އިނގިރޭސި ޕްރިމިއާ ލީގު ތާވަލްގެ ފުލުގައި އޮތް ޝެފީލްޑް ޔުނައިޓެޑް އަތުން މޮޅުވެ, ލިވަޕޫލުން އާސެނަލާ ދެ ޕޮއިންޓް ގާތަށް ޖެހިލައިފިއެވެ.
މެޗުގައި ލިވަޕޫލަށް ފުރަތަމަ ލަނޑު 37 ވަނަ މިނެޓްގައި ޖަހައި ދިނީ ވާޖިލް ވެންޑައިކެވެ. އޭނާ އަށް ލަނޑު ޖަހަން ފުރުސަތު ތަނަވަސްކޮޮށް ދިނީ މިހާރު ތަފާތު ފޯމެއްގައި ހުރި ޓްރެންޓް އެލެގްޒެންޑާ އާނޯލްޑެވެ. ލިވަޕޫލްގެ ދެވަނަ ލަނޑު ފަހު ވަގުތު ޖެހީ ޑޮމިނިކް ސޯބޯސްލައި އެވެ. އެމެޗުން މޮޅުވެގެން ރެލިގޭޝަނުން ކުރިއަށް ޖެހިލުމުގެ ފުރުޞަތު ޝެފީލްޑަށް އޮތަސް, މިނަތީޖާއާއެކު އެޓީމް އޮތީ 5 ޕޮއިންޓާއެކު ފުލުގައެވެ. މިސީޒަންގެ ލީގުގައި ލިވަޕޫލް މިހާތަނަށް ބަލިވީ އެއް މެޗުންނެވެ.
ރޭގެ ނަތީޖާ ތަކާއެކު ލީގުގެ އެއް ވަނައިގައި އާސެނަލް އޮތީ 15 މެޗުން 36 ޕޮއިންޓް ހޯދައިގެންނެވެ. ދެ ވަނައިގައި އޮތް ލިވަޕޫލަށް ވަނީ 15 މެޗުން 34 ޕޮއިންޓް ހޯދައިފަ އެވެ. އެސްޓަން ވިލާ ތިން ވަނައިގައި އޮތީ 15 މެޗުން 32 ޕޮއިންޓާ އެކު އެވެ.
އެންމެ ފަހުން ލީގުގައި ކުޅުނު ހަތަރު މެޗުންވެސް ސިޓީ އަށް މޮޅެއް ލިބިފައިނުވާއިރު، އެ ޓީމު ލީގުގެ ހަތަރެއްގައި އޮތީ 15 މެޗުން 30 ޕޮއިންޓް ހޯދައިގެންނެެވެ. ފަސް ވަނައިގައި އޮތް ޓޮޓެންހަމް ހޮޓްސްޕާސް އަށް ވަނީ 14 މެޗުން 27 ޕޮއިންޓް ލިބިފަ އެވެ. ޔުނައިޓެޑް ހަ ވަނައިގައި އޮތީ 15 މެޗުން 27 ޕޮއިންޓް ހަމަކޮށްގެންނެވެ.