މާލޭގެ ސްކޫލުތަކަށް ހުޅުވާލައިގެން ބޭއްވި ފުރަތަމަ ނެސްލޭ ކިޑްސް ނެޓްބޯލް ފެސްޓް 2023 ގައި ވާދަކުރި ފަސް ގްރޭޑުގެ ތެރެއިން ހަތަރު ގްރޭޑެއްގެ ޗެމްޕިއަންކަން އިސްކަންދަރު ސްކޫލުން ހޯދައިފިއެވެ.
ޖުމްލަ 14 ސްކޫލަކުން ހާހަކަށްވުރެ ގިނަ ދަރިވަރުންނާއި އޮފިޝަލުންގެ ބައިވެރިވުމާއެކު މި މުބާރާތް ކުރިއަށްދިޔައީ މި މަހުގެ 10-12 ގެ ނިޔަލަށެވެ. މުބާރާތުގެ ފަސް ގްރޭޑުގެ ފައިނަލް މެޗުތައް ކުޅެފައިވަނީ ހޮނިހިރު ދުވަހުގެ ހަވީރު ހެންވޭރު ފުޓުބޯޅަ ދަނޑުގައެވެ. މި މެޗުތަކާއި އިނާމު ދިނުމުގެ ރަސްމިއްޔާތު ޝަރަފްވެރިކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދެވެ.
މުބާރާތް ކުރިއަށްދިޔައީ ގްރޭޑް ގްރޭޑް 1، ގްރޭޑް 2، ގްރޭޑް 3، ގްރޭޑް 4 އަދި ގްރޭޑް 5 އަށް ހުޅުވާލައިގެންނެވެ. މީގެތެރެއިން އިސްކަންދަރު ސްކޫލުން ވަނީ ގްރޭޑް ހަތަރެއް ފިޔަވާ އެހެން ހުރިހާ ގްރޭޑް ކެޓަގަރީން ޗެމްޕިއަންކަން ހޯދާފައެވެ. ގްރޭޑް ހަތަރެއްގެ ޗެމްޕިއަންކަން ހޯދާފައިވަނީ ހުރަވީ ސްކޫލެވެ.
މީގެ އިތުރުން ގްރޭޑް އެކެއްގެ ދެވަނަ ހޯދާފައިވަނީ ހުރަވީ ސްކޫލެވެ. ގްރޭޑް ދޭއްގެ ދެވަނަ ކަލާފާނު ސްކޫލް ހޯދިއިރު ގްރޭޑް ތިނަކާއި ހަތަރެއްގެ ދެވަނަ ހޯދާފައިވަނީ މަޖީދިއްޔާ ސްކޫލެވެ. އަދި ގްރޭޑް ފަހެއްގެ ދެވަނަ ހޯދާފައިވަނީ އަހްމަދިއްޔާ ސްކޫލެވެ.
މުބާރާތް ނިންމުމުގެ ރަސްމިއްޔާތުގައި ނެސްލޭ ކުންފުނީގެ އިސް ބޭފުޅުންނާއި މުބާރާތް އިންތިޒާމުކުރި ފިއޮންޓީ ސްޕޯޓްސް އެކަޑަމީގެ އިސް ބޭފުޅުންގެ އިތުރުން ބައެއް ޑެޕިއުޓީ މިނިސްޓަރުން ބައިވެރިވެވަޑައިގެންނެވި އެވެ.
މިއީ އަހަރުތަކެއް ވަންދެން ރާއްޖޭގައި ވަޅުޖެހިފައި އޮތް ނެޓްބޯޅައިގެ ފޯރި އަނެއްކާވެސް ގެނައުމުގެ މަޤްސަދުގައި ފިއޮންޓީ ސްޕޯޓްސް ކުލަބުން އިސްނަގައިގެން ބޭއްވި ފެސްޓިވަލެކެވެ. މި މުބާރާތުގެ ކާމިޔާބީއާއެކު ފިއޮންޓީ ސްޕޯޓްސް ކުލަބުގެ އަމާޒަކީ މުޅި ރާއްޖެއަށް މި ފެސްޓިވަލް ފުޅާކުރުމެވެ.