ޔޫރޯ 2024 ގެ ގްރޫޕް ސްޓޭޖުގައި އެންމެ ފަހުގެ ޗެމްޕިއަން އިޓަލީ އާއި ތިން ފަހަރު މުބާރާތް ކާމިޔާބުކޮށްފައިވާ ސްޕެއިން އަދި ކްރޮއޭޝިއާ އެއް ގްރޫޕެއްގައި ލައްވާލައިފިއެވެ.
އަންނަ އަހަރު ޖަރުމަނު ވިލާތުގައި ބޭއްވުމަށް ހަމަޖެހިފައިވާ މުބާރާތުގެ މަރުގެ ގްރޫޕުގެ ގޮތުގައި ހިމެނެނީ އިޓަލީ އާއި ސްޕެއިނުގެ އިތުރުން ކްރޮއޭޝިއާ އާއި އަލްބޭނިއާ ހިމެނޭ ގްރޫޕް ބީ އެވެ.
މުބާރާތުގެ ގުރު ނެގުމުގެ ރަސްމިއްޔާތު ބާއްވާފައިވަނީ ރޭ ޖަރުމަނުގެ ހަމްބާގުގައެވެ. އަންނަ އަހަރުގެ ޖޫންމަހުގެ ތެރޭގައި ބާއްވާ މި މުބާރާތުގެ ފުރަތަމަ ބައްދަލުކުރާ ޖަރުމަނާއި ސްކޮޓްލަންޑް ހިމެނެނީ ގްރޫޕް އޭގައެވެ. މި ގްރޫޕުގައި މި ދެ ޓީމުގެ އިތުރުން ދެން ހިމެނެނީ ސްވިޒަލޭންޑާއި އަދި ހަންގޭރީގައެވެ.
ތިން ފަހަރެއްގެ މަތިން ޔޫރޯ ކާމިޔާބުކޮށްފައިވާ ސްޕެއިން ހިމެނެނީ ގްރޫޕް ބީގައެވެ. މި ގްރޫޕުގައި ދެން ހިމެނެނީ ސްޕެއިން އާއެކު 2012 ގެ ޔޫރޯ ފައިނަލުގައި ކުޅުނު، އަދި އެންމެ ފަހުގެ ޗެމްޕިއަން އިޓަލީގެ އިތުރުން ކްރޮއޭޝިއާ އެވެ.
މީގެ އިތުރުން ގްރޫޕް ސީގައި ހިމެނެނީ އެންމެ ފަހުގެ ރަނަރަޕް އިންގްލެންޑާއި ޑެންމާކްގެ އިތުރުން ސްލޮވީނިއާ އާއި ސާބިއާއެވެ. އަދި ގްރޫޕް ޑީގައި ހިމެނެނީ 2000 ވަނަ އަހަރުގެ ޔޫރޯ ޗެމްޕިއަން ފްރާންސްގެ އިތުރުން އޮސްޓްރިއާ އާއި ނެދަލޭންޑްސް އެވެ. މި ގްރޫޕުގެ ހަތަރުވަނަ ޖާގަ ލިބޭނީ ޕޮލެންޑް، ވޭލްސް، ފިންލެންޑް އަދި އެސްޓޯނިއާގެ މެދުގައި ކުޅެވޭ ޕްލޭއޮފް މެޗުންނެވެ.
ގްރޫޕް އީގައި ހިމެނެނީ ބެލްޖިއަމް އާއި ރޫމޭނިއާ އަދި ސްލޮވާކިޔާ އެވެ. އަދި މި ގްރޫޕުގެ ފަހު ޖާގަ ލިބޭނީ އިޒްރޭލް، ބޮސްނިއާ، ޔޫކްރެއިން އަދި އައިސްލޭންޑްގެ މެދުގައި ކުޅެވޭ ޕްލޭއޮފް މެޗުތަކުން ކުރި ހޯދާ ޓީމަކަށެވެ. ގްރޫޕް އެފްގައި ހިމެނެނީ 2016 ވަނަ އަހަރުގެ ޗެމްޕިއަން ޕޯޗުގަލް އާއި ތުރުކީ އާއި ޗެކް ރިޕަބްލިކެވެ. ދެން މި ގްރޫޕުން ޖާގަ ލިބޭނީ 2004ގެ ޗެމްޕިއަން ގްރީސް، އާއި ޖޯޖިއާ އާއި ކަޒަކިސްތާން އަދި ލަގްޒަމްބާގްގެ ތެރެއިން ޓީމެކެވެ.
ޖަރުމަނު ވިލާތުގައި މި މުބާރާތް ބޭއްވުމަށް ތައްޔާރުވަނީ 10 ސިޓީއެއްގައެވެ.