ޔަހޫދީ ސިފައިން ލުބުނާނަށް އަމާޒުކޮށް ދިން ވަރުގަދަ ޙަމަލާތަކެއްގައި އެ ޤައުމުގެ ސިފައިންގެ މީހަކު ޝަހީދުކޮށްލުމަށް ފަހު، އެ ކަމާ މެދު ހިތާމަކުރާ ކަމަށް ބުނެފިއެވެ. ލުބުނާނުގެ އަސްކަރިއްޔާގެ މަރުކަޒަކަށް ޔަހޫދީ ފައުޖުން ޙަމަލާ ދީފައި ވަނީ އަސްކަރީ ޓޭންކު ނުވަތަ އާޓިލަރީ ބަޑި ބޭނުން ކޮށްގެންނެވެ. މި ޙަމަލާގައި ސިފައިންގެ އެކަކު ޝަހީދުވެފައިވާއިރު، އިތުރު ތިން މީހުން ޒަޚަމު ވެފައިވާ ކަމުގައި ލުބުނާނުގެ އަސްކަރިއްޔާއިން ބުނެއެވެ.
މި ޙަމަލާއާ ގުޅޭ ގޮތުން ޔަހޫދީ ފައުޖުން ބުނީ، ލުބުނާނުގެ އަސްކަރިއްޔާގެ މަރުކަޒަކަށް ޙަމަލާ ދެވިފައި ވަނީ އޮޅުމަކުން ކަމުގައެވެ. އަދި، މި ޙަމަލާގައި ލުބުނާނުގެ ސިފައިންގެ މީހަކު ޝަހީދުވެފައިވާތީ އެ ކަމާ މެދު ހިތާމަކުރާ ކަމުގައެވެ. އަދި، އެ ޙަދިސާ ތަހުޤީޤު ކުރުމުގެ މަސައްކަތް ފަށާފައިވާ ކަމުގައެވެ. ނަމަވެސް، މި ކަމާ މެދު މަޢާފަށް އެދޭ ކަމުގައި ޔަހޫދީ ފައުޖުން ބުނެފައެއް ނުވެއެވެ.
އޮކްޓޫބަރު 7 ވަނަ ދުވަހު ޣައްޒާގެ މުސްލިމުންނާ ދެކޮަޅަށް ޔަހޫދީ ފައުޖުން ފެށި ލާއިންސާނީ އުދުވާނާ ގުޅުވައި އެ މީހުން ދަނީ ލުބުނާނުގައި ހަރަކާތްތެރިވާ ހަތިޔާރު އެޅި ޖަމުޢިއްޔާތަކަށް ވެސް ހަމަލަ ދެމުންނެވެ. ލުބުނާނަށް ދެމުންދާ ހަމަލަތަކަކީ އެ ޤައުމުގައި ހަރަކާތްތެރިވާ ޙިޒްބުالله ޖަމާޢަތާއި ޙަމާސްގެ ހަތިޔާރުއެޅި ގޮފި - ޢިއްޒުއްދީން އަލް-ޤައްސާމް ބްރިގޭޑްސްގެ މުޖާހިދުންނަށް އަމާޒުކޮށް ދެމުންދާ ހަމަލަތަކެއް ކަމުގައި ޔަހޫދީން ބުނެއެވެ. ލުބުނާނުގެ އަސްކަރިއްޔާގެ އަމާޒަކަށް ހަމަލަދީފައި މި ވަނީ އެ ހަމަލަތަކުގެ ތެރެއިންނެވެ.
މިއީ، އޮކްޓޫބަރު 7 ވަނަ ދުވަހު ޔަހޫދީ ސިފައިންގެ އުދުވާންތައް ފެށި ފަހުން ލުބުނާނުގެ އަސްކަރިއްޔާއަށް ޙަމަލާ ދީ، ސިފައިންގެ މީހަކު ޝަހީދު ކޮށްލާފައިވާ ފުރަތަމަ ފަހަރެވެ. ލުބުނާނުގައި ހަރަކާތްތެރިވާ އދގެ ސުލްޙަ ބަލަހައްޓާ ސިފައިންގެ އުޅަނދުތަކަށް އަމާޒުކޮށް ވެސް ޔަހޫދީ ސިފައިން ދާދި ފަހުން ނުރައްކާތެރި ހަމަލަތަކެއް ދީފައިވާ ކަން ފާހަގަ ކުރެވެއެެވެވެ. އެހެންކަމުން، މިއީ އޮޅިގެން ދެވުނު ހަމަލަތަކެއް ކަމަށް ބެލުމުގެ ފުރުޞަތު ކުޑައެވެ.
ލުބުނާނުގެ އަސްކަރިއްޔާއަށް އަމާޒުކޮށް ޔަހޫދީ ފައުޖުން ހަމަލަ ދީފައި ވަނީ ގަސްދުގައި ކަމަށް ބެލެވޭ ކަމުގައި މަސްރަޙު ދިރާސާ ކުރާ ބައެއް ފަރާތްތަކުން ޤަބޫލު ކުރެއެވެ. އެ ގޮތަށް ޤަބޫލު ކުރަން ޖެހޭ ސަބަބުތައް ގިނައެވެ. އެއް ސަބަބަކީ، ޙިޒްބުاللهގެ ހަމަލަތައް ހުއްޓައިނުލައިފި ނަމަ، ލުބުނާނާއި ވެރިރަށް ބެއިރޫތު ސުންނާފަތި ކޮށްލާނެ ކަމުގެ އިންޒާރު ޒަޔަނިސްޓު އިސްރާޢީލުގެ ޖައްބާރު ބޮޑުވަޒީރު ބެންޖަމިން ނަތަންޔާހޫ ދީފައިވުމެވެ.