ސަރުކާރުގެ މަސްކުންފުނި މިފްކޯއަކީ ސައްތައިންސައްތަ ސަރުކާރުގެ ހިއްސާވާ ކުންފުންޏަކަށް ބަދަލުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ. ރައީސުލްޖުމްހޫރިއްޔާގެ އޮފީހުގައި ބޭއްވެވި ނޫސްވެރިންގެ ބައްދަލުވުމުގައި ރައީސް ޑރ. މުޢިއްޒު ވަނީ މިފްކޯއަށް ގެންގުޅުއްވާ ތަސައްވުރު ހާމަކުރައްވާފައެވެ.
ރައީސް ވިދާޅުވީ މަސްވެރިކަން ކުރިއެރުވުމަށް މެނިފެސްޓޯގައި ކަނޑައަޅަފައިވާ އެންމެ މުހިންމު ކަމަކީ މިފްކޯއަކީ ސައްތައިންސައްތަ ސަރުކާރު ހިއްސާވާ ކުންފުންޏަކަށް ހެދުންކަމަށެވެ. އެހެންކަމުން އެސްޓީއޯގެ ސަބްސިޑަރީ ކުންފުންޏެއްގެ ގޮތުގައި މިފްކޯ އޮތް އޮތުން ނިމުމަކަށް ގެނައުމަށް މިއަދު ކެބިނެޓުން ނިންމެވީކަމަށް ރައީސް ވިދާޅުވިއެވެ. އެކަމުގެ ބޭނުމަކީ މަސްވެރިކަމުގެ ދާއިރާ ހަރުދަނާކޮށް މަސްވެރިންނަށް ވެވަޑައިގެންފައިވާ ވަޢުދު ހާސިލްކުރުމަށް މަގުފަހިކުރުންކަމަށްވެސް ރައީސް ވިދާޅުވިއެވެ.
"އަޅުގަނޑުމެން ނިންމާފައިވާނެ މަސްވެރިންނަށް ޚާއްޞަ ކޯޕަރޭޓިވްއެއް ޤާއިމްކޮށް އެ ކޯޕަރޭޓިވްއަކީ މިފްކޯގެ ހިއްސާދާރަކަށް ހަދަން. އެ ނިންމުންވެސް ކުރިއަށް ގެންދިއުމަށް މަގުފަހިވާނީ މިކަންތައް ކުރިއަށް ގެންދިޔާމަ." ރައީސް ވިދާޅުވިއެވެ.
މަސްވެރިކަމުގެ ދާއިރާގެ ގިނަ ކަންކަން ކުރިއަށް ގެންދިއުން ގުޅިފައިވަނީ މިފްކޯ ހަރުދަނާކުރުމާކަމަށްވެސް ރައީސް ވިދާޅުވިއެވެ.
ރައީސް ވިދާޅުވީ މިފްކޯ ހަރުދަނާކުރުމަށް ފިނޭންސް މިނިސްޓްރީއާއި އެސްޓީއޯއާއެކު މަސައްކަތްތަކެއް ކުރެވިފައިވާކަމަށެވެ. އިކޮނޮމިކް ކައުންސިލުން މިފްކޯގެ ދަރަނިތައް ރީސްޓްރަކްޗަރ ކުރާނެ ގޮތްތަަކެއް ހޮދަމުން އަންނަކަމަށެވެ. އަދި މިފްކޯ ފުޅާކޮށް،ހަ ރުދަނާކޮށް އިތުރު އައު ކަންކަންތައްތަކަށް މިފްކޯ ހުޅުވާލާނެކަމަށެވެ.
"ރާއްޖޭގެ އިޤްތިޞާދީ އިކޮނޮމިކް ޒޯން، އީއީޒެޑް ވަރަށް ބޮޑު. އަޅުގަނޑުމެންގެ އިކޮނޮމިކް މެނިފެސްޓޯގައިވެސް ހިމެނިން އެއްގޮތަކަށްވެސް ޓެޕް ނުކުރެވޭ މުޅި ސަރަހައްދަކަށް. އަޅުގަނޑު ބޭނުން މިފްކޯ ފުޅަކޮށް، ބޮޑެތި އޮޑިދޯނިފަހަރު ބަނދެގެން ނިކުމެ ބޮޑުކަނޑުން މަސްބާނާ އެންވަޔަރަމަންޓޤ ފްރެންޑުލީގޮތަށް މަސްބާނާ ވލިއުއެޑްކޮށް ބޭރުކުރަން. މިފަދަ ބައިވަރު ކަންކަމަށް އިންވެސްޓަރުން ހޯދުމާ މިފަދަ އެތައް ކަމަކަށް އަޅުގަނޑުމެން މަސައްކަތް ފަށާފައި މިވަނީ." ރައިސް ޑރ. މުޙައްމަދު މުޢިއްޒު ވިދާޅުވިއެވެ.
އެސްޓީއޯގެ ސަބްސިޑަރީ ކުންފުންޏެއް ގޮތުގައި މިފްކޯ ހަމަޖައްސާފައިވަނީ 2016 ވަނަ އަހަރުގެތެރޭގައެވެ. އެސްޓީއޯގެ ދަށުން މިފްކޯ ހިންގަމުން ދިޔުމަކީ މިފްކޯއަށް ގޮންޖެހުންތަކެއް ހުރި ކަމެއްކަމަށް ސަރުކާރުން ވިދާޅުވެއެވެ. މިފްކޯއަކީ ސަރުކާރުގެ މަސްކުންފުނީގެ ގޮތުގައި 1993 ވަނަ އަހަރު އުފައްދާފައިވާ ކުންފުންޏެކެވެ. އެކުންފުނީގެ ހަމައެކަނި ބޭނުމަކީ ރާއްޖޭގެ މަސްވެރިކަމުގެ ދާއިރާ ފުޅާކޮށް ރާއްޖޭގެ އިޤްތިޞާދަށް އޭގެ ނަފާ ހޯދައިދިނުމެވެ.
ވޭތުވެދިޔަ 30 އަހަރުގެ ތެރޭގައި މިފްކޯ ތަރައްޤީކުރުމަށްވެސް ގިނަ މަސައްކަތްތަކެއް ކުރިނަމަވެސް، މިފްކޯގެ މާލީ ހާލަތު ރަނގަޅު ކުރެވިފައެއް ނުވެއެވެ. މަސްވެރިކަމުގެ ސިނާއަތުގެ އިންޖީނަކީ މިފްކޯ ކަމަށާއި، މިފްކޯގެ ކޮޅަށް ޖެހުން މުހިންމުކަމަށް ސަރުކާރުން ވިދާޅުވެފައިިވެއެވެ.