މި މަހުގެ ތެރޭގައި ބޭއްވުމަށް ތައްޔާރުވާ ދެވަނަ ޑިވިޝަން ފުޓުބޯޅަ މުބާރާތުގައި 15 ޓީމު ބައިވެރިވެފައިވާ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނެފިއެވެ.
މުބާރާތް އެންމެ ފުރަތަމަ ބާއްވަން މަސައްކަތްކުރީ ނޮވެމްބަރު 20 ވަނަ ދުވަހުގައެވެ. އެއަށްފަހު އޭގެ ފަސް ދުވަސް ފަހުން މުބާރާތް ފަށާނެކަމަށް ވާހަކަ ދެކެވުނު ނަމަވެސް އެފްއޭއެމް ވަނީ ޑިސެމްބަރު 10 ގައި މުބާރާތް ފަށާނެކަން ހާމަކޮށްފައެވެ.
ދެވަނަ ޑިވިޝަން ފުޓްބޯޅަ މުބާރާތަކީ ގިނަ ޓީމްތަކަކުން ދުރާލާ ތައްޔާރުވަމުން އަންނަ އެއް މުބާރާތެވެ. އަދި މިހާރު ދިވެހި ފުޓުބޯޅައިގައި ޓީމުތަކުން ކުރާ ހަރަދުތަކަށް ބަލާއިރު އެންމެ އަގުބޮޑު މުބާރާތެވެ.
މިއަހަރުގެ މުބާރާތަށް އެންމެ ބޮޑު ތައްޔާރުވި ދެ ޓީމަކީ ރާއްޖޭގެ ފުޓުބޯޅައިގެ ރަސްކަން ކުރަމުން އަންނަ ނިއުރޭޑިއަންޓް ސްޕޯޓްސް ކުލަބާއި، ވިކްޓްރީ ސްޕޯޓްސް ކުލަބެވެ. މި ދެ ކުލަބުން ވަނީ ބިދޭސީ ކުޅުންތެރިންނާއި ފުރަތަމަ ޑިވިޝަނުގެ ވަރުގަދަ ކުޅުންތެރިންނާއެކު ވަރުގަދަ ސްކޮޑުތަކެއް އެކުލަވާލާފައެވެ.
މުބާރާަތް ލަސްކުރުމާއެކު ދެވަނަ ޑިވިޝަންގައި ވާދަކުރާ ގިނަ ކުލަބުތަކަށް ބޮޑު ގެއްލުމެއް ލިބޭނެ ކަމަށް އެ ކުލަބުތަކުން ވަނީ މީގެކުރިން ބުނެފައެވެ. ދެވަނަ ޑިވިޝަނަށް އެންމެ ވަރުގަދައަށް ތައްޔާރުވާ ޓީމުތަކުގެ ތެރޭގައި ވިކްޓްރީ ސްޕޯޓްސް ކުލަބާއި ނިއުރޭޑިއަންޓް ސްޕޯޓްސް ކުލަބު ހިމެނޭއިރު ދެ ކުލަބުންވެސް ވަނީ މީގެ ދެ މަހެއްހާ ދުވަސް ކުރިން ފަރިތަކުރުންތައް ފަށާފައެވެ.
މި ކުލަބުތަކުގެ އިތުރުން ތިންވަނަ ޑިވިޝަންގެ ތަށި ހޯދައިގެން ދެވަނަ ޑިވިޝަނަށް އެރި ބިސްބުރު ސްޕޯޓްސް ކުލަބާއި، މަސްއޮޑި ސްޕޯޓްސް ކުލަބުންވެސް އަންނަނީ ދެވަނަ ޑިވިޝަނަށް ދުރާލާ ތައްޔާރުވަމުންނެވެ. ދެވަނަ ޑިވިޝަނުގެ އެންމެ ފަހުގެ ޗެމްޕިއަން ޓީމަކީ ބުރު ސްޕޯޓްސް ކުލަބެވެ.