މަހިބަދޫ ޒުވާނުންގެ 20 ވަނަ ފުޓްބޯޅަ މުބާރާތުގެ ޗެމްޕިއަންކަން 11 ވަނަ ފަހަރަށް ޖިބިއްލީ ސްޕޯޓްސް ކުލަބުން ހޯދައިފިއެވެ.
މަހިބަދޫ ޕެލޭ ސްޓޭޑިއަމްގައި ބުދަ ދުވަހުގެ ހަވީރު ކުޅުނު ފައިނަލް މެޗު މުބާރާތުގެ ތާރީހުގައި އެންމެ ކާމިޔާބު ޓީމު ކަމަށްވާ ޖިބިއްލީ ހޯދީ ފައިނަލުގައި އެންޓީ ޔުނައިޓެޑާއި ވާދަކޮށް 2-1 ގެ ނަތީޖާއަކުން މެޗު ކާމިޔާބުކޮށްގެންނެވެ.
ވާދަވެރި ކުޅުމެއް ފެނިގެންދިޔަ މި މެޗުގައި ފުރަތަމަ ލަނޑުޖަހާ ލީޑު ނެގީ ޖިބިއްލީންނެވެ. ފުރަތަމަ ހާފުގެ ފުރިހަމަ ވަގުތު ހަމަވާން ތިން މިނެޓަށްވެފައި ވަނިކޮށް މި ލަނޑު އެ ޓީމަށް ކާމިޔާބުކޮށްދިނީ އިބްރާހީމް މަހުދީ ހުސެއިން (ފޭދޫ އިއްބެ) އެވެ.
އެންޓީން ލަނޑުޖެހިތާ ދެ މިނެޓުފަހުން މެޗުގެ 44 ވަނަ މިނެޓުގައި ޖިބިއްލީ ނަތީޖާ ހަމަހަމަކުރި އެވެ. މި ލަނޑު އެ ޓީމަށް ކާމިޔާބުކޮށްދިނީ އަހަދުالله އެވެ. ފުރަތަމަ ހާފު ނިމުނުއިރު 1-1 ގެ ނަތީޖާއަކުން ދެ ޓީމު އެއްވަރުކޮށް އޮތް ނަމަވެސް ދެވަނަ ހާފުގައި ޖިބިއްލީން ވަނީ ޓީމުގެ ކުޅުން އިތުރަށް ވަރުގަދަކޮށް ލީޑު ނަގާފައެވެ. މެޗުގެ 69 ވަނަ މިނެޓްގައި ޖިބިއްލީއަށް ދެވަނަ ލަނޑު ކާމިޔާބު ކޮށްދީފައިވަނީ މެޗުގައި މޮޅު ކުޅުމެއް ދެއްކި އަހުމަދު ރިޒުވާން (ރިޒޭ) އެވެ.
ފައިނަލް މެޗުގެ މޮޅު ކުޅުންތެރިއަކަށް ޖިބިއްލީގެ ގާސިމް ސައްމާމު ހޮވުނުއިރު އެންމެ ގިނަ ލަނޑު ޖެހި ކުޅުންތެރިއަކަށް ހޮވުނީ އެންޓީ ޔުުނައިޓެޑުގެ ހުސެއިން ނިޔާޒް މުހައްމަދު (ބޮކުރީ) އެވެ. އޭނާ ވަނީ މި މުބާރާތުގައި ޖުމްލަ 9 ލަނޑު ކާމިޔާބުކޮށްފައެވެ.
މުބާރާތުގެ އެންމެ މޮޅު ގޯލް ކީޕަރަކަށް އެކްސްޕްރެސްގެ އަހްމަދު ނައުފަލް ހޮވުނުއިރު އެންމެ މޮޅު ޑިފެންޑަރަކަށް ހޮވުނީ އެންޓީ ޔުނައިޓެޑުގެ ހިޝާމް ސަލީމެވެ. މީގެ އިތުރުން މުބާރާތުގެ އެންމެ މޮޅު މިިޑްފީލްޑަރަކަށް ޖިބިއްލީގެ އަބްދުﷲ ޖުނެއިދު ހޮވުނުއިރު އެންމެ މޮޅު ފޯވާޑާއި މުބާރާތުގެ އެންމެ މޮޅު ކުޅުންތެރިއާގެ މަޤާމު ހޯދީ އެންޓީ ޔުނައިޓެޑުގެ ބޮކުރީ އެވެ. އަދި އެންމެ އުންމީދީ ކުޅުންތެރިއަކަށް ހޮވުނީ ޖިބިއްލީ ސްޕޯޓްސްގެ އަލީ އިޝްފާގް ހަސަން މަޖީދެވެ.
ޖިބިއްލީން ވަނީ މި މުބާރާތުގެ ޗެމްޕިއަންކަން 2010, 2012، 2013، 2014, 2016, 2017, 2018, 2019, 2021, 2022, ވަނަ އަހަރު ހޯދާފައެވެ.