔަކު ސިޔާސީ ކުށްވެރިންގެ ގޮތުގައި ވަނީ ޖަލަށް ލައިފައެވެ. އަދި، ޣައްޒާގައި ޔަހޫދީން ހިންގަމުންދާ ލާއިންސާނީ އުދުވާނާ ގުޅިގެން، ރިޔާސީ އިންތިޚާބުގެ ކެމްޕޭނަށް ޢާންމު ރައްޔިތުން ދީފައިވާ އަހަންމިއްޔަތު ކަން ކުޑަ ކަމުގައި ވެސް މަސްރަޙު ދިރާސާ ކުރާ ފަރާތްތަކުން ބުނެއެވެ.
މި އިންތިޚާބުގައި ސީސީއާ ވާދަ ކުރައްވާ ކެނޑިޑޭޓުންނަކީ އިޖިޕްޝަން ސޯޝަލް ޑިމޮކްރެޓިކް ޕާޓީގެ ކެނޑިޑޭޓު ފަރީދު ޒަހްރާނާއި، އަލް-ވަފްދު ޕާޓީގެ ކެނޑިޑޭޓު ޢަބްދުއްސަނަދީ ޔަމާމަތާއި، ރިޕަބްލިކަން ޕީޕަލްސް ޕާޓީގެ ކެނޑިޑޭޓު ޙާޜިމް ޢުމަރެވެ. މިޞްރުގެ ރައީސް ކަމުގެ މަޤާމަށް ސީސީ އިންތިޚާބުވެ ވަޑައިގެންނެވީ މުސްލިމް ބްރަދަރހުޑްގެ ކުރީގެ ރައީސް މުޙައްމަދު މުރްސީގެ ވެރިކަން ވައްޓައިލުމަށް ފަހު 2013 ވަނަ އަހަރުއެވެ.
އެއަށްފަހު، 2014 އަދި 2018 ވަނަ އަހަރު ބޭއްވި ރިޔާސީ އިންތިޚާބުތައް ސީސީ ވަނީ ބޮޑު އަޣުލަބިއްޔަތަކުން ކާމިޔާބު ކުރައްވައިފައެވެ. އޭނާއަކީ މިޞްރުގެ އަސްކަރިއްޔާގައި ގިނަ އަހަރުތަކެއް ވަންދެން ޚިދުމަތް ކުރައްވާފައިވާ ބޭފުޅެކެވެ.