ޓައިމް މަޖައްލާގެ އަހަރުގެ އެންމެ މޮޅު އެތުލީޓުގެ މަގާމު އާޖެންޓީނާ އަދި އިންޓަ މިއާމީގެ ފޯވާޑް ލިއޮނަލް މެސީ ހޯދައިފި އެވެ.
އުމުރުން 36 އަހަރުގެ މެސީ ވަނީ 2023 ވަނަ އަހަރު މޮޅު ކުޅުމެއް ދައްކާ، ގިނަ ކާމިޔާބީތަކެއް ހޯދާފައެވެ. ޖުލައި މަހު މިއާމީއާ ގުޅުނު މެސީ ވަނީ ހުރިހާ މުބާރާތެއްގައި ކުޅުނު 14 މެޗުން 11 ގޯލު ޖަހައި، އެޓީމަށް ފުރަތަމަ ފަހަރަށް ތަށި ލީގްސް ކަޕް އުފުލުމަށް އެހީތެރިވެދީފަ އެވެ.
ޓައިމް މެގަޒިންގެ އަހަރުގެ ކުޅިވަރު ކުޅުންތެރިޔާގެ އެވޯޑަށް މެސީއާ ވާދަކުރީ ޖިމްނާސްޓް ސިމޯން ބައިލްސް އާއި ފެތުންތެރިޔާ މައިކަލް ފެލްޕްސް އަދި އެންބީއޭގެ ސުޕަސްޓާ ލެބްރޯން ޖޭމްސްއެވެ.
ފްރާންސް ފުޓްބޯޅަ މަޖައްލާއިން ދޭ ބަލޮންޑޯ އެވޯޑް އަށްވަނަ ފަހަރަށް އާޖެންޓީނާގެ ތަރި ލިއޮނެލް މެސީ ވަނީ ހޯދާފައެވެ. ދުނިޔޭގެ ފުޓްބޯޅައިގެ އެންމެ މޮޅު ކުޅުންތެރިޔާއަށް ދޭ ބަލޮންޑޯ އެވޯޑަކީ 1956 ވަނަ އަހަރުން ފެށިގެން ދެމުން އަންނަ އެވޯޑެކެވެ.
މި އަހަރުގެ އެވޯޑް މެސީ ހާސިލުކުރިއިރު، މި އެވޯޑް އެންމެ ގިނައިން ހޯދާފައިވާ ކުޅުންތެރިޔަކީވެސް މެސީއެވެ. އެގޮތުން މެސީ އަށް ފަހަރު ބަލޮންޑޯ އެވޯޑް ހޯދާފައިވާއިރު، އޭނާއާ އެންމެ ވާދަވެރި ޕޯޗުގަލުގެ ތަރި ކްރިސްޓިއާނޯ ރޮނާލްޑޯއަށް މި އެވޯޑް ހާސިލުކުރެވިފައިވަނީ ފަސް ފަހަރެވެ. މި އަހަރުގެ ކުރިން މެސީ ބަލޮންޑޯ އެވޯޑް ހާސިލުކޮށްފައިވަނީ 2009، 2010، 2011، 2012، 2015، 2019 އަދި 2021 ވަނަ އަހަރެވެ.
މި ފަހަރުގެ ބަލޮންޑޯ އެވޯޑް މެސީ ހޯދިއިރު، އޭނާ ވަނީ އާޖެންޓީނާއާއެކު މިދިޔަ އަހަރުގެ ފީފާ ވޯލްޑް ކަޕް ކާމިޔާބުކޮށްފައެވެ. އެ މުބާރާތުގެ އެންމެ މޮޅު ކުޅުންތެރިޔަކަށް ހޮވުނީވެސް މެސީއެވެ. އަދި ފީފާއިން ހޮވާ އަހަރުގެ އެންމެ މޮޅު ކުޅުންތެރިޔާގެ މަޤާމުވެސް މެސީ ހޯދާފައިވާއިރު، މިދިޔަ ސީޒަނުގައި އޭނާ ވަނީ ކުރީގެ ކުލަބު ޕީއެސްޖީއާއެކު ފްރެންޗް ލީގުވެސް ކާމިޔާބުކޮށްފައެވެ.
ޓައިމް އަކީ ނިއުޔޯކް ސިޓީގައި ހުންނަ އެމެރިކާގެ ނޫސް މަޖައްލާއެކެވެ. މި މަޖައްލާއިން ހަފްތާއަކު އެއްފަހަރު ޝާއިއު ކުރި ނަމަވެސް 2020 ވަނަ އަހަރުގެ މާޗް މަހުން ފެށިގެން ކޮންމެ ދެ ހަފްތާއަކުން އެއް ހަފްތާއަކަށް ބަދަލުވި އެވެ.