ނެޓްބޯލް ފެސްޓުގެ ނަމުގައި ބޭއްވި މުބާރާތުގެ އެންމެ ބޮޑު އަމާޒަކީ ނެޓްބޯޅައިގެ އައު ޖީލެއް ބިނާކުރުން ކަމަށާއި، މި ފެށުމަކީ އެ މަގުސަދު ހާސިލުކުރުމަށް އެޅިގެންދިޔަ ބޮޑު ބާރެއް ކަމަށް ފިއޮންތީ ސްޕޯޓްސް ކުލަބުގެ ރައީސް މުޙައްމަދު ނިޒާމް (ނިޒާމްބެ) ބުނެފިއެވެ.
މާލޭގެ ސްކޫލުތަކަށް ހުޅުވާލައިގެން ބޭއްވި ފުރަތަމަ ނެސްލޭ ކިޑްސް ނެޓްބޯލް ފެސްޓް 2023 ގައި ވާދަކުރި ފަސް ގްރޭޑުގެ ތެރެއިން ހަތަރު ގްރޭޑެއްގެ ޗެމްޕިއަންކަން ހޯދާފައިވަނީ އިސްކަންދަރު ސްކޫލުންނެވެ. ޖުމްލަ 14 ސްކޫލަކުން ހާހަކަށްވުރެ ގިނަ ދަރިވަރުންނާއި އޮފިޝަލުންގެ ބައިވެރިވުމާއެކު މި މުބާރާތް ކުރިއަށްދިޔައިރު މިއީ ރާއްޖޭގައި މިހާތަނަށް ބޭއްވި އެންމެ ބޮޑު ނެޓްބޯޅައިގެ އީދެވެ.
މުބާރާތް ކުރިއަށްދިޔައީ ގްރޭޑް ގްރޭޑް 1، ގްރޭޑް 2، ގްރޭޑް 3، ގްރޭޑް 4 އަދި ގްރޭޑް 5 އަށް ހުޅުވާލައިގެންނެވެ. މީގެތެރެއިން އިސްކަންދަރު ސްކޫލުން ވަނީ ގްރޭޑް ހަތަރެއް ފިޔަވާ އެހެން ހުރިހާ ގްރޭޑް ކެޓަގަރީން ޗެމްޕިއަންކަން ހޯދާފައެވެ. ގްރޭޑް ހަތަރެއްގެ ޗެމްޕިއަންކަން ހޯދާފައިވަނީ ހުރަވީ ސްކޫލެވެ.
"ޕީއެސްއެމް ސްޕޯޓްސް" އާ ވާހަކަދައްކަމުން ނިޒާމްބެ ބުނީ މި މުބާރާތް ކުރިއަށްދިޔައީ ގިނަ ގޮންޖެހުންތަކަކާއެކު ކަމަށާއި ނަމަވެސް ކާމިޔާބުކަމާއެކު މުބާރާތް ނިންމާލެވުނީ ވަރަށް ގިނަ ބައެއްގެ އެހީތެރިކަން ލިބިގެން ކަމަށެވެ. ވަކިން ހާއްސަކޮށް ސްކޫލުތަކާއި ބެލެނިވެރިން ދިން އެއްބާރުލުން ނިޒާމްބެ ފާހަގަކުރިއެވެ.
ނިޒާމްބެ ބުނީ މި ކުޅިވަރަކީ ރާއްޖޭގައި ކާމިޔާބުކަމާއެކު ކުރިއެރުވިދާނެ ކުޅިވަރެއްކަން މި މުބާރާތުން ހާމަވެގެންދިޔަ ކަމަށާއި އަމާޒަކީ މުސްތަގްބަލުގައި އިތުރު އަންހެން ބޭކަނބަލުންގެ ބައިވެރިވުމާއެކު މިފަދަ މުބާރާތްތަކެއް ބޭއްވުން ކަމަށެވެ.
މިއީ އަހަރުތަކެއް ވަންދެން ރާއްޖޭގައި ވަޅުޖެހިފައި އޮތް ނެޓްބޯޅައިގެ ފޯރި އަނެއްކާވެސް ގެނައުމުގެ މަގުސަދުގައި ފިއޮންތީ ސްޕޯޓްސް ކުލަބުން އިސްނަގައިގެން ބޭއްވި ފެސްޓިވަލެކެވެ. މި މުބާރާތުގެ ކާމިޔާބީއާއެކު ފިއޮންތީ ސްޕޯޓްސް ކުލަބުގެ އަމާޒަކީ މުޅި ރާއްޖެއަށް މި ފެސްޓިވަލް ފުޅާކުރުމެވެ.