މޯލްޑިވްސް ބްރޯޑްކާސްޓިން ކޮމިޝަން (އެމްބީސީ) އިން އިންތިޒާމުކޮށްގެން ބޭއްވި ބްރޯޑްކާސްޓް ކަޕް 2023 ގެ ޗެމްޕިއަންކަން ޔެސް ޓީވީން ހޯދައިފިއެވެ.
ބްރޯޑްކާސްޓިން ކޮމިޝަނުން މުޅިން އަލަށް ބޭއްވި މި މުބާރާތުގައި މި ފަހަރު ފަސް ޓީމެއް ބައިވެރިވި ނަމަވެސް، ފަހު ވަގުތު ވީޓީވީން ވަނީ މުބާރާތުގައި ނުކުޅެން ނިންމާފައެވެ. އެއާއެކު މުބާރާތުގައި ވާދަކުރި ޓީމުތަކަކީ ޔެސް ޓީވީގެ އިތުރުން އައިސް ޓީވީ އާއި، ޓީވީއެމް އަދި އެމްބީސީއެވެ.
ލީގު އުސޫލުން ކުރިއަށްދިޔަ މި މުބާރާތުގެ ފައިނަލުގައި ވާދަކުރީ ޔެސް ޓީވީ އާއި އައިސް ޓީވީއެވެ. ހުޅުމާލޭ ރެހެންދި ފުޓްސަލް ދަނޑުގައި ރޭ ކުޅުނު ފައިނަލް މެޗު ޔެސް ޓީވީން ކާމިޔާބުކޮށްފައިވަނީ 4-1 ގެ ނަތީޖާއަކުންނެވެ.
ފޯރިގަދަ ކުޅުމެއް ފެނިގެންދިޔަ މި މެޗުގައި ޔެސް ޓީވީގެ ލަނޑުތައް ޖަހައިދިނީ ދެ ލަނޑު ކާމިޔާބުކުރި ހުސެއިން އަމީން ނަސީރާއި، ހުސެއިން ހަމީދުގެ އިތުރުން މުޙައްމަދު އިބްރާހީމެވެ. މި މެޗުގައި އައިސް ޓީވީން ކާމިޔާބުކުރި ހަމައެކަނި ލަނޑު އެ ޓީމަށް ޖަހައިދިނީ މުޙައްމަދު ސަމީހެވެ.
މި މުބާރާތުގެ އެންމެ މޮޅު ކުޅުންތެރިޔާގެ މަގާމު ހޯދީ ޔެސް ޓީވީގެ ހުސެއިން ހަމީދެވެ. އަދި އެންމެ ގިނަ ލަނޑު ޖެހި ކުޅުންތެރިޔަކަށް ހޮވުނީ މުބާރާތުގައި 18 ލަނޑު ކާމިޔާބުކުރި ޔެސް ޓީވީގެ ހުސެއިން އަމީން ނަސީރެވެ. މީގެ އިތުރުން މި މުބާރާތުގެ ފެއާ ޕްލޭ ޓީމަކަށް ހޮވިފައިވަނީ ޓީވީއެމްއެވެ.