ކަކޫ ހަލާކުވެ ލިވަޕޫލްގެ ޑިފެންޑަރު ޖޮއެލް މަޓިޕަށް މި ސީޒަނުގައި ދެން ނުކުޅެވޭނެ ކަމަށް އެ ކުލަބުން ބުނެފިއެވެ.
ލިވަޕޫލްގެ ޑިފެންޑަރަށް އަނިޔާވީ އިނގިރޭސި ޕްރިމިއާ ލީގުގައި މިދިޔަ އާދީއްތަ ދުވަހު ފުލަމް އަތުން 4-3 ގެ ނަތީޖާއަކުން ލިވަޕޫލް މޮޅުވި މެޗުގައެވެ. އެ މެޗުގެ 20 މިނެޓު ތެރޭގައި އަނިޔާވުމުން އޭނާ ބާލަންވެސް ޖެހުނެވެ. މަޓިޕަށް އަނިޔާވުމުން ލިވަޕޫލުން ކުރިއަށް އޮތް ޖެނުއަރީ ޓްރާންސްފާގައި ޑިފެންޑަރަކު ހޯދާނެ ކަމަށް ބެލެވެއެވެ.
މިހާރު ޕްރިމިއާ ލީގުގައި އެއްވަނައިގައިވާ އާސެނަލަށްވުރެ ދެ ޕޮއިންޓުގެ ފަހަތުން ލީގުގެ ދެވަނައިގައި އޮތުމާއި ޔުއެފާ ޔޫރޮޕާ ލީގުގެ ނޮކްއައުޓް ބުރަށް ގޮސްފައިވާތީވެ، ލިވަޕޫލުން ޓީމު ވަރުގަދަކުރާނެ ކަމަށް ބެލެވެއެވެ.
ލިވަޕޫލާއެކު ހަދާފައިވާ އެއްބަސްވުމުގެ ފަހު އަހަރު ހޭދަކުރަމުން އަންނަ މަޓިޕަކީ މީހެ ހަތް އަހަރު ކުރިން ޖަރުމަނުގެ ޝާލްކޭއިން ލިވަޕޫލަށް ގެނައި ކުޅުންތެރިއެކެވެ. އޭނާ ވަނީ މިހާތަނަށް އެ ޓީމަށް 11 ލަނޑު ޖަހައި 201 މެޗު ކުޅެދީފައެވެ.